ଅହମ୍ମଦାବାଦ,୧୯/୧୧: ଚଳଚଞ୍ଚଳ ଅହମ୍ମଦାବାଦ ନଗରୀ । ଆଉ କିଛି ଘଣ୍ଟା ଅତି ବାହିତ ହେବା ପରେ ନରେନ୍ଦ୍ର ମୋଦି ଷ୍ଟାଡ଼ିୟମ୍ରେ ପଡ଼ିବ ବହୁ ପ୍ରତୀକ୍ଷିତ ବିଶ୍ୱକପ୍ ଫାଇନାଲ୍ ଲଢ଼େଇ ପାଇଁ ଟସ୍ । ସାରା ଦେଶ କ୍ରିକେଟ୍ ମନସ୍କ । ଉତ୍କଣ୍ଠା ଉତ୍ତେଜନାର ରୂପ ନେଲାଣି। ଆକାଶ ଛୁଇଁଲା ଭଳି ଆତ୍ମବିଶ୍ୱାସ । ତଥାପି ଏ ଲଢ଼େଇରେ ଥରିବ ଛାତି, ପ୍ରତି ବଲରେ କମ୍ପିବ ମଇଦାନ। ଇତି ମଧ୍ୟରେ ପ୍ରସ୍ତୁତି ଶେଷ କରିଛନ୍ତି ଭାରତ ଓ ଅଷ୍ଟ୍ରେଲିଆ ସେନା । ମହାଲଢ଼େଇ ପାଇଁ ପ୍ରସ୍ତୁତ ହୋଇ ସାରିଛି ଉଭୟ ଦଳର ରଣନୀତି ।
ଭାରତ ପ୍ରମୁଖ ଟାଇଟଲ ଦାବିଦାର ରୂପେ ଗଣା ହେଉଥିଲେ ହେଁ ଅଷ୍ଟ୍ରେଲିଆ ବଡ଼ ମ୍ୟାଚ୍ରେ ଶ୍ରେଷ୍ଠ ପ୍ରଦର୍ଶନ କରିବାର ଅଭିଜ୍ଞତା ରଖିଛି । ତେଣୁ ମ୍ୟାଚ୍କୁ ନେଇ ପୂର୍ବାନୁମାନ କରିବା କଷ୍ଟକର । ଭାରତ ୯ଟି ଯାକ ଲିଗ ମ୍ୟାଚ୍ ସହ ସେମି ଫାଇନାଲ୍ରେ ନ୍ୟୁଜିଲାଣ୍ଡକୁ ହରାଇ ଫାଇନାଲ୍ରେ ପହଞ୍ଚିଛି । ଅଷ୍ଟ୍ରେଲିଆ ପ୍ରଥମ ୨ଟି ମ୍ୟାଚ୍ରେ ଯଥାକ୍ରମେ ଭାରତ ଓ ଦକ୍ଷିଣ ଆଫ୍ରିକା ଠାରୁ ପରାଜିତ ହୋଇଥିଲା । ଏହାପରେ ଦଳ କ୍ରମାନ୍ୱୟରେ ୮ଟି ଯାକ ମ୍ୟାଚ୍ରେ ବିଜୟ ହାସଲ କରିଛି ।
ପାୱର ପ୍ଲେ ପ୍ରଦର୍ଶନ: ପାୱାର ପ୍ଲେ(ପ୍ରଥମ ୧୦ଓଭର) ମ୍ୟାଚ୍ର ଫଳାଫଳ ନିର୍ଣ୍ଣୟ କରିବ । ଉଭୟ ଦଳ ପ୍ରଥମ ୧୦ ଓଭରରେ ଶ୍ରେଷ୍ଠ ପ୍ରଦର୍ଶନ କରି ଫାଇନାଲ୍ରେ ପହଞ୍ଚିଛନ୍ତି । ପାୱାର ପ୍ଲେ’ରେ ଶ୍ରେଷ୍ଠ ପ୍ରଦର୍ଶନ କଲେ ମ୍ୟାଚ୍ ଜିତିବା ସହଜ ହେବ ।
ଭାରତ ବ୍ୟାଟିଂ ବେଳେ ପ୍ରଥମ ୧୦ ଓଭରରେ ୬.୮୭ ହାରରେ ରନ୍ ସଂଗ୍ରହ କରିଛି । ଅଷ୍ଟ୍ରେଲିଆ ମଧ୍ୟ ଓଭର ପିଛା ୬.୫୫ ରନ ସଂଗ୍ରହ କରିଛି । ପାୱାର ପ୍ଲେରେ ଭାରତୀୟ ବୋଲର ଓଭର ପିଛା ୪.୩୪ ରନ୍ ପ୍ରଦାନ କରିଥିବାବେଳେ ଅଷ୍ଟ୍ରେଲିଆ ୪.୭୫ ରନ୍ ପ୍ରଦାନ କରିଛନ୍ତି ।
ସାମି ସାଜିବେ ସୂତ୍ରଧର: ଘାତକ ବୋଲିଂ କରି ଆତଙ୍କ ଖେଳାଇଥିବା ମହମ୍ମଦ ସାମି ଭାରତୀୟ ବୋଲିଂର ସୂତ୍ରଧର ସାଜିବେ । ମାତ୍ର ତାଙ୍କୁ ପାୱାର ପ୍ଲେ’ରେ ନୂଆ ବଲ୍ ପକାଇବାକୁ ଦେବା ଆବଶ୍ୟକ ବୋଲି କ୍ରିକେଟ୍ ପଣ୍ଡିତମାନେ ମତ ଦେଇଛନ୍ତି । ବାମ ହାତି ବ୍ୟାଟରଙ୍କ ବିପକ୍ଷରେ ସାମି ଘାତକ ପ୍ରଦର୍ଶନ କରିଛନ୍ତି । ଅଷ୍ଟ୍ରେଲିଆର ଉଭୟ ଓପନର ଡେଭିଡ ୱାର୍ଣ୍ଣର ଓ ଟ୍ରେଭିସ୍ ହେଡ୍ ବାମ ହାତି ବ୍ୟାଟର । ତେଣୁ ସାମି ଉଭୟଙ୍କୁ ସହଳ ପାଭିଲିୟନ ପଠାଇ ପାରିବେ । ହେଡ୍ ଅଫଷ୍ଟମ୍ପ ବାହାର ବଲ୍କୁ ଖେଳିବାରେ ଦୁର୍ବଳ । ତେଣୁ ସାମି ପ୍ରାରମ୍ଭିକ ବିପର୍ଯ୍ୟୟ ଘଟାଇ ପାରିବେ । ସେ ଏଥର ବିଶ୍ୱକପ୍ରେ ବାମ ହାତି ବ୍ୟାଟରଙ୍କୁ ୫୨ଟି ବଲ୍ ପକାଇ ୩୨ ରନ୍ ପ୍ରଦାନ କରିଛନ୍ତି ଓ ୮ଟି ୱିକେଟ୍ ନେଇଛନ୍ତି ।
ଯଶପ୍ରୀତ ବୁମରା ମଧ୍ୟ ବାମ ହାତି ବ୍ୟାଟରଙ୍କ ବିପକ୍ଷରେ ଘାତକ ବୋଲିଂ କରିଛନ୍ତି । ବାମ ହାତି ବ୍ୟାଟରଙ୍କ ବିପକ୍ଷରେ ତାଙ୍କ ଇକୋନୋମି ୩.୧୩ ରହିଛି । ବୁମରା ଓ ମହମ୍ମଦ ସିରାଜ ପାୱାର ପ୍ଲେ’ରେ ବୋଲିଂ ଆରମ୍ଭ କରୁଛନ୍ତି । ଲିଗ୍ ପର୍ଯ୍ୟାୟ ଓ ସେମି ଫାଇନାଲ୍କୁ ମିଶାଇ ପାୱାର ପ୍ଲେ’ରେ ଭାରତ ୨୦ଟି ୱିକେଟ୍ ଅକ୍ତିଆର କରିଛି । ପାୱାର ପ୍ଲେ’ରେ ସର୍ବାଧିକ ୱିକେଟ୍ ଦକ୍ଷିଣ ଆଫ୍ରିକା(୨୧ୱିକେଟ୍) ନାମରେ ରହିଛି ।
ରୋହିତ-ହାଜେଲଉଡ୍ ଟକ୍କର
ରବିବାର ରୋହିତ ଶର୍ମା ଓ ଜୋସ ହାଜେଲଉଡ୍ଙ୍କ ମଧ୍ୟରେ କଡ଼ା ଟକ୍କର ହେବ । ରୋହିତ ପ୍ରାରମ୍ଭିକ ଓଭର ଗୁଡ଼ିକରେ ବିସ୍ଫୋରକ ବ୍ୟାଟିଂ ଜାରି ରଖିଛନ୍ତି । ପାୱାର ପ୍ଲେରେ ସେ ତାଙ୍କ ଷ୍ଟ୍ରାଇକ ରେଟ୍ ରହିଛି ୧୩୩.୦୮ । ୧୦ଟି ମ୍ୟାଚ୍ର ପାୱାର ପ୍ଲେରେ ରୋହିତ ୮୮.୫୦ହାରରେ ୩୫୪ ରନ୍ ସଂଗ୍ରହ କରିଛନ୍ତି । ଏହି ସମୟ ମଧ୍ୟରେ ସେ ୪୨ଟି ଚୌକା ଓ ୨୧ଟି ଛକା ମାରିଛନ୍ତି । ମାତ୍ର ହାଜେଲଉଡ୍ଙ୍କ ସୁଇଂ ବୋଲିଂ ବିପକ୍ଷରେ ରୋହିତ ସଂଘର୍ଷ କରିବାର ରେକର୍ଡ ରହିଛି । ଶୃଙ୍ଖଳିତ ବୋଲିଂ ପାଇଁ ପରିଚିତ ହାଜେଲଉଡ୍ ଆସନ୍ତା କାଲି ରୋହିତଙ୍କୁ ଆଉଟ୍ କରିବାକୁ ପ୍ରୟାସ କରିବେ । ହାଜେଲଉଡ୍ଙ୍କ ବିପକ୍ଷରେ ରୋହିତ କ୍ରିଜ୍ ବାହାରକୁ ବାହାରି ପ୍ରହାର କରିବାକୁ ଚେଷ୍ଠା କରିବେ ।
ଦ୍ୱିତୀୟରେ ବ୍ୟାଟିଂ କଲେ ବିଜୟ ସହଜ: ପୂର୍ବ ରେକର୍ଡକୁ ଦେଖିଲେ ଏହି ଗ୍ରାଉଣ୍ଡ୍ରେ ବିଜୟ ଲକ୍ଷ୍ୟର ପିଛା କରି ଜିତିବା ସହଜ । ପାକିସ୍ତାନ ବିପକ୍ଷରେ ଭାରତ ଏଠାରେ ଦ୍ୱିତୀୟରେ ବ୍ୟାଟିଂ କରି ଜିତିଥିଲା । ବିଶ୍ୱକପ୍ର ୪ଟି ମ୍ୟାଚ୍ରୁ ଦ୍ୱିତୀୟରେ ବ୍ୟାଟିଂ କରିଥିବା ଦଳ ୩ଟି ମ୍ୟାଚ୍ ଜିତିଛନ୍ତି । ଗତ ୨ଟି ଯାକ ଆଇପିଏଲ୍ ଫାଇନାଲ୍ରେ ମଧ୍ୟ ଦ୍ୱିତୀୟରେ ବ୍ୟାଟିଂ କରିଥିବା ଦଳ ବିଜୟ ହାସଲ କରିଛନ୍ତି ।
୨୦୦୩ ଫାଇନାଲ୍ ଦୁଃଖ: ରବିବାର ମ୍ୟାଚ୍ ବିଷୟରେ ଭାବିବା ବେଳକୁ ୨୦୦୩ ବିଶ୍ୱକପ ଫାଇନାଲ୍ ମନେ ପଡ଼ିଯାଉଛି । ଭାରତୀୟ କ୍ରିକେଟ୍ ପ୍ରେମୀ ୨୦ବର୍ଷ ତଳର ସେହି ଫାଇନାଲ୍ ମୁକାବିଲାକୁ ଭୁଲି ପାରି ନାହାନ୍ତି । ଭାରତକୁ ଦୟନୀୟ ଭାବେ ହରାଇ ଅଷ୍ଟ୍ରେଲିଆ ତୃତୀୟ ବିଶ୍ୱକପ୍ ହାସଲ କରିଥିଲା । ଏଥର ଭାରତ ପାଳି । ଉକ୍ତ ପରାଜୟର ପ୍ରତିଶୋଧ ନେଇ ଟିମ ଇଣ୍ଡିଆ ଭାରତୀୟ ଦର୍ଶକଙ୍କ ହୃଦୟ ଜିତିବାକୁ ଚେଷ୍ଟା କରିବ । ଉଭୟ ଦଳ ଚୂଡ଼ାନ୍ତ ଏକାଦଶ ଘୋଷଣା କରିନାହାନ୍ତି । ଟସ ପୂର୍ବରୁ ଦଳ ଘୋଷଣା ହେବ ବୋଲି ରୋହିତ ସାମ୍ବାଦିକ ସମ୍ମିଳନୀରେ ସ୍ପଷ୍ଟ କରିଥିଲେ । ଭାରତ ଏକାଦଶ ଅପରିବର୍ତ୍ତିତ ରଖିବା ନିଶ୍ଚିତ । ଅଷ୍ଟ୍ରେଲିଆ ଏକାଦଶରେ ପରିବର୍ତ୍ତନ କରିପାରେ । ମାର୍ନସ ଲାବୁସାନଙ୍କ ସ୍ଥାନରେ ମାର୍କସ ଷ୍ଟଇନିସ୍ଙ୍କୁ ଖେଳାଇବା ପାଇଁ ଅଷ୍ଟ୍ରେଲିଆ ଯୋଜନା କରୁଛି ।
ମଧ୍ୟ କ୍ରମରେ ଘାତକ ହେବେ ଜାଡେଜା
ମଧ୍ୟ ଓଭର ଗୁଡ଼ିକରେ ରବିନ୍ଦ୍ର ଜାଡେଜା ଘାତକ ସାଜିବେ । ଏଥର ବିଶ୍ୱକପ୍ରେ ସେ ଏହି ଭାଗରେ ୪.୨୫ ଇକୋନୋମିରେ ବୋଲିଂ କରିଛନ୍ତି । ଡାହାଣ ହାତି ବ୍ୟାଟରଙ୍କ ବିପକ୍ଷରେ ତାଙ୍କ ଇକୋନୋମି ୪.୧୮ ରହିଛି । ଅଷ୍ଟ୍ରେଲିଆର ମଧ୍ୟ କ୍ରମରେ ୩ରୁ ୭ନଂ ସ୍ଥନରେ ଡାହାଣ ହାତି ବ୍ୟାଟର ରହିଛନ୍ତି । କୁଲଦୀପ ଯାଦବ ସାମାନ୍ୟ ବ୍ୟୟ ବହୁଳ ରହିଥିଲେ ହେଁ ଯୋଡି ଭାଙ୍ଗିବାରେ ସିଦ୍ଧହସ୍ତ । ମଧ୍ୟ ଓଭର ଗୁଡ଼ିକରେ ତାଙ୍କ ଇକୋନୋମି ୪.୩୨ ରହିଛି ।
ସ୍ପିନରଙ୍କୁ ସୁହାଇବ ପିଚ୍ ଫାଇନାଲ ପାଇଁ ପ୍ରସ୍ତୁତ କରାଯାଇଥିବା ପିଚ୍ରେ ପୂର୍ବରୁ ଏକ ମ୍ୟାଚ୍ ଅନୁଷ୍ଠିତ ହୋଇସାରିଛି । ଭାରତ ଓ ପାକିସ୍ତାନ ଏହି ପିଚ୍ରେ ସାମ୍ନା ସାମ୍ନି ହୋଇଥିଲେ । ଭାରତ ଉକ୍ତ ମ୍ୟାଚ୍ ଜିତିଥିଲା । ଏହି ମ୍ୟାଚ୍କୁ ନଜରକୁ ନେଲେ ଭାରତ ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲା । ପେସ୍ ବୋଲରମାନେ ପାୱାର ପ୍ଲେରେ ନୂଆ ବଲ୍କୁ ସୁଇଂ କରାଇଥିଲେ । ଶେଷ ଭାଗରେ ପୁରୁଣା ବଲ୍ରୁ ରିଭର୍ସ ସୁଇଂ ଦେଖିବାକୁ ମିଳିଥିଲା । ରବିବାର ପିଚ୍ ସାମାନ୍ୟ ମନ୍ଥର ରହିବ ବୋଲି ଅନୁମାନ କରାଯାଉଛି । ସ୍ପିନରମାନେ ପିଚ୍ରୁ ସହାୟତା ପାଇବେ ।
ତାପମାତ୍ରା ୩୦ଡିଗ୍ରୀରୁ କମ୍ ରହିବ । ରାତ୍ରିରେ କାକର ପଡ଼ିବ । ମାତ୍ର ଆଉଟ୍ ଫିଲ୍ଡରେ କେମିକାଲ ସ୍ପ୍ରେ କରାଯାଇଥିବାରୁ କାକର ବିଶେଷ ପ୍ରଭାବିତ କରିବ ନାହିଁ ।
ସମ୍ଭାବ୍ୟ ଦଳ
ଭାରତ: ରୋହିତ ଶର୍ମା (ଅଧିନାୟକ), ଶୁଭମନ ଗିଲ୍ ,ବିରାଟ କୋହଲି, ଶ୍ରେୟାସ ଆୟର, କେଏଲ ରାହୁଲ, ସୂର୍ଯ୍ୟକୁମାର ଯାଦବ, ରବିନ୍ଦ୍ର ଜାଡେଜା, ମହମ୍ମଦ ସାମି, ଯଶପ୍ରୀତ ବୁମରା, କୁଲଦୀପ ଯାଦବ, ମହମ୍ମଦ ସିରାଜ।
ଅଷ୍ଟ୍ରେଲିଆ: ଡେଭିଡ୍ ୱାର୍ଣ୍ଣର ,ଟ୍ରେଭିସ ହେଡ୍, ମିଚେଲ ମାର୍ଶ, ଷ୍ଟିଭେନ ସ୍ମିଥ୍, ମାର୍ନସ ଲାବୁସାନ, ଗ୍ଲେନ ମ୍ୟାକ୍ସୱେଲ୍, ଜୋସ ଇଂଲିଶ, ପ୍ୟାଟ୍ କମିନ୍ସ (ଅଧିନାୟକ), ମିଚେଲ ଷ୍ଟାର୍କ, ଜୋସ ହାଜେଲଉଡ, ଆଡାମ ଜାମ୍ପା।
