ବରଗଡ଼,୦୯/୦୯: ମେ ମାସରୁ ଅଗଷ୍ଟ ଶେଷଯାଏ ଛୁଇଁ ହେଉନଥିବା ପରିବା ବର୍ତ୍ତମାନ ମାଗଣା ମିଳିଲା ଭଳି ଶସ୍ତା ହୋଇଯାଇଛି । ଓଜନ ବାହାରେ ଯାଚିକି ଚାଷୀ ବା ପରିବା ଦୋକାନୀ ଗ୍ରାହକଙ୍କ ବ୍ୟାଗରେ ଅଧିକ ପରିବା ପୂରାଇ ଦେଉଛି । ଯାହା ପଇସା ଦେଲେ ଚଳିବ ବୋଲି କହୁଛି । ଏତେ ପରିବା କ’ଣ କରିବୁ ବୋଲି ଗ୍ରାହକ ବି ପଚାରୁଛନ୍ତି ।
‘ଗତ ଚାରି ମାସ ହେଲା କଷ୍ଟ ପାଇଛ, ନିଅ ଏବେ ଭଲକି ଖାଇଥାଅ, କେତେବେଳେ କ’ଣ ଦର ହେବ କିଏ କହିପାରିବ’ ବୋଲି ପରିବା ଦୋକାନୀର ପାଲଟା ଯୁକ୍ତି ଖାଉଟିଙ୍କୁ ବିସ୍ମିତ କରିଦେଇଛି । ଏଭଳି ସ୍ଥିତି ପରିବା ଚାଷର ରାଜଧାନୀ ବରଗଡ଼ ଜିଲ୍ଲାରେ ଏବେ ପରିଲକ୍ଷିତ ହେଉଛି । ହଠାତ ଚାରିଭାଗରୁ ଭାଗେକୁ ଖସି ଆସିଥିବା ପରିବା ଦର ଚାଷୀଙ୍କ ପାଇଁ ସଙ୍କଟ ସୃଷ୍ଟି କରିଛି । ପରିବା ଦର ହାରାହାରି ୮୦ରୁ ୧୦୦ ଟଙ୍କା ଉପରେ ରହିଥିବା ସମୟରେ ବାହାର ରାଜ୍ୟରୁ ଆସୁଥିବା ପରିବାରୁ ଲାଭ ପାଇ ନଥିବା ଚାଷୀ ଏବେ ନିଜ ଉତ୍ପାଦନ ବିକ୍ରି କରିବାକୁ ଯାଇ ଅଭାବୀ ବିକ୍ରିର ଶିକାର ହେଉଛି ।
କିଛିଦିନ ପୂର୍ବେ ପ୍ରାୟ ସମସ୍ତ ପନିପରିବାର ଦର କେଜି ୮୦ ଟଙ୍କା ଉପରେ ଥିଲା । ଏପରିକି ଟମାଟୋ କିଲୋ ୨ଶହ ଟଙ୍କାକୁ ବି ଛୁଇଁଥିଲା। ଆକାଶ ଛୁଆଁ ପରିବା ଦରକୁ ଦୃଷ୍ଟିରେ ରଖି ଅଧିକାଂଶ ଘରେ ପନିପରିବା ପ୍ରାୟତଃ ଉଭାନ ହୋଇଯାଇଥିଲା । ବ୍ୟାଗଭର୍ତ୍ତି ପରିବା ପାଇଁ ୫୦୦ରୁ ୬୦୦ ଟଙ୍କା ଖର୍ଚ୍ଚ ହେଉଥିବା ବେଳେ ଏବେ ମାତ୍ର ୯୦/୧୦୦ ଟଙ୍କାରେ ପରିବା ବ୍ୟାଗ୍ ଭର୍ତ୍ତି ହୋଇଯାଉଛି । ତେବେ ଅଧିକ ଦରରେ ପରିବା ବିକ୍ରି ସମୟରେ ମଧ୍ୟସ୍ଥି ଓ ବେପାରୀମାନେ ଲାଭବାନ ହେଉଥିଲେ ।
ପରିବା ଦର ଅତି ତଳକୁ ଖସିଯିବା ଦ୍ୱାରା ଚାଷୀ କ୍ଷତିଗ୍ରସ୍ତ ହେବା ସାର ହୋଇଛି । ଏଭଳି ସ୍ଥିତି ପାଇଁ ବେପାରୀ ଓ ମଧ୍ୟସ୍ଥିମାନେ ହିଁ ଦାୟୀ ବୋଲି ଚାଷୀମାନେ ଅଭିଯୋଗ କରୁଥିବା ବେଳେ ମାତ୍ରାଧିକ ଶସ୍ତା ଦର ଯୋଗୁଁ ଚାଷୀଙ୍କ ଅବସ୍ଥା ଆହୁରି ଖରାପ ହେବାକୁ ଯାଉଛି । ଏଥିଲାଗି ଖାଉଟିମାନେ ସରକାରୀ ଅବ୍ୟବସ୍ଥାକୁ ଦାୟୀ କରୁଛନ୍ତି । ଏପଟେ ଚାଷୀମାନେ ବର୍ତ୍ତମାନର ପରିବା ଦର ଯୋଗୁଁ ଚାଷଖର୍ଚ୍ଚର ମୂଳ ବି ବାହାରି ପାରୁନାହିଁ ବୋଲି କ୍ଷୋଭ ପ୍ରକାଶ କରୁଛି । ଅବ୍ୟବସ୍ଥିତ ପରିବା ବଜାର ବ୍ୟବସ୍ଥାରେ ସୁଧାର ବର୍ତ୍ତମାନ ଏକ ଆହ୍ୱାନରେ ପରିଣତ ହୋଇଯାଇଛି ।
ବରଗଡ଼ ଜିଲ୍ଲାର ଭଟଲି ବଜାରରେ ପ୍ରାୟ ସମସ୍ତ ପନିପରିବା ଦର ୨୦ ଟଙ୍କାକୁ ଖସି ଆସିଥିବା ବେଳେ ଟମାଟୋ କିଲୋ ୧୫ ଟଙ୍କାରେ ପହଞ୍ଚିଲାଣି । ଏହା ତୁଳନାରେ ଅମ୍ବାଭୋନା ଓ ବିଜେପୁର ଅଞ୍ଚଳରେ ପରିବା ଦର ଆହୁରି ଟଙ୍କେ ଅଧେ କମ ରହିଛି । ଏଠୁ ଅତି ଶସ୍ତାରେ ପରିବା କିଣି ନେଇ ବେପାରୀମାନେ ବାହାର ଜାଗାରେ ଅଧିକ ଦରରେ ବିକି ମାତ୍ରାଧିକ ଲାଭ ଉଠାଉଛନ୍ତି ।
ଭଟଲି ବ୍ଲକ ନୂଆଁଗଡ଼ ଗାଁର ପରିବା ଚାଷୀ ଦୂର୍ଲଭ ଖମାରୀ କହିଛନ୍ତି, ୨ ଏକରରେ ପୋଟଳ ଚାଷ କରିଛି । ଦୁଇମାସ ଆଗରୁ ୮୦-୧୦୦ ଟଙ୍କାରେ ବିକ୍ରି ହେଉଥିବା ପୋଟଳ ମାସେ ଆଗରୁ ୫୦-୬୦ ଟଙ୍କାରେ କେଜି ବିକୁଥିଲି । ଏବେ ଉତ୍ପାଦନ ବଢ଼ଲା ପରେ ଏବେ ୨୦-୨୫ ଟଙ୍କାଙ୍କୁ ଦାମ କମିଗଲାଣି । ଦର ବେଶି ଥିବା ସମୟରେ ବେପାରୀମାନେ ସିଧା ବାଡ଼ିରୁ ନେଉଥିବାରୁ ଲାଭ ପାଉନଥିଲୁ । ଏବେ ରେଟ୍ କମିବା ପରେ ବି ସେଇ ଦଶା ବୋଲି ସେ କ୍ଷୋଭର ସହ ପ୍ରକାଶ କରିଛନ୍ତି ।
ନୂଆଗଡ଼ର ସତ୍ୟବାନ ବାରିକ କହନ୍ତି, ୨୦ ଡେସିମିଲ୍ ଜାଗାରେ କଲରା ଚାଷ କରଛି । ଆଗରୁ ଭଲ ଦୁଇ ପଇସା ମିଳୁଥିଲା । ଏବେ ଯେଉଁ ଦାମରେ ବିକୁଛୁ ସେଥିରେ ମୂଳ ହିଁ ବାହାରୁଛି ବୋଲି ସେ ପ୍ରକାଶ କରିଛନ୍ତି ।
ନିକଟ ଅତୀତରେ ପରିବା ଦର ଶୁଣି ଘର ଲୋକଙ୍କୁ ପରିବା ଆଣିବାକୁ କହିବାକୁ ଡର ଲାଗୁଥିଲା । ଏବେ ଶସ୍ତା ହେବାରୁ ପୁଣି ଘରକୁ ନିୟମିତ ପରିବା ଆସୁଛି ବୋଲି କହିଛନ୍ତି ବବିତା ଷଡ଼ଙ୍ଗୀ । ମହଙ୍ଗା ପରିବା ଦର ବେପାରୀକୁ ସୁହାଉଥିବା ବେଳେ ବର୍ତ୍ତମାନ ଅତି କମ ଦାମରେ ପରିବା କିଣି ବାହାର ଜିଲ୍ଲାରେ ୪ ଗୁଣ ଅଧିକ ଦରରେ ବିକ୍ରି କରୁଥିବାରୁ ସବୁ ସମୟରେ ବେପାରୀ ଲାଭବାନ ହେଉଛି ଏବଂ ଚାଷୀ କ୍ଷତିଗ୍ରସ୍ତ ହେଉଥିବାରୁ ସରକାରୀ ଯୋଜନା, ବଜାର ବ୍ୟବସ୍ଥା, ଦରମା ନେଉଥିବା ବିପଣନ ସଂସ୍ଥା କୋଉ କାମକୁ ବୋଲି ଚାଷୀନେତା ରମେଶ ମହାପାତ୍ର ପ୍ରଶ୍ନ କରିଛନ୍ତି।
