ବାରିପଦା ୨୬/୧୧: ପର୍ଯ୍ୟଟକଙ୍କ ପ୍ରମୁଖ ଆକର୍ଷଣ ଶିମିଳିପାଳକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରଖାଯାଇଛି । ଏନେଇ ଶିମିଳିପାଳ ବ୍ୟାଘ୍ର ପ୍ରକଳ୍ପ ପକ୍ଷରୁ ନିଷ୍ପତ୍ତି ହୋଇଛି । ଆଗାମୀ ସୂଚନା ନ ଆସିବା ପର୍ଯ୍ୟନ୍ତ ପର୍ଯ୍ୟଟକମାନେ ଶିମିଳିପାଳ ବୁଲାବୁଲିରୁ ବିରତ ରହିବାକୁ ବା ନିଜର ଯୋଜନା ବଦଳାଇବାକୁ ସ୍ପଷ୍ଟ ଭାବେ କୁହାଯାଇଛି ।
ଶିମିଳିପାଳ ଭିତରେ ରହୁଥିବା ସ୍ଥାନୀୟ ଅଧିବାସୀମାନେ ବିଭିନ୍ନ ସ୍ଥାନରେ ରାସ୍ତାକୁ ଓହ୍ଲେଇ ରାସ୍ତା ଅବରୋଧ କରିଛନ୍ତି । ସେଥିପାଇଁ ପର୍ଯ୍ୟଟକମାନଙ୍କୁ ଶିମିଳିପାଳ ଭିତରକୁ ପ୍ରବେଶ ଉପରେ ରୋକ୍ ଲଗାଯିବା ସହିତ ବରେହୀପାଣି, କୁମାରୀ ଏବଂ ଗୁଡୁଗୁଡିଆ ନେଚର କ୍ୟାମ୍ପକୁ ଯିବା ପାଇଁ ବାରଣ କରାଯାଇଛି ।
ତେବେ ପର୍ଯ୍ୟଟକ ଚାହିଁଲେ ଅନ୍ୟସ୍ଥାନରେ ବୁଲାବୁଲି କରିପାରିବେ ବୋଲି ମଧ୍ୟ ଶିମିଳିପାଳ ବ୍ୟାଘ୍ର ପ୍ରକଳ୍ପ ପକ୍ଷରୁ ସୂଚନା ଦିଆଯାଇଛି । ବନ ବିଭାଗ ସ୍ଥାନୀୟ ଲୋକଙ୍କୁ ରାସ୍ତା ନିର୍ମାଣ ଓ ଅନ୍ୟାନ୍ୟ କାର୍ଯ୍ୟରେ ନ ଲଗାଇ ବାହାର ଲୋକଙ୍କୁ ଲଗାଉଥିବାରୁ ଶିମିଳିପାଳ ଅଧିବାସୀ ଏହାର ପ୍ରତିବାଦ କରିଛନ୍ତି । ଫଳସ୍ୱରୂପ ଶନିବାର ଶିମିଳିପାଳ ଅଧିବାସୀ ଲେଞ୍ଜିଘୋଷରା ଘାଟି, ବରେହୀପାଣି ଏବଂ ନଅଁଣାଠାରେ ରାସ୍ତା ଅବରୋଧ ସହ ଆନ୍ଦୋଳନ କରିଥିଲେ । ଅନିର୍ଦ୍ଦିଷ୍ଟ କାଳ ପାଇଁ ସେମାନେ ରାସ୍ତା ବନ୍ଦ କରିଦେଇଥିବା ବେଳେ ବନ ବିଭାଗ ସେମାନଙ୍କୁ ବୁଝାଇବାରେ ବିଫଳ ହୋଇଛି । ଫଳରେ ପର୍ଯ୍ୟଟକଙ୍କ ପାଇଁ ଶିମିଳିପାଳ ବୁଲା ବର୍ତ୍ତମାନ ପାଇଁ ଏକ ପ୍ରକାର ସ୍ଥଗିତ ରହିଛି ।
