ଜେରୁସାଲେମ: ଗାଜାର ଅଲ ଶିଫା ହସ୍ବିଟାଲକୁ ତୁରନ୍ତ ଖାଲି କରିବାକୁ ନେଇ ଇ୍ରସ୍ରାଏଲ ସେନା ନିର୍ଦ୍ଦେଶ ଦେବା ପରେ ପରିସ୍ଥିତି ଅଣାୟତ୍ତ ହେବାରେ ଲାଗିଛି । ଗାଜାର ଏହି ବଡ଼ ହସ୍ପିଟାଲରୁ ରୋଗୀମାନେ ଖାଲି ପାଦରେ ବାହାରକୁ ଚାଲିଯାଉଥିବାର ଦେଖିବାକୁ ମିଳିଛି । ଅଲ ଶିଫା ହସ୍ପିଟାଲରେ ୨୦୦୦ ରୋଗୀଙ୍କ ସମେତ ଶତାଧିକ ଯୁଦ୍ଧ ପୀଡ଼ିତ ଆଶ୍ରୟ ନେଉଛନ୍ତି । ସବୁଠୁ ବଡ଼ କଥା ଏହି ହସ୍ପିଟାଲକୁ ଯୁଦ୍ଧାସ୍ତ୍ର ହବ ଭାବେ ବ୍ୟବହାର କରୁଛି ହମାସ ଆତଙ୍କବାଦୀ ସଂଗଠନ । ଆଉ ଏହାର ପ୍ରମାଣ ପାଇଥିଲା ଇସ୍ରାଏଲ ସେନା । ସେପଟେ ଇସ୍ରାଏଲ ସେନାର ନିର୍ଦ୍ଦେଶ ପରେ ପ୍ରାୟ ୪୫୦ ରୋଗୀ ହସ୍ପିଟାଲ ଛାଡ଼ିସାରିଛନ୍ତି ବୋଲି ଗାଜାର ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି ।
ନ୍ୟୁଜ ଏଜେନ୍ସି ଏଏଫପି ଅନୁସାରେ, ଅଲ ଶିଫା ହସ୍ପିଟାଲକୁ ଏକ ଘଣ୍ଟା ମଧ୍ୟରେ ଖାଲି କରିବାକୁ ନିର୍ଦ୍ଦେଶ ଦେଇଛି ଇସ୍ରାଏଲ ସେନା । ହେଲେ ଏବେ ମିଳିଥିବା ସୂଚନା ଅନୁସାରେ, ଇସ୍ରାଏଲ ସେନା ଏଭଳି କୌଣସି ନିର୍ଦ୍ଦେଶ ଦେଇନାହିଁ । ଇସ୍ରାଏଲ ସରକାରଙ୍କ ପକ୍ଷରୁ ଏଭଳି ଦାବିକୁ ଖଣ୍ଡନ କରାଯାଇଛି । ହେଲେ ଏଏଫପିରେ ପ୍ରକାଶିତ ଖବର ଅନୁସାରେ, ଅଲ ଶିଫା ହସ୍ପିଟାଲର ନିର୍ଦ୍ଦେଶକ ମହମ୍ମଦ ଅବୁ ସାଲମିୟାଙ୍କୁ ସମସ୍ତ ରୋଗୀ, ବାସହରାଙ୍କୁ ସୁରକ୍ଷିତ ଉଦ୍ଧାର କରିବାକୁ କୁହାଯାଇଛି ।
ଅନ୍ୟପଟେ ଜାତିସଂଘର ରିପୋର୍ଟ ଅନୁସାରେ ହସ୍ପିଟାଲରେ ୨୩୦୦ ରୋଗୀ, କର୍ମଚାରୀ ଏବଂ ବିସ୍ଥାପିତ ରହୁଛନ୍ତି । ଉଭୟ କେନ୍ଦ୍ରୀୟ ଏବଂ ଦକ୍ଷିଣ ଗାଜାରେ ଆକ୍ରମଣ ଜାରି ରଖିଥିବା ବେଳେ ଉତ୍ତର ଗାଜା ଛାଡ଼ିବାକୁ ଇସ୍ରାଏଲ କହୁଛି ବୋଲି ରିପୋର୍ଟ ପ୍ରକାଶ ପାଇଛି । ଅନ୍ୟ ଏକ ରିପୋର୍ଟ ଅନୁସାରେ, ଗାଜାରେ ୫୦୦୦ରୁ ଅଧିକ ଶିଶୁଙ୍କ ସହ ୧୨ ହଜାର ଲୋକଙ୍କ ଜୀବନ ଗଲାଣି । ଉତ୍ତର ଗାଜାରୁ ଦକ୍ଷିଣ ଗାଜାକୁ ଚାଲିଯାଇଥିବା ପାଲେଷ୍ଟାଇନ ନାଗରିକଙ୍କ ଅବସ୍ଥା ବେହାଲ ହୋଇପଡ଼ିଛି । ସେମାନଙ୍କ ପାଖରେ ସ୍ବଚ୍ଛ ପିଇବା ପାଣି ନାହିଁ । ନାଳ ନର୍ଦ୍ଦମା ପାଣିରେ ସେମାନେ ରହିବାକୁ ବାଧ୍ୟ ହେଉଛନ୍ତି ବୋଲି ଜାତିସଂଘର ପାଲେଷ୍ଟାଇନ୍ ଶରଣାର୍ଥୀ ଏଜେନ୍ସି ପକ୍ଷରୁ କୁହାଯାଇଛି ।
