ରାଇପୁର: ମହାଦେବ ବେଟିଂ ଆପ୍ ମାମଲାକୁ ନେଇ ରାଜନୀତି ସରଗରମ ହେବାରେ ଲାଗିଛି । ଛତିଶଗଡ଼ ମୁଖ୍ୟମନ୍ତ୍ରୀ ଭୁପେଶ ବଘେଲଙ୍କୁ ଏହି ମାମଲାର ମାଷ୍ଟର ମାଇଣ୍ଡ ବୋଲି ବିଜେପି ଅଭିଯୋଗ କରୁଛି । କିନ୍ତୁ ଏସବୁ ଭିତରେ ମହାଦେବ ବେଟିଂ ଆପ ମାମଲାରେ ଛତିଶଗଡ଼ ସରକାର ଅଧିକ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି ବୋଲି କହିଛନ୍ତି ଭୁପେଶ ବଘେଲ । ଏହି ମାମଲାରେ ଛତିଶଗଡ଼ରେ ୯୦ଟି ଏଫଆଇର ହୋଇଥିବା ବେଳେ ୪୫୦ ଜଣଙ୍କୁ ଗିରଫ କରାଯାଇଛି। ଏହା ସହ ଅନ୍ୟ ଅଭିଯୁକ୍ତଙ୍କ ବିରୁଦ୍ଧରେ ସର୍କୁଲାର ଜାରି ହୋଇଛି ବୋଲି ବଘେଲ କହିଛନ୍ତି ।
ଗିରଫ ଅଭିଯୁକ୍ତଙ୍କ ପାଖରୁ ୧୬ କୋଟି ଟଙ୍କା ସମେତ ଲ୍ୟାପଟପ ଏବଂ ମୋବାଇଲ୍ ଆଦି ଜବତ ହୋଇଛି । ଏହି ମାମଲାରେ ୨୦୨୨ରୁ କାର୍ଯ୍ୟାନୁଷ୍ଠାନ ଜାରି ରହିଛି । ଛତିଶଗଡ଼ ବ୍ୟତୀତ ମହାରାଷ୍ଟ୍ର, ଗୋଆ ଏବଂ ଓଡିଶାରେ ମଧ୍ୟ ଅଭିଯୁକ୍ତଙ୍କୁ ଧରିବାକୁ ପ୍ରୟାସ କରାଯାଉଛି ବୋଲି ବଘେଲ କହିଛନ୍ତି । ମହାଦେବ ଆପ୍ କେସ୍ରେ କିଙ୍ଗପିନଙ୍କ ସହ ବଘେଲଙ୍କ ସଲାସୁତୁରା ଥିବା ନେଇ ବିଜେପି ସରକାରଙ୍କ ଅଭିଯୋଗ ଉପରେ ବଘେଲ ପାଲଟା ଆକ୍ରମଣ କରିଛନ୍ତି ।
ଲୁକଆଉଟ୍ ସର୍କୁଲାର ପରେ ବି କେନ୍ଦ୍ର ସରକାର କାହିଁକି ସୌରଭ ଚନ୍ଦ୍ରକାର ଏବଂ ରବି ଉପ୍ପଲଙ୍କୁ ଗିରଫ କରୁନାହାନ୍ତି ବୋଲି ସେ ପ୍ରଶ୍ନ କରିଛନ୍ତି । ଏହାର ଅର୍ଥ ସରକାର କଣ ସେମାନଙ୍କ ସହ ମିଳିମିଶି କାମ କରୁଛନ୍ତି କି ବୋଲି ପାଲଟା ପ୍ରଶ୍ନ କରିଛନ୍ତି ମୁଖ୍ୟମନ୍ତ୍ରୀ ବଘେଲ । ଏହା ପୂର୍ବରୁ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ମହାଦେବ ବେଟିଂ ଆପ ମାମଲାରେ ବଘେଲଙ୍କ ସଂପୃକ୍ତି ଥିବା ନେଇ ଅଭିଯୋଗ କରିଥିଲେ ।
ମୁଖ୍ୟମନ୍ତ୍ରୀ ବଘେଲ ମୁଁହ ଲୁଚାଉଛନ୍ତି ବୋଲି ଅନୁରାଗ ଠାକୁର ଅଭିଯୋଗ କରିଥିଲେ । ଦିଲ୍ଲୀ ମଦ ନୀତି ଦୁର୍ନୀତି ମାମଲାରେ ଯେଉଁମାନେ ସାମିଲ ଥିଲେ ସେମାନେ ଗିରଫ ହେଉଛନ୍ତି । ତେଣୁ ମହାଦେବ ବେଟିଂ ଆପ୍ ମାମଲାରେ ଯେଉଁମାନେ ସାମିଲ ଥିବେ ସେମାନଙ୍କୁ ଛଡ଼ାଯିବ ନାହିଁ ବୋଲି ଅନୁରାଗ ଠାକୁର କହିଥିଲେ ।
