ବାରଙ୍ଗ, ୩୧।୧ : ମଦ୍ୟପ ଯୁବକଙ୍କ ଉନ୍ମତ୍ତକାଣ୍ଡ। ମଦ୍ୟପାନ କରି ରାତିରେ ସାହି ପଡ଼ିଶାଙ୍କୁ ଗାଳି କରୁଥିଲେ । ପିସିଆର ପହଞ୍ଚିବାରୁ ପୋଲିସ କର୍ମଚାରୀକୁ କଲେ ମରଣାନ୍ତକ ଆକ୍ରମଣ। ଏହି ଘଟଣାରେ ୩ ଜଣଙ୍କୁ ବାନ୍ଧିଲା ଚନ୍ଦ୍ରଶେଖରପୁର ଥାନା ପୁଲିସ୍ । ଗିରଫ ଯୁବକମାନେ ହେଲେ ଅନିରୁଦ୍ଧ ସାହୁ, ଜ୍ୟୋତି ରଞ୍ଜନ ସ୍ବାଇଁ ଏବଂ ପ୍ରିୟବ୍ରତ ଦାସ। ମଙ୍ଗଳବାର ହାଉସିଂବୋର୍ଡ କଲୋନୀରେ ଘଟିଛି ଏହି ଘଟଣା।
କଲୋନୀ ମଧ୍ୟରେ ମଦ ପିଇ ଲୋକଙ୍କୁ ଗାଳି ଗୁଲଜ କରୁଥିବା ବେଳେ ଖବର ପାଇ ସ୍ଥାନୀୟ ପିସିଆର ପହଞ୍ଚି ଯୁବକଙ୍କୁ ବୁଝାସୁଝା କରିଥିଲା। ତେବେ ୪ ଯୁବକ ପିସିଆର କର୍ମୀଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିବା ସହ ମାରପିଟ କରିଥିଲେ। ଶେଷରେ ଚନ୍ଦ୍ରଶେଖରପୁର ଥାନାର କିଛି ପୁଲିସ୍ ଅଧିକାରୀ ଏବଂ ଅନ୍ୟ ପିସିଆର୍ ପହଞ୍ଚିଥିଲେ ମଧ୍ୟ ଯୁବକ ମାନେ ଆହୁରି ଧସ୍ତାଧସ୍ତି କରିଥିଲେ। ଯୁବକଙ୍କ ଆକ୍ରମଣରେ ପିଶିଆର ଡ୍ରାଇଭର ମାନସ କୁମାର ସାହୁ ଆହତ ହେବା ସହ ତାଙ୍କ ମୋବାଇଲ୍ ଭାଙ୍ଗି ଯାଇଥିଲା। ୪ ଜଣ ଯୁବକଙ୍କ ମଧ୍ୟରୁ ଜଣେ ଫେରାର ହୋଇଥିବା ବେଳେ ୩ ଜଣକୁ କାବୁ କରିବା ସହ ବୋଲେରୋ ଗାଡି ଜବତ କରାଯାଇଥିଲା। ପରେ ୩ ଆକ୍ରମଣକାରୀଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି।