ନୂଆଦିଲ୍ଲୀ: ମାଲାୟାଲମ ଫିଲ୍ମ ଅଭିନେତା ନିର୍ମଳ ବେନ୍ନିଙ୍କ ହୃଦଘାତରେ ମୃତ୍ୟୁ । ୩୭ ବର୍ଷ ବୟସରେ ମୃତ୍ୟୁବରଣ କରିଛନ୍ତି ଅଭିନେତା ନିର୍ମଳ ବେନ୍ନି । ‘ଆମେନ’ ଚଳଚ୍ଚିତ୍ରରେ କୋଚାନ ଚରିତ୍ରରେ ଅଭିନୟ କରି ଦର୍ଶକୀୟ ଆଦୃତି ପାଇଥିବା ନିର୍ମଳଙ୍କ ଅକାଳ ବିୟୋଗ ନେଇ ଖବର ଦେଇଛନ୍ତି ପ୍ରଯୋଜକ ସଞ୍ଜୟ ପଡ଼ିୟୁର ।
ସୋସିଆଲ ମିଡିଆରେ ସଞ୍ଜୟ ସୂଚନା ଦେଇ ଲେଖିଛନ୍ତି, ‘ଗୁଡବାଏ ଟୁ ମାଇ ଡିୟର ଫ୍ରେଣ୍ଡ…ଆମେନି ଧରମର ମୁଖ୍ୟ ଭୂମିକାରେ ଅଭିନୟ କରିଥିଲେ ନିର୍ମଳ ବେନ୍ନି । ଆଜି ସକାଳେ ହୃଦଘାତରେ ତାଙ୍କର ମୃତ୍ୟୁ ଘଟିଛି । ତାଙ୍କ ଅମର ଆତ୍ମାର ସଦ୍ଗତି କାମନା କରୁଛି ।’
ସଞ୍ଜୟ ବେନ୍ନିଙ୍କ ମୃତ୍ୟୁ ଖବର ମାଲାୟାଲମ ଚଳଚ୍ଚିତ୍ର ଜଗତକୁ ଦୋହଲାଇ ଦେଇଛି । ବହୁ ବିଶିଷ୍ଟ ବ୍ୟକ୍ତିତ୍ବ ଅଭିନେତାଙ୍କ ମୃତ୍ୟୁରେ ଶୋକ ପ୍ରକାଶ କରିଛନ୍ତି । ତେବେ ନିର୍ମଳ ବେନ୍ନିଙ୍କ ଫିଲ୍ମ କ୍ୟାରିୟର କଥା କହିଲେ, ସେ ଜଣେ କମେଡିଆନ ଭାବରେ ଚଳଚ୍ଚିତ୍ର ଦୁନିଆରେ ପାଦ ଥାପିଥିଲେ । ପରେ ୟୁଟ୍ୟୁବ ଭିଡିଓ ଏବଂ ଷ୍ଟେଜ୍ ଶୋ’ ମାଧ୍ୟମରେ ଲୋକପ୍ରିୟତା ପାଇଥିଲେ ନିର୍ମଳ । ସେ ୨୦୧୨ରେ ‘ନବାଗାଥରକୁ ସ୍ବାଗତମ’ ମାଧ୍ୟମରେ ଫିଲ୍ମରେ ଡେବ୍ୟୁ କରିଥିଲେ । ନିଜ ଜୀବନ କାଳରେ ନିର୍ମଳ ବେନ୍ନି ୫ଟି ଫିଲ୍ମରେ ଅଭିନୟ କରିଛନ୍ତି । ସେଥିମଧ୍ୟରୁ ଆମେନ ଚଳଚ୍ଚିତ୍ର ବକ୍ସଅଫିସ୍ରେ ହିଟ ସାବ୍ୟସ୍ତ ହୋଇଥିଲା ।
