ଭୁବନେଶ୍ୱର,୧/୯ :  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ ଅନୁଯାୟୀ (୫ଟି) ସଚିବ ଭି.କେ. ପାଣ୍ଡିଆନ୍ ଯାଜପୁର ଜିଲ୍ଲାର ବିଭିନ୍ନ ବିକାଶମୂଳକ କାର୍ଯ୍ୟର ଅଗ୍ରଗତି ଏବଂ ଜନସାଧାରଣଙ୍କ ଅଭିଯୋଗର ସମାଧାନ ପାଇଁ ଯାଜପୁର ଜିଲ୍ଲା ପରିଦର୍ଶନ କରିଥିଲେ । ସେ ଯାଜପୁରର ମା’ ବିରଜା ମନ୍ଦିର ପରିଦର୍ଶନ କରିଥିଲେ ଯେଉଁଠାରେ ସେ ସେବାୟତ, ଟ୍ରଷ୍ଟି ସଦସ୍ୟ ଏବଂ ସାଧାରଣ ଜନତାଙ୍କ ସହ ଯୋଗାଯୋଗ କରିଥିଲେ । ସେ ମନ୍ଦିରର ବିକାଶ ତଥା ଭକ୍ତମାନଙ୍କ ପାଇଁ ଉନ୍ନତ ସୁବିଧା ଯୋଗାଇବା ପାଇଁ ଚାଲିଥିବା ପ୍ରକଳ୍ପର ଅଗ୍ରଗତିର ସମୀକ୍ଷା କରିଥିଲେ ।

ପରେ, ସେ ନିକଟସ୍ଥ ମିଶନ୍ ଶକ୍ତି କାଫେ ପରିଦର୍ଶନ କରି ସେମାନଙ୍କ ପଦକ୍ଷେପକୁ ପ୍ରଶଂସା କରିଥିଲେ । ସେ ମିଶନ ଶକ୍ତି ଜିଲ୍ଲା ଫେଡେରେସନ୍ କାର୍ଯ୍ୟାଳୟ ପରିଦର୍ଶନ କରି ସଦସ୍ୟମାନଙ୍କ ସହ ଯୋଗାଯୋଗ କରିଥିଲେ। ସେ କହିଛନ୍ତି ଯେ, ମହିଳା ସଶକ୍ତିକରଣ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ପ୍ରାଥମିକତା ରହିଛି ଏବଂ ସରକାରଙ୍କ ସମସ୍ତ ସମର୍ଥନକୁ ନିଶ୍ଚିତ କରିଛନ୍ତି। ପରେ ଶ୍ରୀ ପାଣ୍ଡିଆନ୍ ଯାଜପୁରରେ ଚାଲିଥିବା ମେଡିକାଲ୍ କଲେଜ ପ୍ରୋଜେକ୍ଟ ସାଇଟ୍ ପରିଦର୍ଶନ କରିଥିଲେ । କାର୍ଯ୍ୟସୂଚୀ ଅନୁଯାୟୀ ଏହି ପ୍ରକଳ୍ପ ଅଗ୍ରଗତି କରୁଛି ଏବଂ ଆସନ୍ତା ଶିକ୍ଷାବର୍ଷରେ କାର୍ଯ୍ୟକ୍ଷମ ହେବ। ଜାତୀୟ ଚିକିତ୍ସା ଆୟୋଗ (NMC)ର ଯାଞ୍ଚ ପାଇଁ ଏକାଡେମିକ୍ ବ୍ଲକ୍ ଖୁବଶୀଘ୍ର ପ୍ରସ୍ତୁତ ହେବ ବୋଲି କହିଛନ୍ତି।

ଏହାପରେ ଶ୍ରୀ ପାଣ୍ଡିଆନ୍ ୨୮୭କୋଟି ଟଙ୍କା ବ୍ୟୟରେ ନିର୍ମାଣଧୀନ ମେଗା ଲିଫ୍ଟ ଜଳସେଚନ ପ୍ରକଳ୍ପ ଅଗ୍ରଗତିର ସମୀକ୍ଷା ମଧ୍ୟ କରିଛନ୍ତି। ୨୦୨୩ ସୁଦ୍ଧା ଏହି ପ୍ରକଳ୍ପ ସମାପ୍ତ ହେବ ବୋଲି କୁହାଯାଇଛି। ସେ ସମ୍ପୃକ୍ତ ଅଧିକାରୀମାନଙ୍କୁ ପ୍ରକଳ୍ପ ସମୟସୀମା ପାଳନ କରିବାକୁ ନିଶ୍ଚିତ କରିବାକୁ କହିଥିଲେ।

ଦିନ ସମୟରେ ସେ କୋରେଇ, ବରୀ ଏବଂ ସୁକିନ୍ଦାଠାରେ ହୋଇଥିବା ଜନ ଅଭିଯୋଗ ସଭାରେ ଭାଗ ନେଇଥିଲେ | ସେ ସେମାନଙ୍କ ଅଭିଯୋଗ ସମ୍ପର୍କରେ ଜନସାଧାରଣଙ୍କ ସହ କଥାବାର୍ତ୍ତା କରିଥିଲେ। ସେ କହିଛନ୍ତି ଯେ, ନାଗରିକ ଅଭିଯୋଗ ଉପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସର୍ବାଧିକ ପ୍ରାଥମିକତା ଦେଇଛନ୍ତି ଏବଂ ଦାଖଲ ହୋଇଥିବା ଆବେଦନଗୁଡ଼ିକର ଶୀଘ୍ର ସମାଧାନ କରିବାକୁ ନିଶ୍ଚିତ କରିଛନ୍ତି।