ପୁଣେ: ମହାରାଷ୍ଟ୍ର କ୍ରିକେଟ ଆସୋସିଏନ ଷ୍ଟାଡିୟମରେ ଖେଳାଯାଇଥିବା ବିଶ୍ବକପର ୪୩ ତମ ମ୍ୟାଚରେ ବିଜୟୀ ହୋଇଛି ଅଷ୍ଟ୍ରେଲିଆ । ବାଂଲାଦେଶକୁ ୮ ଓ୍ବିକେଟରେ ମାତ ଦେଇଛି ଅଷ୍ଟ୍ରେଲିଆ । ଏହି ଦୁଇ ଟିମ୍ ଶେଷ ଲିଗ ମ୍ୟାଚରେ ଦମଦାର ପ୍ରଦର୍ଶନ କରିଛନ୍ତି । ଆଜିର ମ୍ୟାଚ୍ରେ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲା ଅଷ୍ଟ୍ରେଲିଆ । ପ୍ରଥମେ ବ୍ୟାଟିଂ ପାଇଁ ଆସିଥିବା ବାଂଲାଦେଶ ଟିମ୍ ନିର୍ଦ୍ଧାରିତ ଓଭରରେ ୮ ଓ୍ବିକେଟ ହରାଇ ୩୦୬ ରନ୍ ସଂଗ୍ରହ କରିଥିଲା ।
ଆଜିର ମ୍ୟାଚ୍ରେ ମିଚେଲ ମାର୍ଶଙ୍କ ଅପରାଜିତ ୧୭୭ ରନ୍ ବଳରେ ଅଷ୍ଟ୍ରଲିଆ ବଡ଼ ଲକ୍ଷ୍ୟ ଅତି ସହଜରେ ହାସଲ କରିନେଇଛି । ୧୩୨ ବଲରେ ୧୭ ଚୌକା ଏବଂ ୯ ଛକା ମାରି ସେ ଏହି ରନ କରିଛନ୍ତି । ସେହିଭଳି ଷ୍ଟିଭ ସ୍ମିଥ ମଧ୍ୟ ଅପରାଜିତ ୬୩ ରନ୍ କରିଛନ୍ତି । ଡେଭିଡ ଓ୍ବାର୍ଣ୍ଣର ୫୩ ରନ୍ କରିଥିବା ବେଳେ ଟ୍ରାଭିସ ହେଡ ୧୦ ରନ୍ରେ ପାଭିଲିୟନ୍ ଫେରିଥିଲେ ।
ବାଂଲାଦେଶ ଟିମ୍ ପକ୍ଷରୁ ତୋହିଦ ହୃଦୟ ସର୍ବାଧିକ ୭୪ ରନ୍ କରିଥିଲେ । ସେହିଭଳି ଲିଟନ ଦାସ ଏବଂ ତାନଜିଦ ହାସନ ୩୬ ରନ୍ ଲେଖାଏଁ ସ୍କୋର କରିଥିଲେ । କ୍ୟାପ୍ଟେନ ଶାନ୍ତୋ ୪୫ ରନ୍ କରିଥିବା ବେଳେ ମହମଦୁଲ୍ଲା ୩୨ ରନ୍ କରିଥିଲେ । ବ୍ୟାଟରଙ୍କ ଉପଯୋଗୀ ବ୍ୟାଟିଂ ବଳରେ ଦଳ ୩୦୬ ରନ୍ କରିଥିଲା । କିନ୍ତୁ ଏହି ବିଶାଳ ଲକ୍ଷ୍ୟକୁ ୮ ଓ୍ବିକେଟ ବାକି ଥାଇ ହାସଲ କରିନେଇଛି ଅଷ୍ଟ୍ରେଲିଆ ।
ଆଜିର ମ୍ୟାଚ୍ରେ ଅଷ୍ଟ୍ରେଲିଆର ଆଦାମ ଜାମ୍ପା ଏବଂ ଏବୋଟ୍ଟ ଦୁଇଟି ଲେଖାଏଁ ଓ୍ବିକେଟ ଅକ୍ତିଆର କରିଥିବା ବେଳେ ଷ୍ଟୋଇନିସ ଗୋଟିଏ ଓ୍ବିକେଟ ନେଇଛନ୍ତି । ହେଲେ ଶାନ୍ତୋ ଏବଂ ନାସୁମ ଅହମ୍ମଦ ରନ୍ଆଉଟ ହୋଇ ପାଭିଲିୟନ୍ ଫେରିଥିଲେ। ସେପଟେ ବାଂଲାଦେଶ ପକ୍ଷରୁ ତାସକିନ୍ ଅହମ୍ମଦ ଏବଂ ମୁସ୍ତାଫିଜର ରହମାନ ଗୋଟିଏ ଲେଖାଏଁ ଓକ୍ବେଟ ନେଇଥିବା ବେଳେ ଅନ୍ୟ ବୋଲର ଫ୍ଲଫ ମାରିଛନ୍ତି । ଏହା ସହ ଅଷ୍ଟ୍ରେଲିଆ ଟିମ୍ ୪୪.୪ ଓଭରରେ ଦୁଇ ଓ୍ବିକେଟ ବିନିମୟରେ ଲକ୍ଷ୍ୟ ହାସଲ କରିନେଇଛି ।
