ପୁରୀ,୨୧/୧୧:ପୁରୀ ବଡ଼ଦାଣ୍ଡ ପାର୍ଶ୍ୱରେ ସମସ୍ତ କୋଠାକୁ ଗୋଟିଏ ପ୍ରକାର ରଙ୍ଗ କରିବାକୁ ପ୍ରଶାସନ ନିଷ୍ପତ୍ତି ନେଇଛି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାର୍ଯ୍ୟ ଭିତରେ ଏହି ନିଷ୍ପତ୍ତି ସ୍ଥାନ ପାଇଛି । ଗେରୁଆ ସହ ହାଲକା ଗୋଲାପୀ ରଙ୍ଗ ମିଶାଇ ଏକ ସ୍ୱତନ୍ତ୍ର ରଙ୍ଗ ଦେବାକୁ ନିଷ୍ପତ୍ତି ହୋଇଥିବା ସୋମବାର ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ ସୂଚନା ନେଇଛନ୍ତି । ପରିକ୍ରମା ପ୍ରକଳ୍ପ ଲୋକାର୍ପଣ ଉତ୍ସବ ସବ୍କମିଟି ବୈଠକ ପରେ ସେ ଏହି ସୂଚନା ଦେଇଛନ୍ତି ।
ଶ୍ରୀ ଦାସ କହିଛନ୍ତି, ଯେହେତୁ ଶ୍ରୀମନ୍ଦିର କରିଡର ଓ ବଡ଼ଦାଣ୍ଡ ପାଶ୍ୱର୍ରେ ବହୁ ସଂଖ୍ୟାରେ ମଠ, ମନ୍ଦିର ରହିଛି ତେଣୁ ଧାର୍ମିକ ଭାବନାକୁ ସୁରକ୍ଷା ଦେବା ସହ ଉକ୍ତ ଅନୁଷ୍ଠାନର ସଂସ୍କୃତି ସହ ସମଭାବାପନ୍ନ ରଙ୍ଗ ଦେବାକୁ ହେବ । ଏହାକୁ ଲକ୍ଷ୍ୟରେ ରଖି ସବୁ ପ୍ରତିଷ୍ଠାନକୁ ଏକ ସ୍ୱତନ୍ତ୍ର ରଙ୍ଗ କରିବାକୁ ନିଷ୍ପତ୍ତି ହୋଇଛି । ସୂଚନା ଥାଉକି, ପୁରୀ ଶ୍ରୀମନ୍ଦିରଠାରୁ ଶ୍ରୀଗୁଣ୍ଡିଚା ମନ୍ଦିର ପର୍ଯ୍ୟନ୍ତ ୩ କିଲୋମିଟର ବ୍ୟାପୀ ପୁରୀ ବଡ଼ଦାଣ୍ଡର ଦୁଇ ପାଶ୍ୱର୍ରେ ୫ଶହରୁ ଅଧିକ ସରକାରୀ, ବେସରକାରୀ ପ୍ରତିଷ୍ଠାନ ସାଙ୍ଗକୁ ବିଭିନ୍ନ ଲୋକଙ୍କ ଘର, ମଠ, ମନ୍ଦିର, ଦୋକାନ ରହିଛି । ସମସ୍ତ ବ୍ୟାବସାୟିକ ଅନୁଷ୍ଠାନ ନିଜସ୍ୱ ଏକ ରଙ୍ଗକୁ ଅଫିସିଆଲ କୋର୍ଡ ଭାବେ ବ୍ୟବହାର କରନ୍ତି । ଅନେକ ନିଜ ରାଶି ମୁତାବକ ଘରର ରଙ୍ଗ କରନ୍ତି । ଧାର୍ମିକ ଅନୁଷ୍ଠାନମାନେ ମଧ୍ୟ ସେମାନଙ୍କ ଭାବାବେଗ ସହ ଖାପ ଖାଉଥିବା ମଠ, ମନ୍ଦିରକୁ ରଙ୍ଗ ଦେଇଥାନ୍ତି । ତେଣୁ ସ୍ୱତନ୍ତ୍ର ରଙ୍ଗ ପ୍ରତି ଲୋକଙ୍କ ଭିତରେ ଭିନ୍ନ ମତ ପ୍ରକାଶ ପାଇଛି ।