ନୂଆଦିଲ୍ଲୀ,୦୮/୦୨: ଘରୋଇ ଭାରତ ଓ ଇଂଲଣ୍ଡ ମଧ୍ୟରେ ଚାଲିଥିବା ୫ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପରବର୍ତ୍ତୀ ୩ଟି ମ୍ୟାଚ୍ ପାଇଁ ଖୁବ୍ ଶୀଘ୍ର ଭାରତୀୟ ଦଳ ଘୋଷଣା କରାଯିବ । ବ୍ୟକ୍ତିଗତ କାରଣରୁ ପ୍ରଥମ ୨ଟି ଟେଷ୍ଟ ଖେଳିନଥିବା ବିରାଟ କୋହଲି ପୁଣି ଅନୁପସ୍ଥିତ ରହିବା ନେଇ ଆଶଙ୍କା ଦେଖା ଦେଇଛି । କୋହଲିଙ୍କ ବିଷୟରେ ବିସିସିଆଇ ଓ ଟିମ ମ୍ୟାନେଜମେଣ୍ଟ ଏପର୍ଯ୍ୟନ୍ତ ନିରବ ରହିଛନ୍ତି । ସେ ତୃତୀୟ ଓ ଚତୁର୍ଥ ଟେଷ୍ଟରେ ମଧ୍ୟ ଅନୁପସ୍ଥିତ ରହିବେ ବୋଲି ବିଶେଷ ସୂତ୍ରରୁ ଜଣା ପଡ଼ିଛି । ଏପରିକି ପଞ୍ଚମ ଟେଷ୍ଟ ଖେଳିବା ନେଇ ମଧ୍ୟ ସନ୍ଦେହ ରହିଛି । ୧୫ତାରିଖରୁ ରାଜକୋଟ୍ରେ ତୃତୀୟ ଟେଷ୍ଟ ଆରମ୍ଭ ହେବ ।
ଦ୍ୱିତୀୟ ଟେଷ୍ଟ ପରେ ଉଭୟ ଦଳଙ୍କୁ ୭ ଦିନର ବିଶ୍ରାମ ସମୟ ମିଳିଛି । ଇଂଲଣ୍ଡ ଦଳ ଆବୁଧାବିରେ ଛୁଟି କଟାଉଥିବାବେଳେ ଭରାତୀୟ ଦଳର ସମସ୍ତ ଖେଳାଳି ନିଜ ନିଜ ଘରକୁ ଫେରିଯାଇଛନ୍ତି । ୧୨ତାରିଖରେ ଉଭୟ ଦଳ ରାଜକୋଟ୍ରେ ପହଞ୍ଚି ଅଭ୍ୟାସ ଆରମ୍ଭ କରିବାର କାର୍ଯ୍ୟକ୍ରମ ରହିଛି ।
ସୂଚନାଯୋଗ୍ୟ, ୨୫ତାରିଖରୁ ହାଇଦ୍ରାବାଦରେ ଟେଷ୍ଟ ସିରିଜ ଆରମ୍ଭ ହୋଇଥିଲା । କୋହଲି ପୂର୍ବରୁ ଦଳରେ ରହିଥିଲେ । ମାତ୍ର ୨୨ତାରିଖରେ ବିସିସିଆଇ କୋହଲିଙ୍କ ଅନୁପସ୍ଥିତି ବିଷୟରେ ଘୋଷଣା କରିଥିଲା । ବ୍ୟକ୍ତିଗତ କାରଣରୁ ସେ ପ୍ରଥମ ୨ଟି ଟେଷ୍ଟ ଖେଳିପାରୁନଥିବା ବିସିସିଆଇ ଜଣାଇଥିଲା । ସେହି ଦିନ ସକାଳେ କୋହଲି ହାଇଦ୍ରାବାଦରେ ପହଞ୍ଚି ଅଧିନାୟକ ରୋହିତ, ମୁଖ୍ୟ କୋଚ୍ ଦ୍ରାବିଡ ଓ ଟିମ ମ୍ୟାନେଜମେଣ୍ଟ ସହ ଆଲୋଚନା କରି ପୁନର୍ବାର ଫେରିଯାଇଥିଲେ । ଏପର୍ଯ୍ୟନ୍ତ କୋହଲିଙ୍କ ବିଷୟରେ କିଛି ଖବର ମିଳିପାରି ନାହିଁ ।
ଫିଟ୍ ହେଉଛନ୍ତି ରାହୁଲ, ଜାଡେଜା
ପ୍ରଥମ ଟେଷ୍ଟ ଅବସରରେ ଆହତ ହୋଇଥିବା କେଏଲ ରାହୁଲ ଓ ରବିନ୍ଦ୍ର ଜାଡେଜାଙ୍କ ଫିଟ୍ନେସ୍ରେ ଉନ୍ନତି ହେଉଥିବା ଖବର ମିଳିଛି । ତୃତୀୟ ଟେଷ୍ଟ ବେଳକୁ ଉଭୟ ଫିଟ୍ ହୋଇ ଦଳକୁ ଫେରିବେ ବୋଲି ଅନୁମାନ କରାଯାଉଛି । ଅବଶ୍ୟ ଏପର୍ଯ୍ୟନ୍ତ ଉଭୟଙ୍କୁ ଏନ୍ସିଏ(ଜାତୀୟ କ୍ରିକେଟ୍ ଏକାଡେମୀ) ପକ୍ଷରୁ ଫିଟ୍ନେସ ପ୍ରମାଣ ପତ୍ର ପ୍ରଦାନ କରାଯାଇନାହିଁ ।
ସିରାଜ ଫେରିବା ନିଶ୍ଚିତ
ଦ୍ୱିତୀୟ ଟେଷ୍ଟରୁ ବିଶ୍ରାମ ନେଇଥିବା ପେସ୍ ବୋଲର ମହମ୍ମଦ ସିରାଜ ପ୍ରତ୍ୟାବର୍ତ୍ତନ କରିବା ନିଶ୍ଚିତ । ଏପରିକି ସେ ତୃତୀୟ ଟେଷ୍ଟ ଖେଳିବେ । ସିରାଜ ପ୍ରଥମ ଟେଷ୍ଟ ଖେଳିଥିଲେ । ତାଙ୍କ ନିକଟରେ କୌଣସି ଆହତ ସମସ୍ୟା ନଥିଲା । କିନ୍ତୁ ମାତ୍ରାଧିକ କାର୍ଯ୍ୟଭାରକୁ ନେଇ ତାଙ୍କୁ ଦ୍ୱିତୀୟ ଟେଷ୍ଟରୁ ବିଶ୍ରାମ ଦିଆଯାଇଥିଲା ।