ଭୁବନଶ୍ବେର,୨୮/୧୧ : କୋରାପୁଟ ଜିଲ୍ଲା ବୈପାରୀଗୁଡ଼ା ଥାନା ଆଇଆଇସି ସୁଶାନ୍ତ ଶତପଥୀ ଗିରଫ । ଲକ୍ଷଲକ୍ଷ ଟଙ୍କା ଜବତ ପରେ ଗିରଫ କରିଛି ଭିଜିଲାନ୍ସ । ଆଇଆଇସିଙ୍କଠାରୁ ମିଳିଛି ୩୭ଲକ୍ଷ ୨୭ହଜାର ଟଙ୍କା । ଆଇଆଇସିଙ୍କ ଘର, ଅଫିସରେ ଚଢଉ କରିଥିଲା ଭିଜିଲାନ୍ସ । ବସରେ ଟଙ୍କା ନେଇ ଗଲାବେଳେ ଧରାପଡ଼ିଥିଲେ। ସୁଶାନ୍ତଙ୍କ ସମ୍ପତ୍ତିର ଖୋଳତାଡ଼ କରୁଛି ଭିଜିଲାନ୍ସ ।
ଭିଜିଲାନ୍ସ କାର୍ଯ୍ୟାଳୟରୁ ମିଳିଥିବା ସୂଚନା ମୁତାବକ, ଗତ କିଛିଦିନ ହେବ ବିଭିନ୍ନ ଲୋକଙ୍କଠାରୁ ଧମକ ଚମକ ଦେଇ ଟଙ୍କା ଆଦାୟ କରୁଥିଲେ ଶ୍ରୀ ଶତପଥୀ । ଏହି ଟଙ୍କା ସେ ଏତେ ଚତୁରତାର ସହ ନେଉଥିଲେ ଯେ, ତାଙ୍କୁ ଧରିବା ଭିଜିଲାନ୍ସ ପାଇଁ ସହଜ ହୋଇ ନ ଥିଲା । ଗତ ସପ୍ତାହରେ ପାଖାପାଖି ୫ ଲକ୍ଷ ଟଙ୍କା ଉଠାଇଥିଲେ । ଉକ୍ତ ଟଙ୍କାରୁ ୨ ଲକ୍ଷ ୭୦ ହଜାର ଟଙ୍କା ଧରି ଶ୍ରୀ ଶତପଥୀ ଏକ ବସ୍ରେ କଟକ ଆସୁଥିବା ବେଳେ ଚଢ଼ଉ କରିଥିଲା ଜୟପୁର ଭିଜିଲାନ୍ସର ଏକ ସ୍ୱତନ୍ତ୍ର ଟିମ୍ । ଉକ୍ତ ବସ୍ରେ ତାଙ୍କଠାରୁ ଉକ୍ତ ନଗଦ ଟଙ୍କା ଜବତ ହୋଇଥିଲା । ଏହାପରେ ଭିଜିଲାନ୍ସ ଟିମ୍ ତାଙ୍କୁ ଧରି ପଚରାଉଚରା କରିବା ସମୟରେ ଉକ୍ତ ଟଙ୍କା କାହାର, ସେ ସମ୍ପର୍କରେ କୌଣସି ସନ୍ତୋଷଜନକ ଉତ୍ତର ଦେଇ ପାରି ନ ଥିଲେ ସୁଶାନ୍ତ । ତା’ପରେ ସୁଶାନ୍ତଙ୍କ ବୈପାରୀଗୁଡ଼ା ଥାନା ଅଧୀନରେ ଥିବା ଅଫିସ୍ ରୁମ୍ରେ ଯାଞ୍ଚ୍ କରିଥିଲା ଭିଜିଲାନ୍ସ । ଏହି ସମୟରେ ଏକ ଡ୍ରରୁ ୧ଲକ୍ଷ ୮୦ ହଜାର ଟଙ୍କା ମିଳିଥିଲା । ପରେ ଥାନା ପାଖରେ ଥିବା ସରକାରୀ କ୍ୱାର୍ଟରରେ ମଧ୍ୟ ଚଢ଼ଉ କରାଯାଇଥିଲା । ସେଠାରୁ ୩ ଲକ୍ଷ ଟଙ୍କା ଜବତ ହୋଇଥିଲା । ଉକ୍ତ ଟଙ୍କା ବାବଦରେ ମଧ୍ୟ ଭିଜିଲାନ୍ସ ଅଧିକାରୀଙ୍କୁ ସେ କିଛି କହିପାରି ନଥିଲେ । ଫଳରେ ଭିଜିଲାନ୍ସ ଟିମ୍ ତାଙ୍କୁ ଅଟକ ରଖି ପଚରାଉଚରା କରୁଥିଲା ।