ଜେରୁଜେଲମ୍, ୨୯/୦୨: ଗାଜାରେ ପୁଣି ନରସଂହାର । ଗୁରୁବାର ଗାଜାର ଏକ ଜନଗହଳିପୂର୍ଣ୍ଣ ସ୍ଥାନରେ ଆଖିବୁଜା ଗୁଳିମାଡ଼ କରିଛି ଇସ୍ରାଏଲ୍ ସେନା । ଇସ୍ରାଏଲର ଗୁଳିମାଡ଼ରେ ଆଖି ବୁଜିଛନ୍ତି ପ୍ରାୟ ୧୦୪ ଜଣ ଫିଲିସ୍ତିନ୍ । ୭୦୦ରୁ ଅଧିକ ଫିଲିସ୍ତିନ୍ ନାଗରିକ ଆହତ ହୋଇଥିବା ଦାବି କରା ଯାଉଛି ।
ଇସ୍ରାଏଲ୍ ମଧ୍ୟ ଜନଗହଳି ଉପରେ ଫାୟାରିଂ କରିଥିବା ମାନିଛି । ଆଇଡିଏଫ୍ ପକ୍ଷରୁ କୁହାଯାଇଛି, ଜନଗହଳିକୁ ଯବାନ ବିପଦ ଭାବି ଗୁଳି କରିଥିଲେ । ମାନବୀୟ ସହାୟତା ପ୍ରଦାନ କରାଯାଉଥିବା ବେଳେ ଇସ୍ରାଏଲ୍ ସେନା ଗୁଳିମାଡ଼ କରିବାକୁ ଗାଜା ଜୋରଦାର ବିରୋଧ କରିଛି । ଏହାକୁ ନରସଂହାର ବୋଲି କହିଛି ଗାଜା ।
ଏଏଫପି ଅନୁସାରେ, ପଶ୍ଚିମ ନାବୁଲସିକୁ ଟ୍ରକ୍ ଯୋଗେ ସହାୟତା ସହ ଖାଦ୍ୟ ଆସିଥିଲା । ଗାଜାର ଶହ ଶହ ଭୋକିଲା ଭୋକିଲା ଖାଦ୍ୟ ଓ ସହାୟତା ପାଇଁ ଧାଡ଼ିରେ ଛିଡ଼ା ହୋଇଥିଲେ । ସହାୟତା ଟ୍ରକକୁ ଲାଗି ଆର୍ମିର ଟ୍ୟାଙ୍କ୍ ବି ଥିଲା । ସହାୟତା ପାଇଁ ଭିଡ଼ର ଠେଲାପେଲା ଆର୍ମିର ଟ୍ୟାଙ୍କ ଆଡ଼କୁ ଚାଲି ଯାଇଥିଲେ । ଟ୍ୟାଙ୍କ ଓଡ଼କୁ ଭିଡ଼ ବଢ଼ିବା ଦେଖି ସେନା ଫାୟାରିଂ କରିଥିଲା ।
ତେବେ ଗୁଳିମାଡ଼ ପରେ ଇସ୍ରାଏଲ୍ ପ୍ରାଥମିକ ବୟାନ ଜାରି କରି କହିଥିଲା, ସହାୟତା ଟ୍ରକରୁ ଲୋକେ ଚୋରି କରିବା ଆରମ୍ଭ କରିଥିଲେ । ଲୋକଙ୍କ ମଧ୍ୟରେ ଠେଲାପେଲାରେ ଏକାଧିକ ତଳେ ପଡ଼ି ଆହତ ହୋଇଛନ୍ତି । ଏହା ପରେ ସେନା ବୟାନ ବଦଳାଇ କହିଛି, ଭିଡ଼କୁ ବିପଦ ଭାବି ଗୁଳିମାଡ଼ କରାଯାଇଛି । ଆହତଙ୍କୁ ଗାଜାର ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି ।
ଅକ୍ଟୋବର ୭ରୁ ଆରମ୍ଭ ହୋଇଥିବା ଯୁଦ୍ଧକୁ ୫ ମାସ ପୂରିଥିବା ବେଳେ ଗାଜାରେ ଦେଖା ଦେଇଛି ମାନବୀୟ ସଂକଟ । ହମାସ୍ ଅଧିକୃତ ଗାଜାରେ ୩୦ ହଜାରରୁ ଅଧିକ ଲୋକ ଯୁଦ୍ଧରେ ପ୍ରାଣ ହରାଇ ଲେଣି । ୨.୪ ମିଲିୟନ୍ ଲୋକ ବିସ୍ଥାପିତ ହୋଇଥିବା ବେଳେ ଖାଦ୍ୟ, ପାନୀୟ ଓ ଔଷଧ ଅଭାବ ଲାଗି ରହିଛି ।