ନୂଆଦିଲ୍ଲୀ, ୨୮/୦୧: ଇସ୍ରାଏଲ୍-ହମାସ୍ ଯୁଦ୍ଧ ଲାଗି ରହିଥିବା ବେଳେ ଗାଜାପଟ୍ଟିରେ ଖାଦ୍ୟ ସହ ଔଷଧ ଓ ଅନ୍ୟ ଆବଶ୍ୟକୀୟ ସାମଗ୍ରୀର ଅଭାବ ଲାଗି ରହିଛି । ଏଭଳି ସ୍ଥିତିରେ ଆମେରିକା, ଅଷ୍ଟ୍ରେଲି ଓ କାନାଡ଼ା ପରେ ୬ ଗୋଟି ୟୁରୋପୀୟ ଦେଶ ଜାତି ସଂଘର ଏଜେନ୍ସିକୁ ଫଣ୍ଡିଂ ବନ୍ଦ କରି ଦେଇଛନ୍ତି ।

ଅଭିଯୋଗ ଅନୁସାରେ, ଜାତିସଂଘର ଏଜେନ୍ସି UNRWAର କର୍ମଚାରୀ ଅକ୍ଟୋବର ୭ରେ ଇସ୍ରାଏଲ୍ ଉପରେ ଆକ୍ରମଣ ପାଇଁ ହମାସକୁ ସହଯୋଗ କରିଥିଲେ । ଏଭଳି ଦାବି ପରେ ୬ ୟୁରୋପୀୟ ଦେଶ ସହାୟତା ଦେବା ବନ୍ଦ କରି ଦେଇଛନ୍ତି । ଇସ୍ରାଏଲ୍ UNRWAର କର୍ମଚାରୀଙ୍କ ବିରୋଧରେ ଏଭଳି ଅଭିଯୋଗ ଆଣିବା ପରେ ବ୍ରିଟେନ୍, ଜର୍ମାନୀ, ଇଟାଲୀ, ନେଦରଲାଣ୍ଡ, ସ୍ୱିଜରଲାଣ୍ଡ ଓ ଫିନଲାଣ୍ଡ ଫଣ୍ଡିଂ ବନ୍ଦ କରିଛନ୍ତି ।

UNRWAର କମିଶନର ଜେନରାଲ୍ ଫିଲିପ୍ ଲେଜାରିନି ସୋସିଆଲ୍ ମିଡିଆରେ ଲେଖିଛନ୍ତି, ଗାଜାରେ ଫିଲିସ୍ତିନୀଙ୍କୁ ଅତିରିକ୍ତ ସାମୁହିକ ସଜ୍ଜାର ଆବଶ୍ୟକତା ନାହିଁ । ଏହା ଆମ ସମସ୍ତଙ୍କ ଲାଗି କଳଙ୍କ । ଶୁକ୍ରବାର UNRWA ପକ୍ଷରୁ କୁହାଯାଇଥିଲା, ଆସିଥିବା ଅଭିଯୋଗ ଅନୁସାରେ କର୍ମଚାରୀଙ୍କ ବିରୋଧରେ ତଦନ୍ତ ଆରମ୍ଭ ହୋଇଛି । ଯେଉଁମାନଙ୍କ ନାଁରେ ଅଭିଯୋଗ ଆସିଛି, ସେମାନଙ୍କୁ ସେବାରୁ ବିରତ କରା ଯାଇଛି ।

ଅକ୍ଟୋବର ୭ରେ ଇସ୍ରାଏଲ୍ ଉପରେ ଅତର୍କିତ ଆକ୍ରମଣ କରିଥିଲେ ହମାସ୍ ଆତଙ୍କବାଦୀ । ଯେଉଁଥିରେ ୧୨୦୦ ଇସ୍ରାଏଲ୍ ନାଗରିକ ପ୍ରାଣ ହରାଇଥିଲେ । ୨୪୦ରୁ ଅଧିକ ଇସ୍ରାଏଲ୍ ନାଗରିକଙ୍କୁ ପଣବନ୍ଦୀ କରି ନେଇଥିଲା ହମାସ୍ । ସେବେଠାରୁ ଗାଜା ପଟ୍ଟି ଉପରେ ଆକ୍ରମଣ ଜାରି ରଖିଛି ଇସ୍ରାଏଲ୍ । ଯୁଦ୍ଧରେ ୨୬୦୦୦ରୁ ଅଧିକ ଫିଲିସ୍ତିନୀଙ୍କୁ ମୃତ୍ୟୁ ହେଲାଣି । ୨.୩ ମିଲିୟିନ୍ ଲୋକ ବାସ ଗୃହ ହରାଇଛନ୍ତି ।