ମନ୍ଦିରରେ ସାଧୁ ବେଶରେ ଲୁଚିଥିଲା ହତ୍ୟାକାରୀ, ୬ ବର୍ଷ ପରେ ବାନ୍ଧିଲା ପୋଲିସ
![](https://odia.prameya.com/prameya/document/post/2/2_153_1701365946321.webp)
Image Courtesy: abplive
ଲକ୍ଷ୍ନୌ: ଉତ୍ତରାଖଣ୍ଡରେ ହତ୍ୟା କରି ଉତ୍ତର ପ୍ରଦେଶର ଏକ ମନ୍ଦିରରେ ସାଧୁ ବେଶରେ ଲୁଚିଥିଲା ଅଭିଯୁକ୍ତ । ୨୦୧୮ରୁ ସେ ମନ୍ଦିରରେ ଥିବା ବେଳେ ତାକୁ ଉତ୍ତରାଖଣ୍ଡ ଏସଟିଏଫ୍ ଆଜି ଗିରଫ କରିଛି । ୨୦୧୮ରେ ଉତ୍ତରାଖଣ୍ଡର ମନୀଷ ଗୁପ୍ତା ନାମକ ଏକ ଯୁବକ ତାଙ୍କର ଭଉଣୀକୁ ଦୁର୍ବ୍ୟବହାର ନେଇ ବିରୋଧ କରିବାରୁ ଅଭିଯୁକ୍ତ ତାଙ୍କୁ ହତ୍ୟା କରିଥିଲା । ଏହା ପରେ ଅଭିଯୁକ୍ତ ଉତ୍ତର ପ୍ରଦେଶ ଯାଇ ସେଠାରେ ଥିବା ଏକ ମନ୍ଦିରରେ ସାଧୁ ବେଶରେ ରହିବାକୁ ଲାଗିଲା ।
ମନୀଷ ଗୁପ୍ତାକୁ ହତ୍ୟା କରିଥିବା ବୀର ସିଂହ ଫେରାର ହୋଇଯାଇଥିଲା। ହତ୍ୟାକାଣ୍ଡର ୬ ବର୍ଷ ପରେ ଉତ୍ତରାଖଣ୍ଡର ଏସଟିଏଫ୍ ଉତ୍ତର ପ୍ରଦେଶର ବିଜନୌରର ଏକ ମନ୍ଦିରରେ ସାଧୁ ବାବା ବେଶରେ ଥିବା ଅଭିଯୁକ୍ତକୁ ଗିରଫ କରିଛି । ମନୀଷ ଗୁପ୍ତାଙ୍କ ଭଉଣୀଙ୍କୁ ଦୁର୍ବ୍ୟବହାରକୁ କେନ୍ଦ୍ର କରି ହୋଇଥିବା ହତ୍ୟାକାଣ୍ଡର ଅଭିଯୁକ୍ତ ଧରାପଡ଼ିବା ପରେ ଚର୍ଚ୍ଚା ଜାରି ରହିଛି । ବୀର ସିଂହର ଆକ୍ରମଣରେ ମନୀଷ ଗୁପ୍ତା ଗୁରୁତର ହୋଇଥିଲେ । ଏହାର ୫ ଦିନ ପରେ ତାଙ୍କର ମୃତ୍ୟୁ ହୋଇଥିଲା ।
ତେବେ ଅଭିଯୁକ୍ତ ବୀର ସିଂହ ବିଜନୌରର ଏକ ଗାଁରେ ଥିବା ଶିବ ମନ୍ଦିରରେ ସାଧୁ ବେଶରେ ରହୁଥିଲା । ଏନେଇ ଉତ୍ତରାଖଣ୍ଡର ଏସଟିଏଫକୁ ଖବର ମିଳିବା ପରେ ଅଭିଯୁକ୍ତ ଧରାପଡ଼ିଛି । ଅଭିଯୁକ୍ତକୁ ଗିରଫ କରି ଏସଟିଏଫ୍ ଉତ୍ତରାଖଣ୍ଡ ନେଇଥିବା ବେଳେ ତାକୁ କୋର୍ଟରେ ହାଜର କରାଯିବ ବୋଲି ଜଣାପଡ଼ିଛି ।