ନୂଆଦିଲ୍ଲୀ, ୨୬।୧: ସାଧାରଣତଃ ସୁନ୍ଦରତା ଯେଭଳି ଜଣକୁ ପରିଚୟ ପ୍ରଦାନ କରେ ଠିକ୍ ସେହିପରି ଅସୁନ୍ଦର ପାଇଁ ବି ଲୋକେ ବିଭିନ୍ନ ସମୟରେ ଦୃଷ୍ଟି ଆକର୍ଷଣ କରିଥାନ୍ତି । ଏହି କ୍ରମରେ ଏବେ ଜଣେ ମହିଳା ତାଙ୍କର ଅସୁନ୍ଦର ବଗିଚା ପାଇଁ ଚର୍ଚ୍ଚାରେ ରହିଛନ୍ତି । ଅଷ୍ଟ୍ରେଲିଆର କାଥଲିନ୍ ମୁରେ ବିଶ୍ୱର ସବୁଠୁ ଅସୁନ୍ଦର ବଗିଚାର ମାଲିକାଣୀ ଭାବେ ପରିଚୟ ହାସଲ କରିଛନ୍ତି । ଜଣେ ହଲିଉଡ କଳକାରଙ୍କ ଦ୍ୱାରା ଆୟୋଜିତ ବିଶ୍ୱର ସବୁଠୁ ଅସୁନ୍ଦର ବଗିଚା ପ୍ରତିଯୋଗିତାରେ ଗତବର୍ଷ ସେ ପ୍ରଥମ ସ୍ଥାନ ଅଧିକାର କରିଥିଲେ । ପୁରସ୍କାର ସ୍ୱରୂପ ତାଙ୍କୁ ବାଦାମୀ ରଙ୍ଗର ଏକ ଟି ସାର୍ଟ ମିଳିଛି । ସବୁଠୁ ମଜାଦାର କଥା ହେଉଛି, ଏହି ଟି-ସାର୍ଟରେ ବିଶ୍ୱର ସବୁଠୁ ଅସୁନ୍ଦର ବଗିଚାର ମାଲିକାଣୀ ବୋଲି ଉଲ୍ଲେଖ ଅଛି ।
ତାଙ୍କ ବଗିଚାର ବିଶେଷତ୍ୱ ହେଉଛି ଯେ, ତାଙ୍କ ବଗିଚା ଦେଖିବାକୁ ଅବିକଳ ମରୁଡ଼ିଗସ୍ତ ଜମି ଭଳି । ଏପରିକି ଏହାକୁ ଟାଙ୍ଗରା ଭୂମି କହିଲେ କିଛି ଭୁଲ୍ ହେବ ନାହିଁ । ସାଧାରଣତଃ ବଗିଚାରେ ରଙ୍ଗବେରଙ୍ଗର ଫୁଲଗଛ ସହ ସବୁଜ ପରିବେଶ ଦେଖିବାକୁ ମିଳିଥାଏ । ଏଭଳି କ୍ଷେତ୍ରରେ ମୁରେଙ୍କ ବଗିଚା ସମ୍ପୂର୍ଣ୍ଣ ଓଲଟା । ତାଙ୍କ ବଗିଚାରେ ଶୁଖିଲା ଘାସ, ଝାଉଁଳି ପଡ଼ିଥିବା ଗଛ ସହିତ କିଛି ଜାଗାରେ ମୂଷା ଗାତ ମଧ୍ୟ ଦେଖିବାକୁ ମିଳେ । ଅବଶ୍ୟ ଏହା ପଛରେ ଏକ ରୋଚକୀୟ କାହାଣୀ ରହିଛି ।
ପ୍ରଥମେ ଏହି ପ୍ରତିଯୋଗିତା ସ୍ୱିଡେନ୍ସ୍ଥିତ ଗଟ୍ଲାଣ୍ଡ ଆଇଲାଣ୍ଡ ଆରମ୍ଭ କରିଥିଲା । ଏହାର ଉଦ୍ଦେଶ୍ୟ ଥିଲା ଜଳ ସଙ୍କଟ ଉପରେ ଲୋକଙ୍କ ଦୃଷ୍ଟି ଆକର୍ଷଣ କରିବା । ଏବେ ଏହି ବାର୍ତ୍ତା ମୁରେ ମଧ୍ୟ ଲୋକଙ୍କୁ ନିଜ ଅନୁନ୍ଦର ବଗିଚା ମାଧ୍ୟମରେ ଦେବା ପାଇଁ ପ୍ରୟାସ କରିଛନ୍ତି । ଅନ୍ୟପଟେ ମୁରେ ତାଙ୍କ ବଗିଚା ମଝିରେ ଛିଡ଼ା ହୋଇ ଫଟୋ ଉତ୍ତୋଳନ କରିଛନ୍ତି । ଯାହାକି ସାମାଜିକ ଗଣମାଧ୍ୟମରେ ସେୟାର ହେବା ପରେ ସମସ୍ତଙ୍କ ନଜରକୁ ଆସିଛି ।