ନୂଆଦିଲ୍ଲୀ, ୧୭/୦୯: ସାଟେଲାଇଟ୍ ଇଣ୍ଟରନେଟ୍ ଯୋଗାଉଥିବା ଏଲନ ମସ୍କଙ୍କ କମ୍ପାନୀ ‘ଷ୍ଟାରଲିଙ୍କ’ ଭାରତରେ ଲଞ୍ଚ ହେବାକୁ ଯାଉଛି । ବିନା ଲାଇସେନ୍ସରେ ସେବା ଯୋଗଉଥିବା ଅଭିଯୋଗରେ ଭାରତରେ ଷ୍ଟାରଲିଙ୍କକୁ ବ୍ୟାନ କରାଯାଇଥିଲା । ହେଲେ ଏବେ ଏଲନ ମସ୍କ ସମ୍ବନ୍ଧିତ ମନ୍ତ୍ରାଳୟରୁ ଅନୁମତି ନେଇ ଭାରତୀୟ ବଜାରରେ ପ୍ରବେଶ କରିବାକୁ ଯାଉଛନ୍ତି । ଷ୍ଟାରଲିଙ୍କ ଆସିବା ପରେ ଜିଓ ଏବଂ ଏୟାରଟେଲ୍ ପାଇଁ ଚିନ୍ତା ବୃଦ୍ଧି ପାଇବ ବୋଲି କୁହାଯାଉଛି ।
ଉଭୟ ଜିଓ ଏବଂ ଏୟାରଟେଲ୍ ମଧ୍ୟ ସାଟେଲାଇଟ୍ ଇଣ୍ଟରନେଟ୍ ରେସ୍ରେ ସାମିଲ ହୋଇଛନ୍ତି । ଇଣ୍ଟରନେଟ୍ ସ୍ପିଡ୍କୁ ନେଇ ହେଉଥିବା ଚର୍ଚ୍ଚା ମଧ୍ୟରେ ଷ୍ଟାରଲିଙ୍କ ସାଟେଲାଇଟ୍ ଇଣ୍ଟରନେଟ୍ ସ୍ପିଡ୍ ୧.୫-୨ ଜିବିପିଏସ୍ ରହିବ ବୋଲି କୁହାଯାଉଛି। ସାଟେଲାଇଟ୍ ଇଣ୍ଟରନେଟ୍ ସେବା ହୋଇଥିବାରୁ ଏହାର କନେକ୍ସନ ପାଇଁ ଟାଓ୍ବାରର ଆବଶ୍ୟକତା ରହିବ ନାହିଁ। ପାହାଡ଼ିଆ ଅଞ୍ଚଳ ହେଉ କି ବିଚ୍ଛିନ୍ନାଞ୍ଚଳ ସବୁଠି ଇଣ୍ଟରନେଟ ସେବା ଯୋଗାଇ ହେବ ।
ବର୍ତ୍ତମାନ ସମୟରେ ବିଶ୍ବର ୪୦ରୁ ଅଧିକ ଦେଶରେ ଷ୍ଟାରଲିଙ୍କ ଇଣ୍ଟରନେଟ୍ ସଂଯୋଗ ରହିଛି । ଏଲନ ମସ୍କଙ୍କ ଷ୍ଟାରଲିଙ୍କ ସର୍ଭିସ୍ ମାଧ୍ୟମରେ ଏକ ରାଉଟର, ପାଓ୍ବାର ସପ୍ଲାଇ, କେବଲ ଏବଂ ମାଉଣ୍ଟିଂ ଟ୍ରାଇପଡ୍ ଦିଆଯାଉଛି । ରାଉଟର ସାଟେଲାଇଟ ସହ କନେକ୍ଟ ଥାଏ । ୨୦୨୧ରେ ବିନା ଲାଇସେନ୍ସରେ ଷ୍ଟାରଲିଙ୍କ ସେବା ଯୋଗାଇବା ଆରମ୍ଭ କରିଥିଲା । ଏପରିକି ସିକ୍ୟୁରିଟି ପାଇଁ ଅଧିକ ଟଙ୍କା ଚାର୍ଜ କରୁଥିଲା । କିନ୍ତୁ ଭାରତ ସରକାରଙ୍କ ପକ୍ଷରୁ ଅନୁମତି ନମିଳିବାରୁ ଏଲନ ମସ୍କଙ୍କୁ ପ୍ରୋଜେକ୍ଟ ବନ୍ଦ କରିବାକୁ ପଡ଼ିଥିଲା । ଏହା ସହ ଭାରତୀୟଙ୍କ ଟଙ୍କା ଫେରସ୍ତ କରିଥିଲେ ମସ୍କ ।
