ନୂଆଦିଲ୍ଲୀ: ସେପ୍ଟେମ୍ବର ୨୧ ରେ ଆତିଶୀଙ୍କ ନେତୃତ୍ୱରେ ଦିଲ୍ଲୀରେ ଆମ୍ ଆଦମୀ ପାର୍ଟିର ସରକାର ଗଠନ ହେବ। ଆମ ଆଦମୀ ପାର୍ଟିର ବିଧାୟକ ଦଳ ନେତା ଆତିଶୀଙ୍କୁ ସେପ୍ଟେମ୍ବର ୨୧ ରେ ଏଲ.ଜି ଭି.କେ ସକ୍ସେନା ମୁଖ୍ୟମନ୍ତ୍ରୀ ପଦର ଶପଥ ପାଠ କରାଇବେ । ଏହା ସହିତ ଆମ୍ ଆଦମୀ ପାର୍ଟିର କିଛି ବିଧାୟକ ମଧ୍ୟ ମନ୍ତ୍ରୀ ଭାବେ ଶପଥ ଗ୍ରହଣ କରିବେ । ଏହି ସମୟ ମଧ୍ୟରେ ଅରବିନ୍ଦ କେଜ୍ରିୱାଲ, ମନୀଷ ସିସୋଦିଆଙ୍କ ସମେତ ଅନେକ ଆମ୍ ଆଦମୀ ପାର୍ଟି ନେତା ମଧ୍ୟ ଉପସ୍ଥିତ ରହିବେ । ସୂଚନାଥାଉକି, ଦିଲ୍ଲୀର ତୃତୀୟ ମହିଳା ମୁଖ୍ୟମନ୍ତ୍ରୀ ହେବେ ଆତିଶୀ । ସେ ହେଉଛନ୍ତି ଆମ୍ ଆଦମୀ ପାର୍ଟିର ପ୍ରଥମ ମହିଳା ନେତା ଯିଏକି ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ ।

ଏହା ପୂର୍ବରୁ ମଙ୍ଗଳବାର ଦିନ ଆତିଶୀ ଏଲ.ଜି ଭି.କେ ସାକ୍ସେନାଙ୍କୁ ଭେଟି ସରକାର ଗଠନ ପାଇଁ ଦାବି କରିଥିଲେ । ଏହା ପରେ ଏଲଜି ଭି.କେ ସକ୍ସେନା ଆତିଶୀଙ୍କୁ ସରକାର ଗଠନ କରିବାକୁ ଆମନ୍ତ୍ରଣ କରିଛନ୍ତି । କେଜ୍ରିୱାଲ ସରକାରରେ ମନ୍ତ୍ରୀ ଥିବା ନେତା ମାନଙ୍କୁ ପୁଣିଥରେ ଶପଥ ଗ୍ରହଣ କରାଯିବ ବୋଲି ବିଶ୍ୱାସ ରହିଛି । ଏହା ବ୍ୟତୀତ ଦୁଇଜଣ ନୂତନ ବିଧାୟକ ମଧ୍ୟ କ୍ୟାବିନେଟରେ ଅନ୍ତର୍ଭୁକ୍ତ ହେବେ । ଏମାନଙ୍କ ମଧ୍ୟରୁ ଜଣେ ଦଳିତ ସମ୍ପ୍ରଦାୟର ହେବେ । 

ଆମ୍ ଆଦମୀ ପାର୍ଟି ସହ ଜଡିତ ଏକ ସୂତ୍ରରୁ ପ୍ରକାଶ ଯେ ପୂର୍ବରୁ କେଜ୍ରିୱାଲ କ୍ୟାବିନେଟରେ ଅନ୍ତର୍ଭୁକ୍ତ ମନ୍ତ୍ରୀମାନେ ପୁନରାବୃତ୍ତି ହେବେ । ଏହା ନିଶ୍ଚିତ ଯେ ଗୋପାଳ ରାୟ, ଇମ୍ରାନ ହୁସେନ୍, କୈଲାଶ ଗେହଲଟ୍ ଏବଂ ସୌରଭ ଭରଦ୍ୱାଜ ପୁଣିଥରେ କ୍ୟାବିନେଟ ମନ୍ତ୍ରୀ ହେବେ । ଯଦିଓ ସରକାରୀ ଘୋଷଣା ଏପର୍ଯ୍ୟନ୍ତ ହୋଇନାହିଁ। ମୁଖ୍ୟମନ୍ତ୍ରୀଙ୍କ ସମେତ ଦିଲ୍ଲୀରେ ମୋଟ ୭ ଜଣ ମନ୍ତ୍ରୀ ହୋଇପାରନ୍ତି । ଏହା ପୂର୍ବରୁ ମଙ୍ଗଳବାର ଦିନ ଅରବିନ୍ଦ କେଜ୍ରିୱାଲ ଦିଲ୍ଲୀର ଏଲଜିଙ୍କୁ ଭେଟି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ।