ନୂଆଦିଲ୍ଲୀ,୧୪/୦୯: ଆମେରିକା ଏବଂ ଚୀନ ମଧ୍ୟରେ ଲଗାତର ବଢ଼ୁଛି ତିକ୍ତତା । ବିଶ୍ୱ ବାଣିଜ୍ୟ କ୍ଷେତ୍ରରେ ନୂଆ କୌଶଳ ସହ ଆଗକୁବଢ଼ୁଛି ଆମେରିକା । ଏବେ ଆମେରିକାର ସର୍ବବୃହତ୍ତ ବାଣିଜ୍ୟ ଅଂଶୀଦାର ତାଲିକାରୁ ହଟିଛି ଚୀନ । ଚୀନକୁ ଟପି ଆମେରିକାର ସର୍ବବୃହତ୍ତ ବାଣିଜ୍ୟ ଅଂଶୀଦାର ଭାବେ ମେକ୍ସିକୋ ଉଭା ହୋଇଛି । ଜୁଲାଇରେ ଆମେରିକାର ମୋଟ ଆମଦାନୀରେ ମେକ୍ସିକୋର ଅଂଶ ୧୫% ରହିଛି । ଏହି ଅବଧିରେ ଚାଇନାର ଅଂଶ ୧୪.୬%କୁ ଖସିଛି । କୋଭିଡ ମହାମାରୀ ପରେ ଆମେରିକା ଧିରେ ଧିରେ ଚୀନ ଉପରେ ନିର୍ଭରତା କମାଉଛି । ଫଳରେ ଚୀନର ରପ୍ତାନି ଜୁଲାଇ ପରଠାରୁ ସର୍ବନିମ୍ନ ସ୍ତରରେ ରହିଛି ।
ସେହିଭଳି ଚୀନ ଅର୍ଥନୀତି ମହାମାରୀ ପରେ ଆହ୍ୱାନପୂର୍ଣ୍ଣ ସ୍ଥିତି ଦେଇ ଗତି କରୁଥିବାରୁ ଆମଦାନୀ କମିଛି । ଏହି ଦେଶର ମାନ୍ଦାବସ୍ଥା ସମସ୍ୟା ଏବେ ଯାଏ ଟଳିନାହିଁ ବୋଲି କୁହାଯାଉଛି ।ଏପଟେ ମେକ୍ସିକୋର ବିଦେଶୀ ପ୍ରତ୍ୟକ୍ଷ ନିବେଶ (ଏଫ୍ଡିଆଇ) ୪୦% ବଢ଼ିଛି । ଆମେରିକା କମ୍ପାନି ଚୀନ ତୁଳନାରେ ମେକ୍ସିକୋକୁ ବିକଳ୍ପ ଭାବେ ଦେଖୁଛନ୍ତି ବୋଲି ବ୍ଲୁମବର୍ଗରେ ଏକ ରିପୋର୍ଟ ପ୍ରକାଶ ପାଇଛି । ବେଞ୍ଜିଂ ଉପରେ କଟକଣା ଲଗାଇବା ଲାଗି ଆମେରିକା ରାଷ୍ଟ୍ରପତି ଜୋ ବାଇଡେନ ପଦକ୍ଷେପ ଗ୍ରହଣ କରିଛନ୍ତି । ମାଇକ୍ରୋଚିପ ଏବଂ ଟେକ୍ନୋଲୋଜି ଶିଳ୍ପର ସ୍ୱାର୍ଥକୁ ନଜରରେ ରଖି ବାଇଡେନ କଠୋର ହୋଇଛନ୍ତି ।
ଚୀନ ଏକ ଟାଇମ ବମ୍ ହୋଇଥିବା ବେଳେ କେତେ ବେଳେ ଫାଟିବ ତାହା କହି ହେବ ନାହିଁ ବୋଲି ଚୀନର ମାନ୍ଦାବସ୍ଥାକୁ ନେଇ ବାଇଡେନ ଏଭଳି କହିଛନ୍ତି । ଏପଟେ ରୁଷ-ଚୀନ ଭଳି ବିଶ୍ୱର ୨ ପ୍ରମୁଖ ଅର୍ଥନୀତି ମଧ୍ୟରେ ନୂଆ ସମ୍ପର୍କକୁ ନେଇ ସାରା ବିଶ୍ୱର ଏବେ ନଜର ।
ପାଶ୍ଚାତ୍ୟ ଦେଶଗୁଡିକ ରୁଷ ଉପରେ କଟକଣା ଲଗାଇବା ଫଳରେ ଉଭୟ ଭାରତ ଏବଂ ଆମେରିକା ଏହା ଦ୍ୱାରା ଫାଇଦା ପାଇଛନ୍ତି । ଗତ ମାସରେ ଭାରତକୁ ତେଲ ଯୋଗାଣ କ୍ଷେତ୍ରରେ ରୁଷ ଓପେକ ଦେଶଗୁଡିକୁ ପଛରେ ପକାଇ ଦେଇଛି । ସେହିଭଳି ଚୀନ ମଧ୍ୟରୁ ରୁଷ ଠାରୁ ପ୍ରଚୁର ପରିମାଣର ତେଲ କିଣିଥିବା ଜଣାପଡିଛି । ଭ୍ଲାଡିଭୋଷ୍ଟକଠାରେ ଅନୁଷ୍ଠିତ ଇଷ୍ଟର୍ଣ୍ଣ ଇକୋନୋମିକ ଫୋରମର ଏକ ବୈଠକକୁ ସମ୍ବୋଧିତ କରି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି, ରୁଷ-ଚୀନ ଦ୍ୱିପାକ୍ଷୀକ ବାଣିଜ୍ୟ ଚଳିତ ବର୍ଷ ୨୦୦ ବିଲିୟନ ଡଲାର ଟପିଛି ।
