ଚୌଦ୍ବାର,୧୧।୮ :  ଡମଡମଣି ଡ୍ୟାମରେ  ପୁଣି ଅଘଟଣ l  ଡ୍ୟାମକୁ ବୁଲିବାକୁ ଆସି ଗାଧୋଇବା ବେଳେ ବୁଡିଯାଇ  ଜଣେ ଯୁବକର ମୃତ୍ୟୁ ହୋଇଛି। ମୃତ ଯୁବକ କଟକ ଜିଲ୍ଲା କନ୍ଦରପୁର ବିରିବାଟି  ଅଞ୍ଚଳର ବୋଲି ଜଣାପଡିଛି। 

ଡମଡମଣି ଡ୍ୟାମକୁ ୪ ଜଣ ସାଙ୍ଗ ରବିବାର ବୁଲିବାକୁ ଆସିଥିଲେ।  ଡ୍ୟାମରେ ଗାଧୋଉଥିବା ବେଳେ ଗୋଡ଼ ଖସିଯିବାରୁ ଜଣେ ସାଙ୍ଗ ପାଣିରେ ବୁଡି ଯାଇଥିଲା। ପାଖରେ ଥିବା ସ୍ଥାନୀୟ ଯୁବକ ପୋଲିସକୁ ଖବର ଦେଇଥିଲେ। ପରେ ସ୍ଥାନୀୟ ପୋଲିସ ଓ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚିଥିଲେ l ଅଗ୍ନିଶମ ବାହିନୀର  ସ୍କୁବା ଡ୍ରାଇଭ୍ ସାହାଯ୍ୟରେ ୧୦ ମିନିଟ୍ ମଧ୍ୟରେ ଯୁବକଙ୍କ ମୃତଦେହ ଡ୍ୟାମରୁ ଉଦ୍ଧାର କରାଯାଇଥିଲା । ମୃତଦେହ ବ୍ୟବଚ୍ଛେଦ ପାଇଁ କଟକ ବଡ଼ ମେଡିକାଲକୁ ପଠା ଯାଇଛି l  

ସୂଚନାଯୋଗ୍ୟ ଯେ, ଗତ ଜୁଲାଇ ୨୪ ତାରିଖରେ ମଧ୍ୟ ଡମଡମଣୀ ଡ୍ୟାମରେ  ବୁଡିଯାଇ ୨ ଜଣଙ୍କ ମୃତ୍ୟୁ ହୋଇଥିଲା। କଟକ ଷ୍ଟୁଆର୍ଟ କଲେଜରୁ ୫ ଜଣ ସାଙ୍ଗ ଡମଡମଣୀ ଡ୍ୟାମ ବୁଲିବାକୁ ଆସିଥିଲେ। ସେମାନେ ଗାଧୋଉଥିବା ବେଳେ ୨ ଜଣ ବୁଡିଯାଇଥିଲେ। ଅଗ୍ନିଶମ ବାହିନୀ ପହଞ୍ଚି ଡ୍ୟାମରୁ ୨ ଜଣଙ୍କ ମୃତଦେହ ଉଦ୍ଧାର କରିଥିଲେ।