ନୂଆଦିଲ୍ଲୀ,୦୬/୧୧: ଚଳିତ ବିଶ୍ୱକପ୍ରେ ସୋମବାର ଶ୍ରୀଲଙ୍କା ଓ ବାଂଲାଦେଶ ପରସ୍ପରକୁ ଭେଟିବେ । ବାଂଲାଦେଶ ସେମି ଫାଇନାଲ୍ ଦୌଡରୁ ବାଦ ପଡ଼ିସାରିଛି । ଶ୍ରୀଲଙ୍କା ଆଶା ବଞ୍ଚାଇ ରଖିଛି । ଏହି ମ୍ୟାଚ୍ ଜରିଆରେ ଉଭୟ ଦଳ ୨୦୨୫ ଚାମ୍ପିଅନ୍ସ ଟ୍ରଫିକୁ ଯୋଗ୍ୟତା ଅର୍ଜନ କରିବା ପାଇଁ ଲକ୍ଷ୍ୟ ରଖିଛନ୍ତି । ଫଳରେ ମ୍ୟାଚ୍ଟି ତୀବ୍ର ସଂଘର୍ଷପୂର୍ଣ୍ଣ ହେବା ନିଶ୍ଚିତ । ନିୟମ ଅନୁଯାୟୀ ବିଶ୍ୱକପ୍ ପଏଣ୍ଟ ତାଲିକାର ଶ୍ରେଷ୍ଠ ୭ ଓ ଆୟୋଜକଙ୍କୁ ମିଶାଇ ମୋଟ୍ ୮ଟି ଦଳ ଚାମ୍ପିଅନ୍ସ ଟ୍ରଫିକୁ ଯୋଗ୍ୟତା ଅର୍ଜନ କରିବେ । ପଏଣ୍ଟ ତାଲିକାରେ ବାଂଲାଦେଶ ନବମ ଓ ଶ୍ରୀଲଙ୍କା ସପ୍ତମ ସ୍ଥାନରେ ରହିଛନ୍ତି ।
ସୋମବାର ଶ୍ରୀଲଙ୍କାର ବାମ ହାତି ପେସ୍ ବୋଲର ଦିଲସାନ ମଦୁଶଭ୍କାଙ୍କ ଉପରେ ନଜର ରହିବ । ସେ ୭ଟି ମ୍ୟାଚ୍ରୁ ୧୮ଟି ୱିକେଟ୍ ଅକ୍ତିଆର କରିସାରିଛନ୍ତି । ଗତ ଭାରତ ବିପକ୍ଷ ମୁକାବିଲାରେ ସେ ୫ୱିକେଟ୍ ସଫଳତା ଅର୍ଜନ କରିଥିଲେ । ଶେଷ ୨ଟି ମ୍ୟାଚ୍ରେ ସେ ଆଉ ୬ଟି ୱିକେଟ୍ ନେଇ ଶ୍ରୀଲଙ୍କା ପକ୍ଷରୁ ବିଶ୍ୱକପ୍ରେ ସର୍ବାଧିକ ୱିକେଟ୍ ରେକର୍ଡ ସ୍ଥାପନ କରିବେ । ଶ୍ରୀଲଙ୍କା ପକ୍ଷରୁ ଚାମୁଣ୍ଡା ଭାସ ଓ ମୁଥିଆ ମୂରଲୀଥରନ୍ ବିଶ୍ୱକପ୍ରେ ସର୍ବାଧିକ ୨୩ଟି ଲେଖାଏଁ ୱିକେଟ୍ ନେଇଛନ୍ତି ।
ବାଂଲାଦେଶ ପକ୍ଷରୁ ସାକିବ ଅଲ୍ ହାସନଙ୍କ ଉପରେ ନଜର ରହିବ । ସେ ବିଶ୍ୱକପ୍ ଇତିହାସରେ ମୋଟ୍ ୧୨୫୦ ରନ୍ ସଂଗ୍ରହ କରିସାରିଛନ୍ତି ଓ ୪୧ଟି ୱିକେଟ୍ ନେଇଛନ୍ତି । ବିଶ୍ୱକପ୍ ଇତିହାସରେ ସ୍ପିନର ଭାବେ ଦ୍ୱିତୀୟ ସର୍ବାଧିକ ୱିକେଟ୍ ରେକର୍ଡ ତାଙ୍କ ନାମରେ ରହିଛି । ସ୍ପିନର ଭାବେ ମୂରଲୀଥରନ ବିଶ୍ୱକପ୍ରେ ସର୍ବାଧିକ ୬୮ଟି ୱିକେଟ୍ ନେଇଛନ୍ତି । ସୋମବାର ଶ୍ରୀଲଙ୍କା ଏକାଦଶରେ ପରିବର୍ତ୍ତନ କରିବା ସମ୍ଭାବନା ରହିଛି ।
ଓପନର ଦିମୁଥ୍ କରୁଣାରତ୍ନେ ନିରାଶ କରିବା ପରେ ସୋମବାର ତାଙ୍କ ବଦଳରେ କୁଶଲ ପେରେରାଖେଳିବା ଆଶା କରାଯାଉଛି । ବାଂଲାଦେଶ ଏକାଦଶରେ ପରିବର୍ତ୍ତନ କରିବାସମ୍ଭାବନା ନାହିଁ । ମାତ୍ର ବ୍ୟାଟିଂ କ୍ରମରେ ପରିବର୍ତ୍ତନ କରିବା ନିଶ୍ଚିତ। ମୁସଫିକର ରହିମ ପୂର୍ବ ଭଳି ୪, ମହମୁଦୁଲ୍ଲା ୫ ଓ ସାକିବ ୬ନଂ ସ୍ଥାନରେ ବ୍ୟାଟିଂ କରିବା ଆଶା କରାଯାଉଛି । କୋଟଲା ଗ୍ରାଉଣ୍ଡ୍ର ପିଚ୍ ବ୍ୟାଟିଂ ପାଇଁ ଅନୁକୂଳ । ଏଠାରେ ବିଶାଳ ସ୍କୋର ସଂଗୃହୀତ ହୋଇ ସାରିଛି । ଶ୍ରୀଲଙ୍କା ବିପକ୍ଷରେ ଦକ୍ଷିଣ ଆଫ୍ରିକା ଏହି ଗ୍ରାଉଣ୍ଡ୍ରେ ୪୨୮ରନ୍ ସଂଗ୍ରହ କରିଥିଲା। ତେଣୁ ଟସ୍ ବିଜୟୀ ଦଳ ପ୍ରଥମେ ବ୍ୟାଟିଂ କରି ବିଶାଳ ସ୍କୋର ସଂଗ୍ରହ କରିବାକୁ ପ୍ରୟାସ କରିବେ ।
ସମ୍ଭାବ୍ୟ ଦଳ
ବାଂଲାଦେଶ: ଲିଟନ ଦାସ, ତନଜିଦ ହାସାନ, ନଜମୁଲ ହୋସେନ ଶାନ୍ତୋ, ମୁସଫିକର ରହିମ, ମହମୁଦୁଲ୍ଲା, ସାକିବ ଅଲ୍ ହାସନ(ଅଧିନାୟକ), ମେହଦି ହାସାନ ମିରାଜ, ତୋହିଦ ହୃଦୟ, ଟସ୍କିନ ଅହମ୍ମଦ, ମୁସ୍ତାଫିଜୁର ରେହମାନ, ସରିଫୁଲ ଇସଲାମ ।
ଶ୍ରୀଲଙ୍କା: ପଥୁମ ନିଶଙ୍କା, କୁଶଲ ପେରେରା/ଦିମୁଥ କରୁଣାରତ୍ନେ, କୁଶଲ ମେଣ୍ଡିସ୍(ଅଧିନାୟକ), ସଦିରା ସମରବିକ୍ରମା, ଚରିଥ ଆଶାଲଙ୍କା, ଆଞ୍ଜେଲୋ ମାଥ୍ୟୁସ୍, ଦୁସାନ ହେମନ୍ତ, ମହିଶ ତୀକ୍ଷଣା, କାସୁନ ରଜିଥା, ଦୁଷ୍ମନ୍ତ ଚାମୀରା, ଦିଲସାନ ମଦୁଶଙ୍କା ।
