ନୂଆଦିଲ୍ଲୀ,୧୧/୦୯:  ଉଦଘାଟନ ପୂର୍ବରୁ ପଥରମାଡ । ତେବେ ଆସନ୍ତା ୧୫ ତାରିଖରେ ବନ୍ଦେ ଭାରତ ଟ୍ରେନ୍‌ ଉଦ୍‌ଘାଟନ ହୋଇଥାନ୍ତା। ଏନେଇ ଟ୍ରାଏଲ୍‌ ରନ୍‌ ହେଉଥିବା ସମୟରେ  ଟ୍ରେନ୍‌ ଉପରକୁ ହୋଇଛି ପଥରମାଡ଼। ଯେଉଁଥିରେ ଟ୍ରେନ୍‌ର ବିଭିନ୍ନ ସ୍ଥାନରେ କାଚ ଭାଙ୍ଗି ଯାଇଥିବା ଜଣାଯାଇଛି। ଏପରି ଘଟଣା ବିହାରରେ ଘଟିଛି।

ସୂଚନା ମୁତାବକ, ଟ୍ରେନ୍‌ଟି ଜାମସେଦପୁର ଟାଟାରୁ ବାହାରି ଗୋମୋସ୍ଥିତ ନେତାଜୀ ସୁବାସ ଚନ୍ଦ୍ର ବୋଷ ଜଙ୍କସନ୍‌ ହୋଇ ଗୟା ଅଭିମୁଖେ ଯାଉଥିଲା। ସେହି ସମୟରେ ବନ୍ଧୁଆ ଓ ଟନକୁପ୍ପା ଷ୍ଟେସନ ମଝିରେ ହୋଇଥିବା ବେଳେ କିଛି ଅସାମାଜିକ ଯୁବକ ଟ୍ରେନ୍‌ ଉପରେ ଆଖିବୁଜା ପଥରମାଡ଼ କରିଥିଲେ। ଏଥିରେ ଟ୍ରେନ୍‌ର ବିଭିନ୍ନ ସ୍ଥାନରେ କାଚ ଭାଙ୍ଗି ଯାଇଥିବା ଜଣାଯାଇଛି। ଏନେଇ ଖବର ପାଇ ବରିଷ୍ଟ ରେଳ ଅଧିକାରୀ ଘଟଣାସ୍ଥଳରେ ପହଞ୍ଚି ଟ୍ରେନ୍‌ର ସ୍ଥିତି ଯାଞ୍ଚ କରିଛନ୍ତି। ତେବେ ଏଭଳି କିଏ ଓ କାହିଁକି ଘଟଣା ଘଟାଇଥିବା ନେଇ ତଦନ୍ତ ଜାରି ରହିଥିବା ବେଳେ ଆରପିଏଫ୍‌ରେ ଏକ ମାମଲା ରୁଜୁ ହୋଇଛି।