ନୂଆଦିଲ୍ଲୀ: ଟିମ୍ ଇଣ୍ଡିଆର ଦ୍ରୁତ ବୋଲର ମହମ୍ମଦ ସାମି ଆହତ ହେତୁ ଟିମ୍ରେ ସାମିଲ ନାହାନ୍ତି । ଦିନିକିଆ ବିଶ୍ବକପ୍ରେ ଆହତ ହେବା ପରଠାରୁ ସେ କୌଣସି ମ୍ୟାଚ୍ରେ ନଜର ଆସିନାହାନ୍ତି । ହେଲେ ସୋସିଆଲ ମିଡିଆ ଜରିଆରେ ପ୍ରଶଂସକଙ୍କ ସହ ସଂପର୍କରେ ରହୁଛନ୍ତି ସାମି । ବିଶ୍ବକପରେ ଦମଦାର ପ୍ରଦର୍ଶନ ପରେ ସାମିଙ୍କୁ ବିଶିଷ୍ଟ ଖେଳ ପୁରସ୍କାର ଅର୍ଜୁନ ଆଓ୍ବାର୍ଡ ଦିଆଯାଇଛି । ନିକଟରେ ଏକ ସାକ୍ଷାତକାରରେ ସାମି ଧାର୍ମିକ ଭେଦଭାବକୁ ଦୂର କରିବା ଉପରେ ଜୋର ଦେଇଛନ୍ତି ।
ସେ କୌଣସି ବ୍ୟକ୍ତିଙ୍କୁ ଜୟ ଶ୍ରୀ ରାମ ଏବଂ ଆଲ୍ଲା ହୋ ଆକବର କହିବାରେ ଅସୁବିଧା ନହେବା ଦରକାର ବୋଲି କହିଛନ୍ତି । ନେଟଓ୍ବର୍କ ୧୮କୁ ଦେଇଥିବା ଏକ ସାକ୍ଷାତକାରରେ ସାମି କହିଛନ୍ତି ଯେ, ଯଦି ରାମ ମନ୍ଦିର ନିର୍ମାଣ ହୋଇଛି ତେବେ ଜୟ ଶ୍ରୀ ରାମ କହିବାରେ ଅସୁବିଧା କେଉଁଠି ? ୧୦୦ ଥର କୁହନ୍ତୁ । ଯଦି ମୁଁ ଆଲ୍ଲା ହୋ ଆକବର କହିବାକୁ ଚାହୁଁଛି ତେବେ ମୁଁ ୧୦୦୦ ଥର କହିପାରିବି । ଏଥିରେ କଣ ଅସୁବିଧା ଅଛି ବୋଲି ସେ ପ୍ରଶ୍ନ କରିଛନ୍ତି ।
ସେ ଆହୁରି କହିଛନ୍ତି , ପ୍ରଥମେ କହି ରଖୁଛି ମୁଁ ମୁସଲିମ୍ ବୋଲି ବିଲକୁଲ ଭୟ କରୁନାହିଁ । ମୁସଲିମ ହୋଇଥିବାରୁ ମୁଁ ଗର୍ବିତ । ମୋ ପାଇଁ ଦେଶ ପ୍ରଥମ । ଯଦି ଏହାକୁ ନେଇ କାହାର ଆପତ୍ତି ଥାଏ ତେବେ ମୁଁ କିଛି କରିପାରିବି ନାହିଁ ବୋଲି ସାମି କହିଛନ୍ତି । ସାମି କହିଛନ୍ତି ଯେ, ‘ମୁଁ ଖୁସିରେ ବଞ୍ଚୁଛି କାରଣ ମୋ ଦେଶକୁ ମୁଁ ରିପ୍ରେଜେଣ୍ଟ କରୁଛି । ବିବାଦକୁ ନେଇ ଯେଉଁ କଥା କୁହାଯାଉଛି କିଛି ଲୋକ ଏହି ଖେଳ ଖେଳିବାକୁ ସୋସିଆଲ ମିଡିଆରେ ରହୁଛନ୍ତି । ଏଭଳି ଲୋକଙ୍କ ସହ ମୋର କିଛି ସଂପର୍କ ନାହିଁ ।’ ବିଶ୍ବକପରେ ସାମି ଜବରଦସ୍ତ ଫର୍ମରେ ଥିଲେ । ସେ ଟୁର୍ଣ୍ଣାମେଣ୍ଟରେ ୭ଟି ମ୍ୟାଚ୍ ଖେଳି ସର୍ବାଧିକ ଓ୍ବିକେଟ ନେଇଥିଲେ ।
