କୋଲକାତା, ୧୨।୨: ପ୍ରାୟ ପ୍ରତ୍ୟେକ ଭାରତୀୟଙ୍କ ପସନ୍ଦ ଚା’ । ଅନେକ ଲୋକଙ୍କ ସକାଳ କପେ ଚା’ରୁ ହିଁ ଆରମ୍ଭ । ନିକଟରେ ଅନେକ ଚା’ ଦୋକାନୀଙ୍କ ଫଟୋ ଓ ଭିଡିଓ ଭାଇରାଲ ହେଉଥିବାର ଦେଖାଯାଉଛି । ଯେପରିକି ଏମବିଏ ଚାଏବାଲା, ଡଲି ଚାଏବାଲା । ଠିକ୍ ସେହିପରି ନିକଟରେ କୋଲକାତାର ଜଣେ ଚା’ ଦୋକାନୀଙ୍କ ଚା’ ଚର୍ଚ୍ଚାରେ ରହିଛି । ସାଧାରଣତଃ ରାସ୍ତା କଡ଼ରେ ଗୋଟିଏ କପ୍ ଚା’ ର ଦାମ୍ ୫ ଟଙ୍କା ହୋଇଥିବା ବେଳେ ସର୍ବାଧିକ ୧୫ ଟଙ୍କା ଯାଏ ଥାଏ । କିନ୍ତୁ, ପଶ୍ଚିମବଙ୍ଗର ରାଜଧାନୀ କୋଲକାତାର ମୁକୁନ୍ଦପୁରରେ ବିକ୍ରି ହେଉଛି ହଜାରେ ଟଙ୍କିଆ ଚା’ । ଏଠାରେ କପେ ଚା’ ର ଦାମ୍ ୧୦୦୦ ଟଙ୍କା । ଭାରତର ସବୁଠାରୁ ଦାମୀ ଚା’ ଭାବେ ଖ୍ୟାତ । ଚା’ ର ଦାମ୍ ଶୁଣି ନିଶ୍ଚୟ ଆଶ୍ଚର୍ଯ୍ୟ ଲାଗୁଥିବ । କିନ୍ତୁ, ଏହା ସତ ।
ଏଠାରେ ଚା’ ବିକ୍ରି କରନ୍ତି ପ୍ରତିମ ଗାଙ୍ଗୁଲୀ । ପ୍ରତିମଙ୍କ ଚା’ ଦୋକାନରେ ୧୨ ଟଙ୍କାରୁ ଆରମ୍ଭ କରି ହଜାରେ ଟଙ୍କା ଦାମ୍ର ଚା’ ମିଳୁଛି । ଚା’ ଦାମ୍ ୧୦୦ ଟଙ୍କା ହେଲେ ବି ଚା’ ପିଇବା ପାଇଁ ପ୍ରତିଦିନ ପ୍ରତିମଙ୍କ ଦୋକାନରେ ଗ୍ରାହକଙ୍କ ଭିଡ଼ ଦେଖିବାକୁ ମିଳେ । ପ୍ରତିମଙ୍କ ରାସ୍ତା କଡ଼ରେ ନିଜ ଦୋକାନ ଖୋଲିଛନ୍ତି । କୋଲକାତା ବୁଲିବାକୁ ଆସୁଥିବା ଦେଶ ବିଦେଶର ପର୍ଯ୍ୟଟକ ପ୍ରତିମଙ୍କ ଦୋକାନରେ ଚା’ ପିଇବାକୁ ପସନ୍ଦ କରନ୍ତି । କେବଳ ସେତିକି ନୁହେଁ, ଚା’ ବିକି ପ୍ରତିମ ଏବେ କୋଟିପତି ପାଲଟିଛନ୍ତି । ପ୍ରତିମଙ୍କ ଦୋକାନରେ ବୋ-ଲେ ଚା’ କପ୍ର ଦାମ୍ ହଜାରେ ଟଙ୍କା ରହିଛି । ସେହିଭଳି ବୋ-ଲେ ଚା’ ପତିର ଦାମ୍ କିଲୋଗ୍ରାମ୍ ପିଛା ୩ ଲକ୍ଷ ଟଙ୍କା ରହିଛି । ଏହା ବ୍ୟତୀତ ଦୋକାନରେ ସିଲଭର୍ ନିଡଲ୍ ହ୍ୱାଇଟ୍ ଚା’, ଲାଭେଣ୍ଡର ଚା’, ହିବିସକସ୍ ଚା’, ୱାଇନ୍ ଚା’, ତୁଳସୀ ଜିଞ୍ଜର ଚା’ ଆଦି ମିଳିଥାଏ ।