ନୂଆଦିଲ୍ଲୀ ୦୬/୦୯: ଚଳିତ ମାସ ୧୭ ତାରିଖରେ ପ୍ରଧାନମନ୍ତ୍ରୀ ମୋଦି ନିଜର ୭୩ତମ ଜନ୍ମଦିନ ପାଳନ କରିବେ । ଦେଶ-ବିଦେଶରେ ମୋଦିଙ୍କ ଲୋକପ୍ରିୟତା ବଢୁଥିବାବେଳେ ଜଣେ ପ୍ରଶଂସକ  ତାଙ୍କର ୭,୨୦୦ ହୀରା ଖଚିତ ଏକ ଫଟୋ ପ୍ରସ୍ତୁତ  କରିଛନ୍ତି । ଗୁଜରାଟର ସୁରଟ ବାସିନ୍ଦା ବିପୁଲ ଜେପିୱାଲା ଏହି ଚିତ୍ରକୁ ମୋଦିଙ୍କୁ ଉପହାର ସ୍ୱରୂପ ପ୍ରଦାନ କରିବାକୁ ଚାହୁଁଛନ୍ତି । 

ଦୀର୍ଘ ସାଢ଼େ ୩ ମାସର ନିରନ୍ତର ପରିଶ୍ରମ ପରେ ସେ ଏହି ଚିତ୍ର ଶେଷ କରିଛନ୍ତି । ମୋଦିଙ୍କ ଚିତ୍ର ପ୍ରସ୍ତୁତି ଲାଗି ୩ ଭିନ୍ନ ଭିନ୍ନ ରଙ୍ଗ ଓ ୪ ଭିନ୍ନ ଭିନ୍ନ  ପ୍ରକାର ହୀରା ବ୍ୟବହାର କରାଯାଇଛି । ଏଗୁଡ଼ିକ ଆମେରିକୀୟ ହୀରା, ଯାହା ଅସଲି ହୀରା ଭଳି  ଦିଶୁଛି । ହୀରାଗୁଡ଼ିକୁ ଚିତ୍ରରେ ଲଗାଇବା ଲାଗି ଏକ ସ୍ୱତନ୍ତ୍ର ପ୍ରକାର ଅଠା ପ୍ରୟୋଗ କରାଯାଇଛି । ହୀରାକୁ ଦୀର୍ଘ ସମୟ ପର୍ଯ୍ୟନ୍ତ ଲଗାଇ ରଖିବା ଲାଗି ସ୍ୱତନ୍ତ୍ର ପ୍ରକାର ବ୍ୟାକ୍‌ଗ୍ରାଉଣ୍ଡ ସିଟ୍‌ର ମଧ୍ୟ  ଉପଯୋଗ କରାଯାଇଛି । 

ବିପୁଲଙ୍କ କହିବା  ଅନୁସାରେ, ପ୍ରଧାନମନ୍ତ୍ରୀ ନିଜ ଜୀବନର ୭୨ ବର୍ଷ  ପୂରଣ କରିବାକୁ ଯାଉଛନ୍ତି । ତେଣୁ ଏହି ଚିତ୍ରରେ  ୭୨୦୦ ହୀରା ଖଚିତ କରାଯାଇଛି । ଏହି ଚିତ୍ର  ପ୍ରସ୍ତୁତିରେ କେତେ ଟଙ୍କା ଖର୍ଚ୍ଚ ହୋଇଛି, ତାହା ସେ ଖୁଲାସା   କରିନାହାନ୍ତି । ଅଦ୍ୟାବଧି ସେ ହୀରାରେ ମୋଦିଙ୍କର ୯ରୁ  ଅଧିକ ଚିତ୍ର ପ୍ରସ୍ତୁତ କରିଛନ୍ତି । ବିପୁଲ ପେସାରେ ଜଣେ  ଆର୍କିଟେକ୍ଟ ଇଞ୍ଜିନିୟର । ଅନେକ ଲୋକଙ୍କ ଘରେ ସେ  ଇଣ୍ଟିରିୟର ଡିଜାଇନର୍‌ ଭାବେ କାମ କରିଛନ୍ତି । କିନ୍ତୁ କିଛି  ଭିନ୍ନ କରିବାର ଇଚ୍ଛା ମନରେ ଜାଗ୍ରତ ହେବା ପରେ ସେ  ବିଭିନ୍ନ ପ୍ରକାର ଚିତ୍ର ପ୍ରସ୍ତୁତି ଆରମ୍ଭ କଲେ।