ଫୁଲବାଣୀ,୦୩/୧୧: ଭଉଣୀକୁ ସାଙ୍ଗମାନଙ୍କ ସହ ଜଙ୍ଗଲରେ ଗଣଦୁଷ୍କର୍ମ କରାଯାଇଛି । ଘଟଣା ଜଣାପଡ଼ିବା ଭୟରେ ଭାଇ ନିଜ ଭଉଣୀକୁ ତଣ୍ଟିଚିପି ହତ୍ୟା ପରେ ଟାଙ୍ଗିଆରେ ହାଣିଥିଲା । ଏଭଳି ଅଭାବନୀୟ ଓ ଲଜ୍ଜାଜନକ ଘଟଣା ଘଟିଛି କନ୍ଧମାଳ ଜିଲ୍ଲା ଚକାପାଦ ଥାନା ଅଧୀନ ଲିଙ୍ଗାଗଡ଼ ଗ୍ରାମରେ । ମୃତକ ପୁଷ୍ପାଞ୍ଜଳି ଭୋଇ(୨୫)ଙ୍କ ମୃତଦେହ ଭାଇ ପରେଶ ଭୋଇ ନେଇ ଜଙ୍ଗଲରେ ପୋତି ଦେଇଛି। ଭଉଣୀ ନିଖୋଜ ଥିବା ଚକାପାଦ ଥାନାରେ ଅଭିଯୋଗ କରିଛି । ପୁଲିସ ଅନୁସନ୍ଧାନ କରି ଶୁକ୍ରବାର ଅଭିଯୁକ୍ତ ପରେଶଙ୍କ ସମେତ ଟୁନା ଭୋଇ, ଚନ୍ଦ୍ରମଣି ଭୋଇ ଓ ବିମଳା ନାୟକଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଡିଏସ୍ପି କମଳ ପଣ୍ଡା ସୂଚନା ଦେଇଛନ୍ତି ।
ଥାନା ସୂତ୍ରରୁ ପ୍ରକାଶ, ଚକାପାଦ ଥାନା ଚାହାଳି ପଞ୍ଚାୟତ ଲିଙ୍ଗାଗଡର ପୁଷ୍ପାଞ୍ଜଳି ବାପା ଭରତଙ୍କ ସହ ରହୁଥିଲେ । ଘର ଠାରୁ କିଛି ଦୂରରେ ତାଙ୍କ ବଡଭାଇ ପରେଶ ଭୋଇ ସ୍ତ୍ରୀଙ୍କ ସହ ଅଲଗା ରହୁଛନ୍ତି । ଭାଇର ଅନ୍ୟଜଣଙ୍କ ସହ ଅନୈତିକ ସମ୍ପର୍କକୁ ନେଇ ପୁଷ୍ପାଞ୍ଜଳି ବିରୋଧ କରିଥିଲେ । ଏନେଇ ଉଭୟଙ୍କ ମଧ୍ୟରେ ମନାନ୍ତର ହୋଇଥିଲା । ନଭେମ୍ବର ୩ରେ ପୁଷ୍ପାଞ୍ଜଳି ପତ୍ର ସଂଗ୍ରହ ପାଇଁ ଗାଁ ନିକଟସ୍ଥ ଜଙ୍ଗଲକୁ ଯାଇଥିବାବେଳେ ପରେଶ ସେହି ଜଙ୍ଗଲକୁ ଗାଈ ଚରାଇ ଯାଇଥିଲା । ଉଭଣୀଙ୍କୁ ସେଠାରେ ଦେଖି ପ୍ରତିଶୋଧ ନେବା ପାଇଁ କିଛି ସାଙ୍ଗଙ୍କୁ ଫୋନ କରି ଡକାଇ ଥିଲା । ସମସ୍ତେ ମିଶି ମଦ ପିଇବା ପରେ ପରେଶଙ୍କ ସାଙ୍ଗ ମାନେ ପୁଷ୍ପାଞ୍ଜଳିଙ୍କୁ ଗଣଦୁଷ୍କର୍ମ କରିଥିଲେ । ପୁଷ୍ପାଞ୍ଜଳି ଚିତ୍କାର କରିବାରୁ ପରେଶ ତାର ତଣ୍ଟି ଚିପି ଦେଇଥିଲେ । ମୂର୍ଚ୍ଛା ପରେ ପୁଷ୍ପାଞ୍ଜଳି ଡାଳ କାଟିବା ପାଇଁ ଆଣିଥିବା ଟାଙ୍ଗିଆରେ ତାଙ୍କୁ ହତ୍ୟା କରିଥିଲେ । ସମସ୍ତେ ମିଶି ମୃତଦେହକୁ ପାହାଡ ଖୋଲରେ ପକାଇ ଦେଇଥିଲେ । ଝିଅ ଘରକୁ ନ ଆସିବାରୁ ବାପା ଖୋଜାଖୋଜି କରି କୌଣସି ସନ୍ଧାନ ପାଇନଥିଲେ ।
୬ ତାରିଖରେ ପରେଶ ଭଉଣୀଙ୍କ ନିଖୋଜ ନେଇ ଚକାପାଦ ଥାନାରେ ଏତଲା ଦେଇଥିଲେ । ୧୩ ତାରିଖ ଦିନ ଘଟଣାରେ ସଂପୃକ୍ତ ପରେଶର ଜଣେ ସାଙ୍ଗ ଆସି ଏହି ଘଟଣାକୁ ନେଇ ପାଟିତୁଣ୍ଡ କରିବା ସହ ହତ୍ୟା ଧମକ ଦେଇଥିଲା ।