ନୂଆଦିଲ୍ଲୀ: କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ରାଜସ୍ଥାନରୁ ରାଜ୍ୟସଭା ଯିବା ନିଶ୍ଚିତ ହୋଇଯାଇଛି । ସୋନିଆ ଗାନ୍ଧୀ ବୁଧବାର (ଫେବୃଆରୀ ୧୪) ନାମାଙ୍କନ ଭରିବେ । ଏହି ସମୟରେ ତାଙ୍କ ସହିତ ମଲ୍ଲିକାର୍ଜୁନ ଖଡ଼ଗେ ଏବଂ ରାହୁଲ ଗାନ୍ଧୀ ଉପସ୍ଥିତ ରହିବେ ବୋଲି ଜଣାପଡ଼ିଛି ।
ଦେଶର ୧୫ ରାଜ୍ୟରେ ୫୬ଟି ରାଜ୍ୟସଭା ଆସନରେ ନିର୍ବାଚନ ହେବାକୁ ଯାଉଛି । ଫେବୃଆରୀ ୨୭ରେ ନିର୍ବାଚନ ହେବାକୁ ଥିବା ବେଳେ ରାଜସ୍ଥାନର ୩ଟି ଆସନରେ ମତଦାନ ହେବ । ରାଜ୍ୟସଭା ନିର୍ବାଚନ ଲାଗି ଜାନୁଆରୀ ୨୯ରେ ବିଜ୍ଞପ୍ତି ଆସିଥିଲା ଏବଂ ନାମାଙ୍କନ ପ୍ରକ୍ରିୟା ଆରମ୍ଭ ହୋଇଯାଇଛି ।
ଏହା ପୂର୍ବରୁ ରାଜସ୍ଥାନରୁ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ ରାଜ୍ୟସଭା ଯାଇଥିଲେ । ହେଲେ ଏଥର ସେ ଆଉ ଥରେ ରାଜ୍ୟସଭା ଯିବାକୁ ରାଜି ନାହାନ୍ତି । ସେପଟେ ମନମୋହନ ସିଂହଙ୍କ କାର୍ଯ୍ୟକାଳ ଶେଷ ହେଉଥିବାରୁ ଏହି ଆସନ ଖାଲି ହେବାକୁ ଯାଉଛି । ଏହି ଆସନରୁ କଂଗ୍ରେସ ପକ୍ଷରୁ ସୋନିଆ ଗାନ୍ଧୀଙ୍କ ନାଁ ଘୋଷଣା କରାଯାଇଛି ।
ଯେଉଁ ୫୬ ଟି ରାଜ୍ୟସଭା ଆସନରେ ନିର୍ବାଚନ ହେବାକୁ ଯାଉଛି ସେଥିମଧ୍ୟରୁ ୧୦ଟି କଂଗ୍ରେସ ଲାଗି ସୁରକ୍ଷିତ । ଏହି ସିଟ୍ ମଧ୍ୟରୁ ରାଜସ୍ଥାନର ମଧ୍ୟ ଗୋଟିଏ ସିଟ୍ କଂଗ୍ରେସ ଖାତାକୁ ଆସିବ । ଆଉ ଏହି ଆସନରୁ ରାଜ୍ୟସଭା ଯିବେ ସୋନିଆ ଗାନ୍ଧୀ ।
