ମାଲକାନଗିରି,୨୮/୧(ରତ୍ନାକର ଦାଶ) : ପରୀକ୍ଷାମୁଳକ ଭାବେ ବଣ୍ଡା ଘାଟିରେ ହେଉଛି ଷ୍ଟ୍ରବେରୀ ଚାଷ । ଏହି ଚାଷ କରି ସ୍ୱାବଲମ୍ବୀ ହେବାକୁ ଯାଉଛନ୍ତି ଆଦିମ ବଣ୍ଡା ଜନଜାତି । ଏକଦା ଦୁର୍ଗମ ଅପହଞ୍ଚ ମାଓଗଡ଼ ଭାବେ ପରିଚିତ ଥିବା ବଣ୍ଡଘାଟି ଏବେ ବିକାଶ ପଥରେ ଆଗେଇ ଚାଲିଛି । ବଣ୍ଡା ଘାଟିର ଜଳବାୟୁ ଶୀତଳ ଅଞ୍ଚଳ ହୋଇଥିବାରୁ ଏଠାରେ ପରୀକ୍ଷା ମୂଳକ ଭାବେ ଆରମ୍ଭ ହୋଇଛି ଷ୍ଟ୍ରବେରୀ ଚାଷ ।

ମାଲକାନଗିରି ଜିଲ୍ଲା ଖଇରପୁଟ ବ୍ଲକ ଅନ୍ତର୍ଗତ ମୁଦୁଲିପଡ଼ା ବଣ୍ଡା ଘାଟିରେ ଷ୍ଟ୍ରବେରୀ ଫଳୁଥିବା ଦେଖିବାକୁ ମିଳିଛି। ସମୁଦ୍ର ପତନଠାରୁ ୫ହଜାର ଫୁଟ ଉଚ୍ଚତାରେ ବଣ୍ଡାଘାଟି ଅବସ୍ଥିତ ଥିବାରୁ ସର୍ବଦା ଏଠାରେ ଥଣ୍ଡା ତାପମାତ୍ରା ଅଧିକ ରହିଥାଏ । ଫଳରେ ଏଠାରେ ଷ୍ଟ୍ରବେରୀ ଚାଷର କରିବା ପାଇଁ ଉପଯୁକ୍ତ ବାତାବରଣ ଦେଖିବାକୁ ମିଳିଛି । ଏହା ହିମାଚଳ ପ୍ରଦେଶ  ମହାବଲିପୁରମ୍ରୁ ୱଣ୍ଟରଡନ କିସମର ଷ୍ଟ୍ରବେରୀ ଚାରା ଅଣାଯାଇ ଓପିଲିପି ସଂସ୍ଥା ମାଧ୍ୟମରେ ଦୁର୍ଗମ ବଣ୍ଡାପଡ଼ା ଗାଁର ଦୁଇଜଣ ଚାଷୀ ଲଛିମ୍ ମୁଦୁଲି ଓ ମଙ୍ଗଳା ମୁଦୁଲିଙ୍କୁ ପ୍ରଥମ ପର୍ଯ୍ୟାୟରେ ଏକ ଏକର ଜମି ପାଇଁ ଚାରା ପ୍ରଦାନ କରାଯାଇଥିଲା।

ଏହା ସହିତ ଚାଷ ଉପୋଜଗି ନିମନ୍ତେ ଏକ କିଲୋମିଟର ଦୂରରୁ ପାଇପ୍ ଯୋଗେ ପାଣି ଆଣି ବୁନ୍ଦା ଜଳସେଚନ ସହ, ଜମି ମରାମତିର ବ୍ୟବସ୍ଥା କରାଯାଇଥିଲା । ଏଥି ନିମନ୍ତେ ତିନିଲକ୍ଷ କୋଡ଼ିଏ ହଜାର ଟଙ୍କା ଓପିଲିପି ପକ୍ଷରୁ ସହଯୋଗ କରାଯାଇଛି। ଏହା ଗୋଟିଏ ଏକର ଜମିରୁ କୁଇଣ୍ଟାଲ୍ ପିଛାସାତ ହଜାର କେଜି ଅମଳ ହେବାର ଆକଳନ କରାଯାଇଛି । ଫଳରେ ଏହାର ଆନୁମାନିକ ବଜାର ମୂଲ୍ୟ କେଜି ୩ସହ ଟଙ୍କା ହିସାବରେ ୨୧ ଲକ୍ଷ ଟଙ୍କା ହେବାର ସମ୍ଭାବନା ରହିଛି । 

ବିଭିନ୍ନ ସରକାରୀ ସଂସ୍ଥାକୁ ବିକ୍ରୟ ପାଇଁ ଚୁକ୍ତି କରାଯାଇଛି। ବିଡିଏ ସଂସ୍ଥାର କୃଷି ଅଧିକାରୀ ଅମିତ୍ କୁମାର ପ୍ରଧାନ ଚାଷୀଙ୍କୁ ସହଯୋଗ କରୁଥିବା ବେଳେ ପ୍ରକଳ୍ପ ସଂଯୋଜକ ଅଜିତ କୁମାର ସାହୁ ଚାରା ଯୋଗାଇବା ଠାରୁ ଚାଷୀଙ୍କୁ ଉତ୍ସାହିତ ଓ ବଜାରି କାରଣ ନିମନ୍ତେ ସମ୍ପୂର୍ଣ ସହଯୋଗ କରିଥିଲେ। ଆଗାମୀ ଦିନରେ ସେହି ଅଞ୍ଚଳରେ କିପରି ଅଧିକରୁ ଅଧିକ ଚାଷୀ ଷ୍ଟ୍ରବେରୀ ଚାଷ କରି ଲାଭବାନ ହେବା ସହ ବଜାରିକରଣ ପାଇଁ ରାସ୍ତା ଖୋଲିବ ବୋଲି ବିଡିଏ ସଂସ୍ଥା ଅଧିକାରୀ ସଲମନ ରାଇକା ମତ ଦେଇଛନ୍ତି। ବଣ୍ଡା ଘାଟିରେ ଷ୍ଟ୍ରବେରୀ ଫଳିବା ଜାଣି ବିଭିନ୍ନ ସ୍ଥାନରୁ ଏହାକୁ ଦେଖିବା ପାଇଁ ପ୍ରତିଦିନ ଲୋକଙ୍କ ଭିଡ଼ ଲାଗିଯାଇଛି। କ୍ଷେତରେ ନାଲି ରଙ୍ଗର ଷ୍ଟ୍ରବେରୀ ଫଳିବା ଦେଖି ଚାଷୀ ଲଛିମ୍ ମୁଦୁଲି ଓ ମଙ୍ଗଳା ମୁଦୁଲିଙ୍କ ପରିବାର ଲୋକେ ଖୁସି ହୋଇଯାଇଛନ୍ତି । ପରିବାର ବଣ୍ଡା ମହିଳାମାନେ ଝୁଡ଼ି ପାଛିଆ ଧରି ଜମିକୁ ଯାଇ ପାଚଲା ଷ୍ଟ୍ରବେରୀ ଫଳ ତୋଳୁଥିବାର ଦେଖିବାକୁ ମିଳିଛି।