ଭୁବନେଶ୍ୱର,୧୨/୦୮: ଗୋଟିଏ ଶିକ୍ଷା ବର୍ଷ ସରି ଏବେ ଆଉ ଏକ ଶିକ୍ଷା ବର୍ଷ ଆରମ୍ଭ ହେବ । ହେଲେ ହଷ୍ଟେଲର ମେସ୍ ଖୋଲି ପାରିଲା ନାହିଁ । ହଷ୍ଟେଲ୍ କ୍ୟାଣ୍ଟିନ୍ରେ ମାସେ ହେଲାଣି ତାଲା ପକାଇଛନ୍ତି ଉତ୍କଳ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ । ରୋଷେଇ ହେଉନି । ତେଣୁ ଖାଇବା ପାଇଁ ନାହିଁ ନ ଥିବା ହଇରାଣ ହେଉଛନ୍ତି ଅନ୍ତେବାସୀ । ସେମାନେ ଖାଇବାକୁ ବିଶ୍ୱବିଦ୍ୟାଳୟରୁ ୩ କିଲୋମିଟର ଯାଉଛନ୍ତି । ହଷ୍ଟେଲ୍ରେ ଗୋଟିଏ ମିଲ୍ ପାଇଁ ୩୫ ଟଙ୍କା ପଡ଼ୁଥିବାବେଳେ ହୋଟେଲ୍ରେ ୧୦୦ ଟଙ୍କା ଖର୍ଚ୍ଚ କରି ଖାଉଛନ୍ତି ଛାତ୍ରଛାତ୍ରୀ । ଅଭିଯୋଗ କଲେ କର୍ତ୍ତୃପକ୍ଷ ଶୁଣୁନାହାନ୍ତି । ହଷ୍ଟେଲ୍ ୱାର୍ଡେନ୍ଠୁ ଆରମ୍ଭ କରି ପିଜି କାଉନସିଲ୍ ଅଧ୍ୟକ୍ଷା, କୁଳପତି ଓ କୁଳସଚିବଙ୍କୁ ଭେଟୁଛନ୍ତି । ଦାବିପତ୍ର ମଧ୍ୟ ଦେଉଛନ୍ତି । ଏପରିକି ବାରମ୍ବାର ଧାରଣା ମଧ୍ୟ ଦେଉଛନ୍ତି । ହେଲେ କିଛି ଫଳ ହେଉନି ।
କ୍ୟାମ୍ପସ୍ରେ ଯେପରି ଜଙ୍କ୍ ଫୁଡ୍ ବିକ୍ରି ନହେବ, ଛାତ୍ରଛାତ୍ରୀ ଯେପରି ସ୍ୱାସ୍ଥ୍ୟକର ଖାଦ୍ୟ ପାଇପାରିବେ ସେଥିପ୍ରତି ଧ୍ୟାନ ଦେବାକୁ ୟୁଜିସି ବାରମ୍ବାର ସମସ୍ତ ବିଶ୍ୱବିଦ୍ୟାଳୟ ଓ କଲେଜ କର୍ତ୍ତୃପକ୍ଷଙ୍କୁ ଚିଠି ଲେଖୁଛି । ହେଲେ ରାଜ୍ୟର ସର୍ବପୁରାତନ ଓ ଖ୍ୟାତନାମା ପରିଚୟ ପାଇଥିବା ଉତ୍କଳ ବିଶ୍ୱବିଦ୍ୟାଳୟରେ ବର୍ଷାଧିକ କାଳ ହଷ୍ଟେଲ୍ ମେସ୍ ନ ଚାଲିବାକୁ ନେଇ ପୁରାତନ ଛାତ୍ରଛାତ୍ରୀମାନେ ନିନ୍ଦା କରିଛନ୍ତି ।
ଉତ୍କଳ ବିଶ୍ୱବିଦ୍ୟାଳୟରେ ୭ଟି ଛାତ୍ରାବାସ ଓ ୭ଟି ଛାତ୍ରୀନିବାସ ରହିଛି । ଏହି ୧୪ଟି ହଷ୍ଟେଲ୍ର ନିଜସ୍ୱ କ୍ୟାଣ୍ଟିନ୍ ରହିଛି । ଛାତ୍ରଛାତ୍ରୀ ପ୍ରତି ମିଲ୍ ପିଛା ୩୫ ଟଙ୍କା ଦେଇଥାନ୍ତି । ଦିନକୁ ୨ଟି ମିଲ୍ ପାଇଁ ମାତ୍ର ୭୦ ଟଙ୍କା ଦେଇଥାନ୍ତି । ଗତବର୍ଷ ଖରାଛୁଟି ପରଠୁ ହଷ୍ଟେଲ୍ କ୍ୟାଣ୍ଟିନ୍ରେ ତାଲା ପଡ଼ିଛି । ଛାତ୍ରଛାତ୍ରୀ ଖାଇବା ପାଇଁ ବିଶ୍ୱବିଦ୍ୟାଳୟ ବାହାରକୁ ଯାଉଛନ୍ତି ।
ନାକ୍ ଟିମ୍ ଆସିବା ପୂର୍ବରୁ କର୍ତ୍ତୃପକ୍ଷ କହିଲେ, ସେଣ୍ଟ୍ରାଲ୍ କ୍ୟାଣ୍ଟିନ୍ ପାଖରୁ ସବୁ ହଷ୍ଟେଲ୍ ପାଇଁ ଖାଦ୍ୟ ତିଆରି ହୋଇ ପ୍ୟାକେଟ୍ ଅନୁଯାୟୀ ସମସ୍ତ ହଷ୍ଟେଲ୍କୁ ବଣ୍ଟନ କରାଯିବ । ହେଲେ ଏହାକୁ ଛାତ୍ରଛାତ୍ରୀ ବିରୋଧ କରିବାରୁ ଏଥିରୁ କର୍ତ୍ତୃପକ୍ଷ ଓହରି ଯାଇଛନ୍ତି । ଅନ୍ୟପଟେ ନାକ୍ ଟିମ୍ ପରିଦର୍ଶନ ସମୟରେ ଖୋଲାଯାଇଥିବା ସେଣ୍ଟ୍ରାଲ୍ କ୍ୟାଣ୍ଟିନ୍ ୪ ମାସରୁ ଅଧିକ ଦିନ ହେଲାଣି ଆଉ ଖୋଲାଯାଉନି । ପିଲାଙ୍କ ଅଭିଯୋଗ, କର୍ତ୍ତୃପକ୍ଷ ଓ କ୍ୟାଣ୍ଟିନ୍ ଟେଣ୍ଡର ନେଇଥିବା ସଂସ୍ଥାସହ ପଡ଼ୁନଥିବାରୁ ଏହାକୁ ବନ୍ଦ କରିଦିଆଯାଇଛି ।
ଛାତ୍ର ଲକ୍ଷ୍ମୀଧର ସାହୁ କହିଛନ୍ତି, ଗତବର୍ଷ ମେ ୨୦ରୁ ଜୁନ୍ ୨୦ ପର୍ଯ୍ୟନ୍ତ ଖରା ଛୁଟି ହୋଇଥିଲା । ଖରାଛୁଟି ଖୋଲିବା ପରଠାରୁ ହଷ୍ଟେଲ୍ କ୍ୟାଣ୍ଟିନ ବନ୍ଦ ରହିଛି । ସେତେବେଳେ କୁହାଗଲା ନୂଆ ଶିକ୍ଷାବର୍ଷ ଆରମ୍ଭ ହେଲେ ମେସ୍ ଚାଲିବ । ହେଲେ ନୂଆ ଶିକ୍ଷାବର୍ଷ ଶେଷ ହୋଇ ଆଉ ଏକ ଶିକ୍ଷା ବର୍ଷ ଆରମ୍ଭ ହେବାକୁ ଯାଉଛି, ହେଲେ ମେସ୍ରେ ତାଲା ଝୁଲୁଛି । ସେହିପରି ଛାତ୍ର ସୌମ୍ୟରଞ୍ଜନ ମହାପାତ୍ର କହନ୍ତି,କର୍ତ୍ତୃପକ୍ଷ କ୍ୟାମ୍ପସ୍ରେ ମନମୁଖୀ ନୀତି ଚଳାଉଛନ୍ତି । ପିଲାମାନେ ମାସେ ହେଲାଣି ହୋଟେଲକୁ ଯାଇ ଖାଉଛନ୍ତି ।
ପୂର୍ବତନ ଛାତ୍ର ମନୋରଞ୍ଜନ ସ୍ୱାଇଁଙ୍କ କହିବା କଥା, ହଷ୍ଟେଲ୍ କ୍ୟାଣ୍ଟିନ୍ର ପ୍ରତିବର୍ଷ ଟେଣ୍ଡର ହୋଇଥାଏ । ଖରାଛୁଟି ଖୋଲିବା ପୂର୍ବରୁ ଟେଣ୍ଡର ହୋଇ ଖୋଲିଯାଏ । ହେଲେ ଚଳିତବର୍ଷ କର୍ତ୍ତୃପକ୍ଷ ନିଜସ୍ୱ ସ୍ୱାର୍ଥ ରଖି ହଷ୍ଟେଲ୍ କ୍ୟାଣ୍ଟିନ୍ ବନ୍ଦ କରିଛନ୍ତି । ହଷ୍ଟେଲ କ୍ୟାଣ୍ଟିନ ବନ୍ଦ କରି ଗୋଟିଏ ସ୍ଥାନରେ ରୋଷେଇ କରି ସମସ୍ତ ହଷ୍ଟେଲ୍କୁ ପ୍ୟାକେଟ୍ କରି ପଠାଇବାକୁ ଯୋଜନା କରିଛନ୍ତି । ଏପରିକି ମିଲ୍ ପିଛା ୩୫ ଟଙ୍କାରୁ ୫୦ ଟଙ୍କାକୁ ବୃଦ୍ଧି କରିବାକୁ ଯୋଜନା କରିଛନ୍ତି । ତେବେ ଅଭିଯୋଗ ସଂପର୍କରେ ଉତ୍କଳ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରି ନାହିଁ ।
