ନୂଆଦିଲ୍ଲୀ: ଦେଶର ୫୧୪ ସାଂସଦଙ୍କ ମଧ୍ୟରୁ ୨୨୫ ଜଣଙ୍କ ବିରୁଦ୍ଧରେ ଅପରାଧିକ ମାମଲା ରହିଛି । ୪୪ ପ୍ରତିଶତ ବିଦାୟୀ ସାଂସଦଙ୍କ ନାଁରେ ଅପରାଧିକ ମାମଲା ଥିବା ନେଇ ଆସୋସିଏସନ୍ ଫର ଡେମୋକ୍ରେଟିକ୍ ରିଫର୍ମସ୍ (ଏଡିଆର) ରିପୋର୍ଟରୁ ଜଣାପଡ଼ିଛି । ୧୮ ତମ ଲୋକସଭା ନିର୍ବାଚନ ପୂର୍ବରୁ ଏହି ରିପୋର୍ଟ ସାମ୍ନାକୁ ଆସିଛି । ୨୨୫ ସାଂସଦଙ୍କ ମଧ୍ୟରୁ ୧୪୯ (୨୯%) ସାଂସଦଙ୍କ ବିରୁଦ୍ଧରେ ସଙ୍ଗୀନ ଅପରାଧିକ ମାମଲା ରହିଛି । ହତ୍ୟା, ହତ୍ୟା ଉଦ୍ୟମ ଏବଂ ମହିଳା ବିରୋଧୀ ହିଂସା ମାମଲାରେ ଏମାନେ ସଂଶ୍ଳିଷ୍ଟ ।
ହତ୍ୟା ମାମଲା: ୯ ଜଣ ସାଂସଦ ନିଜ ବିରୁଦ୍ଧରେ ହତ୍ୟା ମାମଲା ଥିବା ନେଇ ସତ୍ୟପାଠ ଦେଇଛନ୍ତି । ସେମାନଙ୍କ ମଧ୍ୟରୁ ବିଜେପିର ୫ ଜଣ ସାଂସଦ ଥିବା ବେଳେ କଂଗ୍ରେସ, ବିଏସପି ଏବଂ ଓ୍ବାଇଏସଆର କଂଗ୍ରେସର ଜଣେ ଲେଖାଏଁ ସାଂସଦ ସାମିଲ ।
ମହିଳା ବିରୋଧୀ ହିଂସା: ୧୬ ଜଣ ସାଂସଦ ମହିଳା ବିରୋଧୀ ହିଂସା ଜନିତ ମାମଲାରେ ଛନ୍ଦି ହୋଇଛନ୍ତି । ସେମାନଙ୍କ ମଧ୍ୟରୁ ୩ ଜଣ ଦୁଷ୍ମର୍ମ ଅଭିଯୁକ୍ତ ଏବଂ ସେମାନଙ୍କ ବିରୁଦ୍ଧରେ ଆଇପିସି ଧାରା ୩୭୬ ଅଧୀନରେ ମାମଲା ରୁଜୁ ହୋଇଛି ।
ବିଜେପି: ଏଡିଆର ରିପୋର୍ଟୁ ଜଣାପଡ଼ିଛି ଯେ, ୨୯୪ ବିଜେପି ସାଂସଦଙ୍କ ମଧ୍ୟରୁ ୧୧୮ (୪୦%) ନିଜ ସତ୍ୟପାଠରେ ସେମାନଙ୍କ ବିରୁଦ୍ଧରେ ଅପରାଧିକ ମାମଲା ଥିବା ଦର୍ଶାଇଛନ୍ତି । ୮୭ ସାଂସଦଙ୍କ ନାଁରେ ଅତି ଗୁରୁତର ଅପରାଧିକ ମାମଲା ରହିଛି ।
କଂଗ୍ରେସ: ୪୬ କଂଗ୍ରେସ ସାଂସଦଙ୍କ ମଧ୍ୟରୁ ୨୬ (୫୭%) ବିରୁଦ୍ଧରେ ଅପରାଧିକ ମାମଲା ରହିଥିବା ନେଇ ସେମାନେ ନିଜ ସତ୍ୟପାଠରେ ଜଣାଇଛନ୍ତି । ସେହିଭଳି ୧୪ ଜଣ ସାଂସଦଙ୍କ ନାଁ ଗୁରୁତର ଅପରାଧିକ ମାମଲା ରହିଛି।
ଡିଏମକେ: ୨୪ ସାଂଦଙ୍କ ମଧ୍ୟରୁ ୪୬ ପ୍ରତିଶତ ବା ୧୧ ଜଣଙ୍କ ନାଁରେ କ୍ରିମିନାଲ କେସ୍ ଥିବା ବେଳେ ୨୯ ପ୍ରତିଶତ ବା ୭ ଜଣଙ୍କ ବିରୁଦ୍ଧରେ ଗୁରୁତର ଅପରାଧିକ ମାମଲା ରହିଥିବା ଜଣାପଡ଼ିଛି ।
ଟିଏମସି: ଟିଏମସିର ୧୯ ସାଂସଦଙ୍କ ମଧ୍ୟରୁ ୪୨ ପ୍ରତିଶତ ସାଂସଦ ବା ୮ ଜଣ ଦାଗୀ । ସେହିଭଳି ୪ ଜଣ ସଙ୍ଗୀନ ଅପରାଧରେ ଛନ୍ଦି ହୋଇଛନ୍ତି ।
ଜେଡିୟୁ: ଜେଡିୟୁର ୭୫ ପ୍ରତିଶତ ଅର୍ଥାତ ୧୨ ଜଣ ସାଂସଦ ଅପରାଧରେ ଜଡ଼ିତ । ମୋଟ ୧୯ ସାଂସଦଙ୍କ ମଧ୍ୟରେ ୮ ଜଣ ସଙ୍ଗୀନ ମାମଲାରେ ଫସିଛନ୍ତି ।
ଓ୍ବାଇଏସ୍ଆରସିପି: ମୋଟ ୧୭ ସାଂସଦଙ୍କ ମଧ୍ୟରୁ ୮ (୪୭%) ଜଣଙ୍କ ନାଁରେ ଅପରାଧିକ ମାମଲା ଥିବା ନେଇ ଏଡିଆର ରିପୋର୍ଟରୁ ଜଣାପଡ଼ିଛି । ୭ ଜଣ ସାଂସଦ ଗୁରୁତର ଅପରାଧରେ ଛନ୍ଦି ହୋଇଛନ୍ତି ।
ସାଂସଦମାନେ ଯେ କେବଳ ଅପରାଧରେ ଜଡ଼ିତ ତାହା ନୁହେଁ ବରଂ ସେମାନଙ୍କ ମଧ୍ୟରୁ ଅନେକଙ୍କ ସଂପତ୍ତି ୧୦୦ କୋଟି ଟଙ୍କାରୁ ଅଧିକ । ୫ ପ୍ରତିଶତ ସାଂସଦ ବିଲେନିୟର । ସର୍ବାଧିକ ସଂପତ୍ତି ଥିବା ସାଂସଦଙ୍କ ମଧ୍ୟରେ ନକୁଳ ନାଥ (କଂଗ୍ରେସ), ଡି.କେ ସୁରେଶ (କଂଗ୍ରେସ), କେ ରଘୁରାମ କୃଷ୍ଣ ରାଜୁ(ନିର୍ଦ୍ଦଳୀୟ) ପ୍ରମୁଖ ସାମିଲ । ଏଡିଆର ରିପୋର୍ଟ ଅନୁସାରେ ୭୩ ପ୍ରତିଶତ ସାଂସଦ ଗ୍ରାଜୁଏଟ୍ ହୋଇଥିବା ବେଳେ ବିଦାୟୀ ସାଂସଦଙ୍କ ମଧ୍ୟରେ ଅଛନ୍ତି ୧୫ ପ୍ରତିଶତ ମହିଳା ।
