ବେଙ୍ଗାଲୁରୁ: କୋଲକାତା ଆରଜି କର ମେଡିକାଲ କଲେଜ ଓ ହସ୍ପିଟାଲରେ ୩୧ ବର୍ଷୀୟା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାକୁ ନେଇ ଦେଶରେ ଆକ୍ରୋଶ ବଢ଼ିବାରେ ଲାଗିଛି । ଏହାରି ଭିତରେ ପୁଣି ଥରେ କର୍ଣ୍ଣାଟକରେ ଯୁବତୀଙ୍କୁ ଦୁଷ୍କର୍ମ ଓ ହତ୍ୟା ମାମଲା ଦେଶର ଆଇନ ଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନବାଚୀ ସୃଷ୍ଟି କରିଛି । କର୍ଣ୍ଣାଟକର ବିଦାର ସହରରେ ଜଣେ ୧୮ ବର୍ଷୀୟା ଯୁବତୀଙ୍କୁ ଦୁଷ୍କର୍ମ ପରେ ହତ୍ୟା କରାଯାଇଥିବା ଜଣାପଡ଼ିଛି । ଏହି ମାମଲାରେ ପୋଲିସ ୩ ଜଣଙ୍କୁ ଗିରଫ କରିଛି । 

ସେପଟେ ପୀଡ଼ିତାଙ୍କୁ ନ୍ୟାୟ ଦାବିରେ ଆନ୍ଦୋଳନ ମଧ୍ୟ ତୀବ୍ର ହେବାରେ ଲାଗିଛି । ମିଳିଥିବା ସୂଚନା ଅନୁସାରେ, ଯୁବତୀଜଣଙ୍କ ଅଗଷ୍ଟ ୨୯ରେ ନିଖୋଜ ହୋଇଯାଇଥିଲେ । ତାଙ୍କର ମୃତଦେହ ସେପ୍ଟେମ୍ବର ୧ରେ ଗୁଣତୀର୍ଥଓ୍ବାଡି ପ୍ରାଥମିକ ସ୍କୁଲ ପାଖରେ ଥିବା ଏକ ବୁଦାମୂଳରୁ ମିଳିଥିଲା । ପ୍ରଥମେ ପୋଲିସ ହତ୍ୟା ମାମଲା ରୁଜୁ କରି ତଦନ୍ତ କରିଥିଲା । କିନ୍ତୁ ବ୍ୟବଚ୍ଛେଦ ରିପୋର୍ଟ ଆସିବା ପରେ ହତ୍ୟା ପୂର୍ବରୁ ଯୁବତୀଙ୍କୁ ଦୁଷ୍କର୍ମ କରାଯାଇଥିବା ଜଣାପଡ଼ିଥିଲା । ପୀଡ଼ିତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା ।

ପୋଲିସର ସୂଚନା ଅନୁସାରେ, ଗିରଫ ୩ ଅଭିଯୁକ୍ତଙ୍କ ମଧ୍ୟରୁ ଜଣେ ପୀଡ଼ିତାଙ୍କୁ ଦୁଷ୍କର୍ମ କରିବା ସହ ପଥରରେ ତାଙ୍କ ମୁଣ୍ଡକୁ ଛେଚି ହତ୍ୟା କରିଥିଲା । ଅନ୍ୟ ଦୁଇ ଜଣ ଗାଡ଼ିରେ ତାକୁ ଅପେକ୍ଷା କରିଥିଲେ । ବିଦାର ଏସପି ପ୍ରଦୀପ ଗୁଣ୍ଟେ କହିଛନ୍ତି, ମୁଖ୍ୟ ଅଭିଯୁକ୍ତ ପୀଡ଼ିତାଙ୍କ ସଂପର୍କୀୟ । ସେ ଅନ୍ୟ ଦୁଇ ସାଙ୍ଗଙ୍କ ସହ ମିଶି ଅପରାଧ ଘଟାଇଛି । ସେ ଆହୁରି କହିଛନ୍ତି, ଯୁବତୀଜଣଙ୍କ ଅନୁସୂଚିତ ଜାତିର । ଏସବୁ ଭିତରେ, ଶତାଧିକ ଲୋକେ ହାତରେ ବ୍ୟାନର ଏବଂ ପ୍ଲାକାର୍ଡ ଧରି ବିଦାରରେ ଜୋରଦାର ଆନ୍ଦୋଳନ କରିଛନ୍ତି । ତୀବ୍ର ଆନ୍ଦୋଳନ ଫଳରେ ବିଦାର ସହରରେ ଯାତାୟତ ଠପ ହୋଇପଡ଼ିଛି । ସେପଟେ କର୍ଣ୍ଣାଟକର ମନ୍ତ୍ରୀ ଇଶ୍ବର ଖାଂଡ୍ରେ ପୀଡ଼ିତାଙ୍କ ପରିବାରକୁ ଭେଟିଛନ୍ତି । ସେ ପୀଡ଼ିତାଙ୍କ ପରିବାରକୁ ୪ ଲକ୍ଷ ଟଙ୍କା କ୍ଷତିପୂରଣ ଦିଆଯିବ ବୋଲି ଘୋଷଣା କରିଛନ୍ତି ।