ନୂଆଦିଲ୍ଲୀ ୨୯/୦୯: ଅନ୍ତର୍ଜାତୀୟ ଏମି ଆୱାର୍ଡସ୍-୨୦୨୩ ନୋମିନେସନ୍ରେ ସ୍ଥାନ ପାଇଛନ୍ତି ବଲିଉଡ୍ ଅଭିନେତ୍ରୀ ଶେଫାଲି ଶାହ, ଜିମ୍ ସର୍ଭ ଓ କମେଡିଆନ୍ ବୀର ଦାସ। ନେଟ୍ଫ୍ଲିକ୍ସ ଡ୍ରାମା ସିରିଜ୍ ‘ଦିଲ୍ଲୀ କ୍ରାଇମ୍-୨’ରେ ପ୍ରଦର୍ଶନ ପାଇଁ ‘ଅଭିନେତ୍ରୀଙ୍କ ଶ୍ରେଷ୍ଠ ପ୍ରଦର୍ଶନ’ ବିଭାଗରେ ଶେଫାଲି ନାମାଙ୍କନରେ ସ୍ଥାନ ପାଇଛନ୍ତି । ତାଙ୍କ ସହ ରେସ୍ରେ ଅଛନ୍ତି କୋନି ନିଲ୍ସେନ୍, ବିଲି ପାଇପର୍ ଓ କାର୍ଲା ସୌଜା ।
ନାମୀ କଳାକାରଙ୍କ ସହିତ ନୋମିନେସନ୍ରେ ସ୍ଥାନ ପାଇଥିବାରୁ ଶେଫାଲି ଇନ୍ଷ୍ଟାଗ୍ରାମ୍ରେ ଖୁସି ଜାହିର କରିଛନ୍ତି । ଏହି ଶୋ’ର ସିଜନ୍-୧ ଶ୍ରେଷ୍ଠ ଡ୍ରାମା ସିରିଜ୍ ବିଭାଗରେ ବିଜେତା ହୋଇଥିଲା । ସୋନିଲିଭ୍ ୱେବ୍ ସିରିଜ୍ ‘ରକେଟ୍ ବଏଜ୍’ ପାଇଁ ‘ଅଭିନେତାଙ୍କ ଶ୍ରେଷ୍ଠ ପ୍ରଦର୍ଶନ’ ବିଭାଗରେ ଜିମ୍ ସର୍ଭ ନୋମିନେସନ୍ରେ ସ୍ଥାନ ପାଇଛନ୍ତି । ତାଙ୍କ ସହିତ ନୋମିନି ଅଛନ୍ତି ଗୁସ୍ତାଭୋ ବାସାନି, ମାର୍ଟିନ ଫ୍ରିମ୍ୟାନ୍ ଓ ଜୋନାସ କାର୍ଲସନ୍ ।
ବୀର ଦାସ ୨ୟ ଥର ପାଇଁ ଇଣ୍ଟର୍ନ୍ୟାସନାଲ୍ ଏମିରେ ନୋମିନେଟ୍ ହୋଇଛନ୍ତି । ନେଟ୍ଫ୍ଲିକ୍ସ ସ୍ପେଶାଲ‘ବୀର ଦାସ: ଲ୍ୟାଣ୍ଡିଂ’ ପାଇଁ ଶ୍ରେଷ୍ଠ କମେଡି ବିଭାଗରେ ତାଙ୍କୁ ଚୟନ କରାଯାଇଛି । ତାଙ୍କ ସହ ଏହି ରେସ୍ରେ ଅଛନ୍ତି ଫ୍ଲାମ୍ବିଉ, ଏଲ୍ ଏନ୍କାରଗାଡୋ ଓ ଡେରି ଗର୍ଲସ ସିଜନ୍-୩ । ଏହି ଖବର ପାଇବା ପରେ ବୀର ଦାସ ନିଜ ଶୋ’ର ପୂରା ଟିମ୍କୁ କୃତଜ୍ଞତା ଜଣାଇଛନ୍ତି । ଫିଲ୍ମ ଓ ଟିଭି ଧାରାବାହିକ ପ୍ରଯୋଜିକା ଏକତା କପୁରଙ୍କୁ ଚଳିତ ଇଣ୍ଟର୍ନ୍ୟାସନାଲ୍ ଏମି ଆୱାର୍ଡସ୍ରେ ଡାଇରେକ୍ଟୋରେଟ୍ ଆୱାର୍ଡ ଦ୍ୱାରା ସମ୍ମାନିତ କରାଯିବ । ଆସନ୍ତା ନଭେମ୍ବର ୨୦ ତାରିଖରେ ନ୍ୟୁୟର୍କଠାରେ ଆୟୋଜିତ ଉତ୍ସବରେ ଏକତା ଏହି ସ୍ୱତନ୍ତ୍ର ସମ୍ମାନ ପାଇବେ । ଇଣ୍ଟରନ୍ୟାସ୍ନାଲ ଏମି ଆୱାର୍ଡସରେ ଅନ୍ୟତମ ଜୁରି ସଦସ୍ୟ ଭାବେ ନଜର ଆସିବେ ଅଭିନେତ୍ରୀ ରାଧିକା ମଦାନ ।
