ପୁରୀ ୦୯/୦୨: ଅର୍ପଣ ରଥକୁ ମିଳିଥିବା ଦାନ ଟଙ୍କା ପରିମାଣ ଏବେ ସୁଦ୍ଧା ୩ କୋଟି ୬ ଲକ୍ଷ ୬୨ ହଜାର ୮୧୩ ଟଙ୍କାରେ ପହଞ୍ଚିଛି । ଶ୍ରୀମନ୍ଦିର ପ୍ରଶାସନ ପକ୍ଷରୁ ଗୁରୁବାର ଏହି ସୂଚନା ଦିଆଯାଇଛି । ୩୦ ଜିଲ୍ଲାରୁ ଶ୍ରଦ୍ଧାଳୁମାନେ ଅର୍ପଣ ରଥରେ ବିପୁଳ ପରିମାଣର ଦାନ ଦେଇଛନ୍ତି । ଏବେବି କିଛି ସ୍ଥାନରୁ ଦାନ ଟଙ୍କା ଆସିନି । ଏହା ପହଞ୍ଚିବା ପରେ ମୋଟ କେତେ ହେବ ସ୍ପଷ୍ଟ ହେବ ।
ଟଙ୍କା ଗଣତି କରିବା ପରେ ଶ୍ରୀମନ୍ଦିର ପ୍ରଶାସନ ଏହାକୁ ନିଜ ସାଧାରଣ ଜମା ଖାତାରେ ରଖୁଛି । ଜିଲ୍ଲାପାଳମାନଙ୍କ ଜରିଆରେ ଏକକାଳୀନ ଟଙ୍କା ଜମା ଦିଆଯାଉ ନଥିବାରୁ ଶ୍ରୀମନ୍ଦିର କାର୍ଯ୍ୟାଳୟରେ ଗଣତି ପ୍ରକ୍ରିୟା ସମୟ ଲମ୍ବା ହୋଇଚାଲିଛି । ଗତ ମାସ ୨୨ ତାରିଖରୁ ଏହି ଦାନ ଗ୍ରହଣ ଓ ଗଣତି ପ୍ରକ୍ରିୟା ଜାରି ରଖିଛି ଶ୍ରୀମନ୍ଦିର ପ୍ରଶାସନ । ଭକ୍ତମାନେ ମହାପ୍ରଭୁଙ୍କ ଉଦ୍ଦେଶ୍ୟରେ ଦେଇଥିବା ଦାନ ଟଙ୍କା କିପରି ବ୍ୟବହାର ହେବ ସେନେଇ ଶ୍ରୀମନ୍ଦିର ପ୍ରଶାସନ ମଧ୍ୟ କୌଣସି ସ୍ପଷ୍ଟ ସୂଚନା ଦେଇନି । ଶ୍ରୀମନ୍ଦିର ପରିସର ହୁଣ୍ଡିର ଦାନ ଟଙ୍କାକୁ ବିଭିନ୍ନ ବ୍ୟାଙ୍କ ଆକାଉଣ୍ଟରେ ଜମା କରିବା ଭଳି ଏହାକୁ ମଧ୍ୟ ଜମା କରାଯାଉଛି ।
ସେପଟେ ଅର୍ପଣ ରଥକୁ ମିଳିଥିବା ଦାନ ଚାଉଳ ପରିମାଣ ନେଇ ଶ୍ରୀମନ୍ଦିର ପ୍ରଶାସନ ସ୍ପଷ୍ଟ ସୂଚନା ଦେଇନି । ବିଭିନ୍ନ ଜିଲ୍ଲାରୁ ପ୍ରତିଦିନ ବହୁ ସଂଖ୍ୟାରେ ଟ୍ରକ୍ ଅର୍ପଣ ରଥ ଚାଉଳ ନେଇ ପୁରୀରେ ପହଞ୍ଚୁଛି । ଏହାକୁ ଓଜନ କରି ଶ୍ରୀମନ୍ଦିର ପ୍ରଶାସନ ରଖୁଛି । ଜିଲ୍ଲା ଯୋଗାଣ ଅଧିକାରୀଙ୍କ ସୂଚନା ମୁତାବକ ଅର୍ପଣ ରଥକୁ ମିଳିଥିବା ଚାଉଳ ପରିମାଣ ପ୍ରାୟ ୬୬୦୦ କୁଇଣ୍ଟାଲ ହୋଇଛି । ପ୍ରାୟ ୧୨ ହଜାର କୁଇଣ୍ଟାଲ ଚାଉଳ ପହଞ୍ଚିବ ବୋଲି ସୂଚନା ରହିଛି ।
ପ୍ରତିଦିନ ପହଞ୍ଚୁଥିବା ଅର୍ପଣ ଚାଉଳକୁ ଶ୍ରୀଗୁଣ୍ଡିଚା ମନ୍ଦିର କିମ୍ବା ବଳଗଣ୍ଡିସ୍ଥିତ ଅକ୍ଷୟପାତ୍ର ଫାଉଣ୍ଡେସନ୍ ଭଣ୍ଡାର ଘରେ ରଖାଯାଉଛି । ଦୀର୍ଘଦିନ ଏହି ଚାଉଳକୁ ସଂରକ୍ଷଣ କରି ରଖିବା ନିମନ୍ତେ ଆବଶ୍ୟକ କେମିକାଲ ଟ୍ରିଟମେଣ୍ଟ କରାଯିବ । ଏଠାରୁ ଚାଉଳ ନେଇ ଶ୍ରୀମନ୍ଦିର ରୋଷଶାଳାରେ ରାନ୍ଧି ମହାପ୍ରଭୁଙ୍କୁ ଭୋଗ କରାଯାଉଛି । ଭୋଗ ପରେ ପ୍ରାୟ ୧୦୦ ଦାସିଆ ହାଣ୍ଡି ଖେଚୁଡ଼ି ଓ କାନିକାକୁ ଶ୍ରଦ୍ଧାଳୁଙ୍କୁ ଶ୍ରୀମନ୍ଦିର ପଶ୍ଚିମ, ଉତ୍ତର, ଦକ୍ଷିଣ ଦ୍ୱାରରେ ବାଣ୍ଟି ଦିଆଯାଉଛି ।