ୱାଶିଂଟନ୍, ୧୦/୦୨: ତାଇୱାନକୁ ନିଜର ବୋଲି ଦାବି କରୁଥିବା ଡ୍ରାଗନ୍ ପୁଣି ନାଲି ଆଖି ଦେଖାଇଛି । ଆମେରିକା ଓ ଜାପାନକୁ ଧମକାଇଛି ଚୀନ୍ । କହିଛି, ବହୁ ମୂଲ୍ୟ ଦେବାକୁ ପଡ଼ିବ । ଚୀନ୍ କହିଛି, ତାଇୱାନ ଏକକୀକରଣରେ ବାଧା ଦେଉଥିବା ଦେଶକୁ ବହୁ ମୂଲ୍ୟ ଦେବାକୁ ପଡ଼ିବ ।

ନିକଟରେ ଆମେରିକା ଓ ଜାପାନ ଏକ ସୈନ୍ୟ ଅଭ୍ୟାସ କରିଥିଲେ । ଯେଉଁଥିରେ ତାଇୱାନ୍ ଉପରେ ଚୀନର ଆକ୍ରମଣର ଡେମୋ ଦେଖାଇଥିଲା ଆମେରିକା । ଜାପାନ ମିଡିଆ କହିଥିଲା, ୱାଶିଂଟନ୍ ଓ ଟୋକିଓ ଚଳିତ ବର୍ଷର କିନ୍ ଏଜ୍ ଅଭ୍ୟାସରେ ପ୍ରଥମଥର ଲାଗି ବେଜିଂକୁ କାଳ୍ପନିକ ଶତ୍ରୁ ରୂପେ ନାମିତ କରିଖିଲେ । ରିପୋର୍ଟ ଅନୁସାରେ, ଏହି ବର୍ଷ ଅଭ୍ୟାସ ତାଇୱାନ୍ ଉପରେ ଚୀନର ଆକ୍ରମଣ ଉପରେ କେନ୍ଦ୍ରିତ ଥିଲା ।

ଏହା ଉପରେ ଟୋକିଓ ସ୍ଥିତ ଚୀନ ଦୂତାବାସ ଏକ ଲିଖିତ ବୟାନ ଜାରି କରି ଚେତାବନୀ ଜାରି କରିଛି । ଡ୍ରାଗନ୍ କହିଛି, ଯଦି କେହି ଚୀନର ଆଭ୍ୟନ୍ତରୀଣ ମାମଲାରେ ହସ୍ତକ୍ଷେପ କରିବ ଏବଂ ଚୀନ ପୁଣି ଥରେ ମିଶିବା ଉପରେ ପ୍ରତିବନ୍ଧକ ସୃଷ୍ଟି କରିବ ତ ତାହାକୁ କାଳ୍ପନିକ ଶତ୍ରୁ କୁହାଯିବ ନାହିଁ । ବରଂ ସେମାନଙ୍କୁ ବହୁ ମୂଲ୍ୟ ଦେବାକୁ ପଡ଼ିବ ।

ୟୁଏସ୍ ଇଣ୍ଡୋ ପେସିଫିକ୍ କମାଣ୍ଡ ଅନୁସାରେ, ଅଷ୍ଟ୍ରେଲିଆ ରକ୍ଷା ବଳ ମଧ୍ୟ ୮ ଦିବସୀୟ ଅଭ୍ୟାସରେ ସାମିଲ୍ ହୋଇଥିଲା । ଯାହାକି ଗୁରୁବାର ଶେଷ ହୋଇଛି । ରିପୋର୍ଟରେ କୁହା ଯାଇଛି, ଅଭ୍ୟାସରେ ପ୍ରକୃତ ଓ ଅପରିବର୍ତ୍ତିତ ମାନଚିତ୍ରର ବ୍ୟବହାର କରାଯାଇଛି । ବେଜିଂ କହିଛି, ମିଡିଆ ରିପୋର୍ଟ ପରେ ଟୋକିଓକୁ ଗମ୍ଭୀର ଚିନ୍ତା ବ୍ୟକ୍ତ କରାଯାଇଛି ।

ଆରମ୍ଭରୁ ହିଁ ଚୀନ୍, ତାଇୱାନକୁ ନିଜର ଅଞ୍ଚଳ ବୋଲି ଦାବି କରି ଆସୁଛି । ଏପରିକି ତାଇୱାନକୁ ବଳପୂର୍ବକ କବଜା କରିବାକୁ ଡ୍ରାଗନ୍ ଧମକ ଦେଇ ଆସୁଛି । ତେବେ ତାଇୱାନ୍ ଉପରେ ଚୀନ୍ କେବେ ବି କବଜା କରି ପାରି ନାହିଁ । ଅଧିକାଂଶ ଦେଶ ଭଳି ତାଇୱାନକୁ ଆମେରିକା ଓ ଜାପାନ ସ୍ୱତନ୍ତ୍ର ଦେଶ ମାନନ୍ତି ନାହିଁ । କିନ୍ତୁ ତାଇୱାନର ଭୌଗଳିକ ସ୍ଥିତିରେ ପରିବର୍ତ୍ତନକୁ ବିରୋଧ କରି ଆସୁଛନ୍ତି ।