ଜି.ଉଦୟଗିରି,୮/୧୨ : ସ୍ଥାନୀୟ ବ୍ଲକ ଅନ୍ତର୍ଗତ ଲିଙ୍ଗାଗଡ଼ ପଞ୍ଚାୟତର ନିଲୁଙ୍ଗିଆଠାରେ ଦୁଇଟି ବାଇକ୍ ମୁହାଁମୁହିଁ ଧକ୍କା ହେବା ଫଳରେ ଜଣଙ୍କର ମୃତ୍ୟୁ ହୋଇଥିବାବେଳେ ୩ଜଣ ଆହତ ହୋଇଛନ୍ତି । 

ସୂଚନା ଅନୁସାରେ, କେ ନୂଆଗାଁ ବ୍ଲକ ବିରନ୍ଦାପଡ଼ା ଗ୍ରାମର ଚିତ୍ତରଞ୍ଜନ ପ୍ରଧାନ(୩୧) ଓ ଜି.ଉଦୟଗିରି ବ୍ଲକ ଅନ୍ତର୍ଗତ କତିଙ୍ଗିଆ ଗ୍ରାମର ବୈକୁଣ୍ଠ ପ୍ରଧାନ(୩୨) କତିଙ୍ଗିଆଠାରୁ ଏକ ବାଇକ(ଓଡି ୦୨-ବିଏମ-୭୭୩୭) ଯୋଗେ କତିଙ୍ଗିଆରୁ ଜି.ଉଦୟଗିରି ଆସୁଥିଲେ ।   ନିଲୁଙ୍ଗିଆଠାରେ ଜି.ଉଦୟଗିରିରୁ ରାଇକିଆ ଆଡ଼କୁ ଅନ୍ୟ ଏକ ବାଇକ(ଓଡି- ୧୩--୦୫୨୩) ଯୋଗେ ଆସୁଥିବା ରାଜୀବ ପ୍ରଧାନ (୨୮) ଓ ଜ୍ଞାନଚନ୍ଦ୍ର ପ୍ରଧାନ (୪୫)ଙ୍କ ସହ ତାଙ୍କର ମୁହାଁମୁହିଁ ଧକ୍କା ହୋଇଥିଲା I ସ୍ଥାନୀୟ ଲୋକେ ତୁରନ୍ତ ୧୦୮ଆମ୍ବୁଲାନ୍ସକୁ ଯୋଗାଯୋଗ କରିଥିଲେ ମଧ୍ୟ ଏହା ସମ୍ଭବ ନ ହେବାରୁ ୧୧୨ ନଂକୁ ଯୋଗାଯୋଗ କରାଯାଇଥିଲା। ପରେ ଘଟଣାସ୍ଥଳରେ ଆମ୍ବୁଲାନ୍ସ ପହଞ୍ଚି ଆହତଙ୍କୁ ଉଦ୍ଧାର କରି ସ୍ଥାନୀୟ ସ୍ଵାସ୍ଥ୍ୟ କେନ୍ଦ୍ର ଆଣିଥିଲେ । ତେବେ ଡାକ୍ତର ବୈକୁଣ୍ଠ ପ୍ରଧାନଙ୍କୁ ମୃତ ଘୋଷଣା କରିଥିଲେ । ଅନ୍ୟମାନେ ସେଠାରେ ଚିକିତ୍ସିତ ହେଉଛନ୍ତି। ଘଟଣା ସ୍ଥଳରେ ସ୍ଥାନୀୟ ଥାନା ଭାରପ୍ରାପ୍ତ ଅଧିକାରୀ ଅଜୟ ସ୍ୱାଇଁ ଏବଂ ଟିମ୍ ପହଞ୍ଚି ଦୁର୍ଘଟଣା ଗ୍ରସ୍ତ ବାଇକ୍ ଦୁଇଟିକୁ ଜବତ କରିବା ସହ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ଅଧିକ ତଦନ୍ତ କରୁଥିବା ଜଣାପଡ଼ିଛି ।