ନୂଆଦିଲ୍ଲୀ, ୨/୬ : ଦିଲ୍ଲୀର ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଆଜି ତିହାଡ଼ ଜେଲରେ ନିଜକୁ ସରେଣ୍ଡର କରିବାକୁ ପଡ଼ିବ । ଜାମିନ ଅବଧି ଶେଷ ହେବା ପରେ କୋର୍ଟରୁ କୌଣସି ଆଶ୍ବସ୍ତ ନ ମିଳିବା କାରଣରୁ କେଜ୍ରିଓ୍ବାଲ ରବିବାର ପୁଣି ଜେଲ ଫେରିଯିବେ । ସେ ୨୧ଦିନରୁ ବାହାରେ ଥିଲେ ଏବଂ ଲୋକସଭା ନିର୍ବାଚନରେ ନିଜ ଦଳ ଆପ୍ ଲାଗି ପ୍ରଚାର କରୁଥିଲେ । ସୁପ୍ରିମକୋର୍ଟ ୧୦ମଇକୁ ତାଙ୍କୁ ଅନ୍ତରୀଣ ଜାମିନକୁ ମଞ୍ଜୁରୀ ଦେଇଥିଲେ । ମାତ୍ର ପରେ କେଜ୍ରିଓ୍ବାଲ ମେଡ଼ିକାଲ ଗ୍ରାଉଣ୍ଡ ଦର୍ଶାଇ ଆଉ ସପ୍ତାହେ ପର୍ଯ୍ୟନ୍ତ ସମୟ ଦେବାକୁ ଦାବି କରିଥିଲେ । କିନ୍ତୁ ଟ୍ରାୟଲ କୋର୍ଟ ଏହି ଆବେଦନ ଉପରେ ୫ଜୁନ ପର୍ଯ୍ୟନ୍ତ ଆଦେଶକୁ ସୁରକ୍ଷିତ ରଖିଥିଲେ ।

କେଜ୍ରିଓ୍ବାଲଙ୍କୁ ୧୦ମଇରେ ୫୫ଦିନ ପରେ ଜାମିନ ମିଳିଥିଲା ଏବଂ ତିହାଡ଼ ଜେଲରୁ ବାହାରକୁ ଆସିଥିଲେ । ୨୧ମାର୍ଚ୍ଚରେ ଗିରଫ ପରେ ପ୍ରଥମେ ସେ ୧୦ଦିନ ପର୍ଯ୍ୟନ୍ତ ପ୍ରବର୍ତ୍ତନ ନିର୍ଦେଶାଳୟ (ଇଡି)ର ଜେଲରେ ରହିଥିଲେ । ପରେ ୧ ଏପ୍ରିଲରେ କୋର୍ଟ ତାଙ୍କୁ ନ୍ୟାୟିକ ଜେଲ ତିହାଡ଼କୁ ପଠାଇ ଦେଇଥିଲେ । ପରେ ୩୯ଦିନ ତିହାଡ଼ ଜେଲରେ ବିତାଇଥିଲେ । ଏବେ ପୁଣି ଥରେ କେଜ୍ରିଓ୍ବାଲଙ୍କୁ ତିହାଡ଼ ଜେଲରେ ସରେଣ୍ଡର ହେବାକୁ ପଡ଼ିବ ।