କୋଣାର୍କ,୩।୮(ଆପ୍ର) କୋଣାର୍କ ଏନ୍ଏସିରେ  ଉନ୍ନୟନମୂଳକ କାର୍ଯ୍ୟରେ କୋଟି କୋଟି ଟଙ୍କାର ଦୁର୍ନୀତି ହୋଇଥିବା ଅଭିଯୋଗ ହୋଇଛି। ବିନା ଟେଣ୍ଡରରେ ଗୋଟିଏ ନିର୍ଦ୍ଦିଷ୍ଟ ଘରୋଇ ସଂସ୍ଥାକୁ ଅନୁକମ୍ପା ଦେଖାଇ କୋଟି କୋଟି ଟଙ୍କାର ଏକାଧିକ କାମ ଦିଆଯାଇ ଅର୍ଥ ହରିଲୁଟ ହୋଇଥିବା ଏନ୍ଏସିର ୫ନମ୍ଵର ୱାର୍ଡ କାଉନସିଲର ଇଂ ନିହାର ରଂଜନ ବେଉରା ମୁଖ୍ୟମନ୍ତ୍ରୀଙ୍କ ନିକଟରେ ଅଭିଯୋଗ କରିଛନ୍ତି। 

 ଗତ ଜାନୁଆରୀ ମାସରେ କୋଣାର୍କ ଏନ୍ଏସିରେ ୩ଟି ପ୍ରବେଶ ପଥ ତୋରଣ ଲଗାଇବା ନିମନ୍ତେ ପ୍ରାୟ ଏକ କୋଟି ଟଙ୍କା, ଡିଜିଟାଲ ଏଲ୍ଇଡି ବିଜ୍ଞାପନ ବୋର୍ଡ ନିମନ୍ତେ ୯୭ ଲକ୍ଷ ଟଙ୍କା, ତ୍ରିରଙ୍ଗା ଫ୍ଲେକ୍ସିବୁଲ ଏଲ୍ଇଡି ଲାଇଟ୍ ନିମନ୍ତେ ପ୍ରାୟ ୧୫ଲକ୍ଷ ଟଙ୍କା କଲ୍ ନୋଟିସ୍ ମାଧ୍ୟମରେ ଏକ ଘରୋଇ ସଂସ୍ଥାକୁ ଦିଆଯାଇଥିଲା। କୋଣାର୍କ ଭୁବନେଶ୍ୱର ରାସ୍ତା ବନାଖଣ୍ଡି ଛକ ନିକଟରେ କୋଣାର୍କ ଏନ୍ଏସିର ପ୍ରବେଶ ପଥରେ ଲଗାଯାଇଥିବା ୟୁ-ପିଭିସି ଓ ଜିଆଇ ଆଙ୍ଗଲ ଗେଟ୍ ବାବଦକୁ କୋଣାର୍କ ଏନ୍ଏସି ପକ୍ଷରୁ ନିର୍ମାଣକାରୀ ସଂସ୍ଥାକୁ ୨୩ ଲକ୍ଷ ୪୩ ହଜାର ୪୬୮ଟଙ୍କା ପୈଠ କରାଯାଇଛି। କାକଟପୁର ରାସ୍ତାର କାକଟପୁର ବ୍ଲକ ଅନ୍ତର୍ଗତ ଚମ୍ପାହାର ମୌଜାଠାରେ ଆଉ ଗୋଟିଏ ଗେଟ୍ ମୂଳଦୁଆ ନିର୍ମାଣ ପରେ ଜଣାପଡିଲା ଏହା କୋଣାର୍କ ଏନ୍ଏସି ଅଞ୍ଚଳ ପରିସରଭୁକ୍ତ ନୁହେଁ। ଏଣୁ ଗତ ୧ ତାରିଖରେ ସଂପୃକ୍ତ ନିର୍ମାଣକୁ ଛାଡ଼ି ୨୦୦ଫୁଟ୍ ଦୂରରେ ଆଉ ଏକ ମୂଳଦୁଆ ନିର୍ମାଣ କରି ୟୁ-ପିଭିସି ଗେଟ୍ ଲଗାଯାଇଛି। ଚନ୍ଦ୍ରଭାଗାଠାରେ ଛଅ ଥାକିଆ ରାଜପଥ ଉପରେ ଲାଗିବାକୁ ଥିବା ପ୍ରବେଶ ପଥ ତୋରଣ ମୁଳଦୂଆ ପଡିଛି।

କାଉନସିଲର ଇଂ ନିହାର ରଞ୍ଜନ ବେଉରା ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ସାକ୍ଷାତ କରି ଅଭିଯୋଗପତ୍ର ଦେଇଛନ୍ତି। ଏହାର ଭିଜିଲାନ୍ସ ତଦନ୍ତ ପାଇଁ  ମୁଖ୍ୟମନ୍ତ୍ରୀ, ବିଭାଗୀୟ ମନ୍ତ୍ରୀ, ମୁଖ୍ୟ ଶାସନସଚିବ, ବିଭାଗୀୟ ସଚିବ ଓ ପୁରୀ ଜିଲ୍ଲାପାଳଙ୍କୁ ଲିଖିତ ଅଭିଯୋଗପତ୍ର ପ୍ରଦାନ କରାଯାଇଛି। ଖୁବଶୀଘ୍ର କଂଗ୍ରେସ ପକ୍ଷରୁ କୋଣାର୍କ ଏନ୍ଏସି କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯିବ ବୋଲି କୋଣାର୍କ ନଗର କଂଗ୍ରେସ ସଭାପତି ଉପେନ୍ଦ୍ର କୁମାର କାଣ୍ଡି ସୂଚନା ଦେଇଛନ୍ତି।