ବାଙ୍ଗିରିପୋଷି, ୪/୨: ମୟୂରଭଞ୍ଜ ଜିଲ୍ଲା ୪୯ ନମ୍ବର ଜାତୀୟ ରାଜପଥର ଦ୍ୱାରଶୁଣି ଘାଟି ରାସ୍ତାରେ ସିରିଜ୍ ଦୁର୍ଘଟଣା । ଗୋଟିଏ ପରେ ଗୋଟିଏ ୩ଟି ଗାଡ଼ି ଦୁର୍ଘଟଣାଗ୍ରସ୍ତ ହୋଇ ଜଣେ ଟ୍ରକ୍ ଚାଳକ ଗୁରୁତର ଅବସ୍ଥାରେ ଉଦ୍ଧାର ହୋଇଥିବା ଜଣାପଡ଼ିଛି । ସୂଚନା ଅନୁସାରେ, କେନ୍ଦୁଝରରୁ ଲୁହାପଥର ବୋଝେଇ କରି ଟ୍ରକ୍ଟି ଖଡ଼ଗପୁର ଅଭିମୁଖେ ଦ୍ରୁତଗତିରେ ଯାଉଥିବା ବେଳେ ଘାଟି ବାଙ୍କ ରାସ୍ତାରେ ଏକ ଲୁହାପଥର ବୋଝେଇ ଟ୍ରକ୍କୁ ଓଭରଟେକ୍ କରିବା ସମୟରେ ନିୟନ୍ତ୍ରଣ ହରାଇ ବିପରୀତ ଦିଗରୁ ଆସୁଥିବା ଏକ ଟ୍ରେଲରକୁ ସିଧାସଳଖ ଧକ୍କା ଦେଇଥିଲା । ଆଖି ପିଛୁଳାକେ ଏଭଳି ଦୁର୍ଘଟଣା ଘଟିଥିଲା ।
ଖବର ପାଇ ବାଙ୍ଗିରିପୋଷି ପୋଲିସ ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଚଳାଇଥିବା ବେଳେ ଆମ୍ୱୁଲାନ୍ସ ସହିତ ଶହଶହ ଗାଡ଼ି ଦୀର୍ଘ ସମୟ ଧରି ଛିଡ଼ା ହୋଇ ରହିଥିଲା । ଦୀର୍ଘ ୩ ଘଣ୍ଟା ପରେ ଯାତାୟାତ ସ୍ୱଭାବିକ ହୋଇଥିଲା । ୟୁପି ଟ୍ରଲର ଡ୍ରାଇଭର ଗୁରୁତର ଆହତ ହେବାରୁ ବାଙ୍ଗିରିପୋଷି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସାଧିନ ଅଛନ୍ତି ।