ନୂଆଦିଲ୍ଲୀ: ସଂରକ୍ଷଣ ବିରୋଧୀ ହିଂସାରେ ଅଣନିଃଶ୍ବାସୀ ହୋଇଗଲାଣି ପଡ଼ୋଶୀ ବାଂଲାଦେଶ । ଶତାଧିକ ମୃତ୍ୟୁ ପରେ ପ୍ରଧାନମନ୍ତ୍ରୀ ଶେଖ ହସିନା ଇସ୍ତଫା ଦେଇଛନ୍ତି । ଏହା ସହ ସେ ବାଂଲାଦେଶ ଛାଡ଼ି ଭାରତ ଚାଲିଆସିଥିବା କୁହାଯାଉଛି । ଶେଖ ହସିନାଙ୍କ ଇସ୍ତଫା ପରେ ସେନା ଏବେ ଦେଶର ଦାୟିତ୍ବ ନିଜ ହାତକୁ ନେଇଛି । ବାଂଲାଦେଶରେ ଆଗାମୀ ୪୮ ଘଣ୍ଟା ମଧ୍ୟରେ ଅନ୍ତରୀଣ ସରକାର ଗଠନ କରାଯିବ ବୋଲି ଘୋଷଣା କରିଛନ୍ତି ସେନା ମୁଖ୍ୟ ଜେନେରାଲ ଓ୍ବାକର ଉଜ-ଜମାନ୍ । ସେପଟେ ଶେଖ ହସିନା ହେଲିକପ୍ଟର ଯୋଗେ ନିଜ ସାନ ଭଉଣୀଙ୍କ ସହ ତ୍ରିପୁରାର ରାଜଧାନୀ ଅଗରତାଲାରେ ପହଞ୍ଚିଥିବା ଜଣାପଡ଼ିଛି । ଏହା ପରେ ସେ ଲଣ୍ଡନ ଯାଇପାରନ୍ତି ବୋଲି ରିପୋର୍ଟ ପ୍ରକାଶ ପାଇଛି ।
ଜୁଲାଇ ପ୍ରଥମ ସପ୍ତାହରୁ ଶେଖ ହସିନାଙ୍କ ବିରୋଧରେ ଛାତ୍ର ଆନ୍ଦୋଳନ ଆରମ୍ଭ ହୋଇଥିବା ବେଳେ ଏହା ଏବେ ତୀବ୍ର ରୂପ ଧାରଣ କରିଛି । ଏବେ ସୁଦ୍ଧା ମୃତ୍ୟୁ ସଂଖ୍ୟା ୩୦୦ରୁ ଅଧିକ ଟିପଯାଇଛି । ରବିବାର ଗୋଟିଏ ଦିନରେ ୯୦ ଲୋକଙ୍କ ମୃତ୍ୟୁ ସମଗ୍ର ବିଶ୍ବକୁ ଚକିତ କରିଛି । ସଂରକ୍ଷଣ ବିରୋଧୀ ଆନ୍ଦୋଳନର ତୀବ୍ରତା ବଢ଼ିବା ଏବଂ ସେନାର ୪୫ ମିନିଟର ଅଲ୍ଟିମେଟମ ପରେ ଶେଖ ହସିନା ପଦରୁ ଇସ୍ତଫା ଦେବା ସହ ଦେଶ ଛାଡ଼ି ପଳାୟନ କରିଛନ୍ତି । ସୋମବାର ବାଂଲାଦେଶ ସେନା ମୁଖ୍ୟ ଓ୍ବାକର ଉଜ-ଜମାନ୍ କହିଛନ୍ତି ଯେ, ପ୍ରଧନମନ୍ତ୍ରୀ ଶେଖ ହସିନା ଇସ୍ତଫା ଦେଇଛନ୍ତି । ଅନ୍ତରୀଣ ସରକାର ଦେଶକୁ ଚଳାଇବେ । ଏହା ସହ ସେ ନାଗରିକଙ୍କୁ ଆନ୍ଦୋଳନ ବନ୍ଦ କରିବାକୁ ଅପିଲ୍ କରିଛନ୍ତି । ସେପଟେ ସବୁ ହତ୍ୟାର ନିରପେକ୍ଷ ତଦନ୍ତ କରିବେ ବୋଲି ମଧ୍ୟ କହିଛନ୍ତି ଓ୍ବାକର ଉଜ-ଜମାନ୍ ।
ଏହା ପୂର୍ବରୁ ରବିବାର ଶେଖ ହସିନା ସରକାରଙ୍କ ବିରୋଧରେ ହଜାର ହଜାର ଆନ୍ଦୋଳନକାରୀ ହିଂସ୍ରକ ବିକ୍ଷୋଭ କରିଥିଲେ । ଏହି ପ୍ରଦର୍ଶନ ସମୟରେ ପ୍ରାୟ ୯୦ ଲୋକଙ୍କ ଜୀବନ ଯାଇଥିଲା । ସେହିଭଳି ଶତାଧିକ ଆନ୍ଦୋଳନକାରୀ ପ୍ରଧାନମନ୍ତ୍ରୀଙ୍କ ବାସଭବନରେ ପଥର ମାଡ଼ କରିଥିଲେ । ତେବେ ଦେଶରେ ବଡ଼ ସରକାରୀ ଚାକିରି କ୍ଷେତ୍ରରେ ସଂରକ୍ଷଣ ସମାପ୍ତ କରିବାକୁ ଆନ୍ଦୋଳନକାରୀ ଅଡ଼ି ବସିଛନ୍ତି । ଏହି ଆନ୍ଦୋଳନରେ ଏବେ ସୁଦ୍ଧା ୩୦୦ ଲୋକଙ୍କ ଜୀବନ ଯାଇଛି । ଏହା ସହ ୨୦୦୯ରୁ ଥିବା ହସିନା ସରକାରର ମଧ୍ୟ ପତ୍ତନ ଘଟିଛି । ସେନା ହାତରେ ବାଂଲାଦେଶର ଦାୟିତ୍ବ ଥିବା ବେଳେ ଆଗକୁ ସ୍ଥିତି କେଉଁ ମୋଡ ନେବା ତା ଉପରେ ସମଗ୍ର ବିଶ୍ବର ନଜର ରହିଛି ।
