ୱାଶିଂଟନ,୦୧/୦୯: ଆମେରିକାର ୪ ରାଜ୍ୟରେ  ସାମୁଦ୍ରିକ ଝଡ ‘ଇଡାଲିଆ’ ତାଣ୍ଡବ ସୃଷ୍ଟି କରିଛି । ବୁଧବାର ଫ୍ଲୋରିଡାରେ ଏହା ଲ୍ୟାଣ୍ଡଫଲ କରିବା ପରେ ଗୁରୁବାର ଜର୍ଜିଆ ଦେଇ ନର୍ଥ କାରୋଲିନା ଓ ସାଉଥ୍‌ କାରୋଲିନା  ଦିଗକୁ ଅଗ୍ରସର ହୋଇଛି । 

ଲ୍ୟାଣ୍ଡଫଲ ସମୟରେ ଘଣ୍ଟା  ପ୍ରତି ଏହାର ବେଗ ୨୦୦ କି.ମି. ରହିଥିଲା । ଏହାର  ପ୍ରଭାବରେ ଫ୍ଲୋରିଡା ଓ ଜର୍ଜିଆରେ ୪ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି । ସେମାନେ ଅନ୍ଧାରରେ  ରହିଥିବା ବେଳେ ଅନେକ ଗଛ, ଘର, ବିଦ୍ୟୁତ ଖୁଣ୍ଟ  ଓ ଟେଲିଫୋନ ଟାୱାର କ୍ଷତିଗ୍ରସ୍ତ ହୋଇଛି । କେତେକ  ସ୍ଥାନରେ ବଡବଡ ଷ୍ଟୋର ଭାଙ୍ଗି ଯାଇଥିଲା ବେଳେ ଅନ୍ୟ କେତେକରେ ନିଆଁ ମଧ୍ୟ ଲାଗି ଯାଇଥିଲା । ଝଡକୁ ଦୃଷ୍ଟିରେ ରଖି ୯୦୦ ବିମାନ ଉଡାଣକୁ ବାତିଲ କରାଯାଇଛି ।  

ପାଣିପାଗ ବିଭାଗର ରେକର୍ଡ ଅନୁସାରେ ଗତ ୧୦୦ ବର୍ଷର  ଫ୍ଲୋରିଡା ଇତିହାସରେ ଏହା ସବୁଠାରୁ ଭୟାବହ ଝଡ ।  ଝଡକୁ ଦୃଷ୍ଟିରେ ରଖି ୪ଟି ରାଜ୍ୟରେ ଜରୁରି ପରିସ୍ଥିତି  ଜାରି କରାଯାଇଛି । ପ୍ରାୟ ୫୫ ହଜାର ସୈନିକଙ୍କୁ ରିଲିଫ  ଓ ଉଦ୍ଧାର କାର୍ଯ୍ୟରେ ନିୟୋଜିତ କରାଯାଇଛି ।