କୋଲାକାତା: କୋଲକାତାର ଆରଜି କର ମେଡିକାଲ କଲେଜ ଏବଂ ହସ୍ପିଟାଲରେ ଜଣେ ମହିଳା ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାକୁ ନେଇ ଦେଶରେ ବିବାଦ ବୃଦ୍ଧି ପାଇଛି । ଏହାକୁ ନେଇ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ମଧ୍ୟ ଲୋକେ ଟାର୍ଗେଟ କରୁଛନ୍ତି। ଏହାରି ଭିତରେ ମମତା ବାନାର୍ଜୀଙ୍କ ବିରୋଧରେ ସୋସିଆଲ ମିଡିଆରେ ହିଂସା ଉଦ୍ରେକକାରୀ ପୋଷ୍ଟ କରି ଫସିଛନ୍ତି ଜଣେ ବିକମ୍ ଦ୍ବିତୀୟ ବର୍ଷର ଛାତ୍ର । ହିଂସାତ୍ମକ ପୋଷ୍ଟ କରିଥିବାରୁ ତାଙ୍କୁ କୋଲକାତା ପୋଲିସ ଗିରଫ କରିଛି ।
ଅଭିଯୁକ୍ତ ଛାତ୍ର କିର୍ତ୍ତୀ ଶର୍ମା ‘କିର୍ତ୍ତୀ ସୋସିଆଲ’ ନାମକ ଇନଷ୍ଟାଗ୍ରାମ ହ୍ୟାଣ୍ଡେଲରୁ ମମତା ବାନାର୍ଜୀଙ୍କ ହତ୍ୟା କରିବା ଲାଗି ଅନ୍ୟ ୟୁର୍ଜସଙ୍କୁ ଉସୁକାଇଥିବା ଅଭିଯୋଗ ହୋଇଛି । ଏହା ବ୍ୟତୀତ ଅଭିଯୁକ୍ତଜଣକ ଦୁଷ୍କର୍ମ ପରେ ହତ୍ୟା କରାଯାଇଥିବା ୩୧ ବର୍ଷୀୟା ଡାକ୍ତରଙ୍କ ପରିଚୟ ଏବଂ ଫଟୋଗ୍ରାଫ ଶେୟାର କରିଥିଲା ବୋଲି ପୋଲିସ କହିଛି । ଏନେଇ କୋଲକାତା ପୋଲିସ ଏକ ବିବୃତ୍ତି ଜାରି କରିଛି ।
ପୋଲିସ ପକ୍ଷରୁ କୁହାଯାଇଛି ଯେ, କିର୍ତ୍ତୀ ସୋସିଆଲ ଇନଷ୍ଟାଗ୍ରାମ ଆଇଡି ଆରଜି କର ମେଡିକାଲ କଲେଜ ଏବଂ ହସ୍ପିଟାଲ ମାମଲାରେ ୩ଟି ପୋଷ୍ଟ କରିଥିଲା । ପୋଷ୍ଟ ଜରିଆରରେ ଦୁଷ୍କର୍ମ ପୀଡ଼ିତାଙ୍କ ପରିଚୟ ଏବଂ ଫେଟୋ ଶେୟାର କରାଯାଇଥିଲା । ଅଭିଯୁକ୍ତ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଜୀବନ ପ୍ରତି ବିପଦ ସୃଷ୍ଟି କଲା ଭଳି ଦୁଇଟି ଷ୍ଟୋରୀ ଶେୟାର କରିଥିଲା’
ଦୁଷ୍କର୍ମ ଓ ହତ୍ୟା ମାମଲା ପରେ କୋଲକାତା ପୋଲିସ ସୋସିଆଲ ମିଡିଆ ପୋଷ୍ଟ ଉପରେ ବିଶେଷ ଧ୍ୟାନ ରଖିଛି । ଏପରିକି କୋଲକାତା ପୋଲିସ କମିଶନରଙ୍କ ବିରୋଧରେ ସିବିଆଇ ତଦନ୍ତ ଦାବି କରିଥିବା ଟିଏମସି ସାଂସଦ ଶୁଖେନ୍ତୁ ଶେଖର ରାୟଙ୍କ ନୋଟିସ ପଠାଯାଇଛି । ଏହା ବ୍ୟତୀତ ପୀଡ଼ିତାଙ୍କ ପରିଚୟ ପ୍ରଘଟ କରିଥିବା ଅଭିଯୋଗରେ ବିଜେପି ସାଂସଦ ଲକେଟ ଚାଟାର୍ଜୀ ଏବଂ ଦୁଇ ବରିଷ୍ଠ ଡାକ୍ତରଙ୍କୁ ସମନ ପଠାଇଛି କୋଲକାତା ପୋଲିସ ।
