ନୂଆଦିଲ୍ଲୀ ୦୬/୦୨: ୬୬ତମ ଗ୍ରାମି ଆୱାର୍ଡସ୍ରେ ଭାରତ ପାଇଁ ଗୌରବ ଆଣିଛନ୍ତି ପ୍ରଖ୍ୟାତ ଗାୟକ ଶଙ୍କର ମହାଦେବନ, ତବଲା ବାଦକ ଜାକିର ହୁସେନ ଓ ବଂଶୀ ବାଦକ ରାକେଶ ଚୌରାସିଆ । ଜାକିର ୩ ବିଭାଗରେ ଗ୍ରାମି ପୁରସ୍କାର ହାସଲ କରିଛନ୍ତି । ତାଙ୍କର ମ୍ୟୁଜିକ୍ ବ୍ୟାଣ୍ଡ୍ ‘ଶକ୍ତି’କୁ ଆଲ୍ବମ ‘ଦିସ୍ ମୋମେଣ୍ଟ୍’ ପାଇଁ ଶ୍ରେଷ୍ଠ ଗ୍ଲୋବାଲ୍ ମ୍ୟୁଜିକ୍ ଆଲ୍ବମ ବିଭାଗରେ ଗ୍ରାମି ପୁରସ୍କାର ମିଳିଛି । ଏହି ଆଲ୍ବମରେ ମୋଟ୍ ୮ଟି ଗୀତ ଅଛି । ଏହି ବ୍ୟାଣ୍ଡ୍ରେ ଶଙ୍କର ମହାଦେବନ, ଜାକିର ହୁସେନ, ଭି ସେଲ୍ଭାଗଣେଶ ଓ ଗଣେଶ ରାଜଗୋପାଲନ୍ଙ୍କ ଭଳି କଳାକାର ମିଳିତ ଭାବେ କାମ କରନ୍ତି । ରାକେଶ ଚୌରାସିଆ ୨ଟି ଗ୍ରାମି ହାତେଇଛନ୍ତି । ଏହିପରି ଭାବେ ୫ ଭାରତୀୟ କଳାକାର ଚଳିତ ବର୍ଷ ଗ୍ରାମି ବିଜେତା ହୋଇଛନ୍ତି ।
ଚଳିତ ଗ୍ରାମି ସମାରୋହରେ ଜାକିର ହୁସେନ ଓ ରାକେଶ ଚୌରାସିଆ ଗୀତ ‘ପଶ୍ତୋ’ ଓ ଆଲ୍ବମ ‘ଆଜ୍ ୱି ସ୍ପିକ୍’ ପାଇଁ ଯୁଗ୍ମ ଗ୍ରାମି ବିଜେତା ହୋଇଛନ୍ତି । ‘ପଶ୍ତୋ’ ହେଉଛି ‘ଆଜ୍ ୱି ସ୍ପକ୍’ ଆଲ୍ବମର ଗୀତ । ଶ୍ରେଷ୍ଠ ଗ୍ଲୋବାଲ୍ ମ୍ୟୁଜିକ୍ ପର୍ଫର୍ମାନ୍ସ ବିଭାଗରେ ଏହା ପୁରସ୍କୃତ ହୋଇଛି । ଏଥିରେ ଆମେରିକୀୟ ସଙ୍ଗୀତଜ୍ଞ ବେଲା ଫ୍ଲେକ୍, ଏଡ୍ଗାର ମେୟର ଅଛନ୍ତି । ମୋଦିଙ୍କ ଗୀତ ‘ଆବୁନ୍ଡାନ୍ସ ଇନ୍ ମିଲେଟ୍ସ’ ଏହି ବିଭାଗରେ ପ୍ରତିଯୋଗିତା କରୁଥିଲା । ‘ଆଜ୍ ୱି ସ୍ପିକ୍’ ମଧ୍ୟ ଶ୍ରେଷ୍ଠ କନ୍ଟେମ୍ପରାରି ଇନ୍ଷ୍ଟ୍ରୁମେଣ୍ଟାଲ ଆଲ୍ବମ ବିଭାଗରେ ଗ୍ରାମି ହାସଲ କରିଛି । ଅନ୍ତର୍ଜାତୀୟ ମଞ୍ଚରେ ଭାରତକୁ ଗୌରବାନ୍ୱିତ କରିଥିବା ଭାରତର ଏହି ପ୍ରତିଭାସମ୍ପନ୍ନ କଳାକାରମାନଙ୍କୁ ପ୍ରଧାନମନ୍ତ୍ରୀ ମୋଦି ଅଭିନନ୍ଦନ ଜଣାଇଛନ୍ତି ।
୧୯୭୩ ମସିହାରେ ପ୍ରଖ୍ୟାତ ଇଂରାଜୀ ଗିଟାର ବାଦକ ଜନ୍ ମ୍ୟାକ୍ଲାଫଲିନ୍, ଜାକିର ହୁସେନ, ଶଙ୍କର ମହାଦେବନ, ଭି ସେଲ୍ଭାଗଣେଶ ଓ ଗଣେଶ ରାଜଗୋପାଲନ୍ ଫ୍ୟୁଜନ୍ ବ୍ୟାଣ୍ଡ୍ ‘ଶକ୍ତି’ ଆରମ୍ଭ କରିଥିଲେ । ୧୯୭୭ ମସିହା ପରେ ଏହା ବିଶେଷ ସକ୍ରିୟ ନ ଥିଲା । ୧୯୯୭ ମସିହାରେ ଜନ୍ ମ୍ୟାକ୍ ଲାଫ୍ଲିନ୍ ପୁଣି ଥରେ ସମାନ ଅବଧାରଣା ସହିତ ‘ରିମେମ୍ବର ଶକ୍ତି’ ନାମରେ ବ୍ୟାଣ୍ଡ୍ ଗଠନ କଲେ । ୨୦୨୦ ମସିହାରେ ଏହି ବ୍ୟାଣ୍ଡ୍ ପୁଣି ଥରେ ସକ୍ରିୟ ହେଲା ଏବଂ ୪୬ ବର୍ଷ ପରେ ‘ଶକ୍ତି’ର ପ୍ରଥମ ଆଲ୍ବମ ‘ଦିସ୍ ମୋମେଣ୍ଟ୍’ ରିଲିଜ୍ ହେଲା ।