ନୂଆଦିଲ୍ଲୀ: ନିଜର ଛାତ୍ରଛାତ୍ରୀଙ୍କୁ ସୁନ୍ଦରୀ ଝିଅ ଓ ହ୍ୟାଣ୍ଡସମ ପୁଅଙ୍କୁ ଠାରୁ ସାବଧାନ ରହିବାକୁ କହିଛି ଚୀନ୍ । ଚୀନର ସର୍ବୋଚ୍ଚ ଗୁଇନ୍ଦା ସଂସ୍ଥା ଛାତ୍ରଛାତ୍ରୀଙ୍କୁ ସୁନ୍ଦରୀ ଝିଅ ଏବଂ ଆକର୍ଷକ ପୁଅଙ୍କୁ ପାଖରୁ ଦୂରେଇ ରହିବାକୁ ଚେତାଇ ଦେଇଛି । ‘ହନି ଟ୍ରାପ୍’ରେ ନଫସିବାକୁ ଚୀନ୍ର ଗୁଇନ୍ଦା ସଂସ୍ଥା ଏଭଳି ଚେତବାନୀ ଦେଇଥିବା କୁହାଯାଉଛି । ଗବେଷଣା ଏବଂ ଅନ୍ୟ ଗୁରୁତ୍ବପୂର୍ଣ୍ଣ ସଂସ୍ଥା ସହ ଜଡ଼ିତ ଛାତ୍ରଛାତ୍ରୀଙ୍କ ଲାଗି ଚୀନ୍ ସରକାର ଏଭଳି ମାର୍ଗଦର୍ଶିକା ଜାରି କରିଛନ୍ତି । ଚୀନର ସୁରକ୍ଷା ମନ୍ତ୍ରଣାଳୟ ଓ୍ୱି-ଚାଟ୍ ସୋସିଆଲ ମିଡିଆ ଆକାଉଣ୍ଟରେ ବଡ ବିଜ୍ଞପ୍ତି ଜାରି କରିଛି ।
ଛାତ୍ରଛାତ୍ରୀମାନଙ୍କୁ ବିଭିନ୍ନ ଉପାୟରେ ସମ୍ବେଦନଶୀଳ ସୂଚନା ପ୍ରକାଶ କରିବାକୁ ବାଧ୍ୟ କରାଯାଇପାରେ। ବିଦେଶୀ ଗୁପ୍ତଚର ଏବଂ ଗୁପ୍ତଚର ସଂସ୍ଥା ଯୁବ ଛାତ୍ରଛାତ୍ରୀମାନଙ୍କୁ ଟାର୍ଗେଟ କରୁଛନ୍ତି। ଏହି ଏଜେନ୍ସିଗୁଡ଼ିକ ସେମାନଙ୍କର କୌତୁହଳ, ଇଚ୍ଛା ଓ ଦୁର୍ବଳତାର ସୁଯୋଗ ନେଉଛନ୍ତି ବୋଲି ଚୀନର ସୁରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି । ବିଦେଶୀ ଏଜେଣ୍ଟମାନେ ପ୍ରାୟତଃ ବିଶ୍ୱବିଦ୍ୟାଳୟର ମେଧାବୀ ଛାତ୍ରଛାତ୍ରୀ, ଗବେଷଣା ପ୍ରତିଷ୍ଠାନର କର୍ମଚାରୀ କିମ୍ବା ଗବେଷଣା ସହ ଜଡିତ କମ୍ପାନୀକୁ ଟାର୍ଗେଟ୍ କରନ୍ତି । ସେମାନଙ୍କ ନିକଟରୁ ଗବେଷଣାତ୍ମକ ତଥ୍ୟ ଚୋରି କରିବା ପାଇଁ ଏହି ଏଜେଣ୍ଟମାନେ କାମ କରୁଛନ୍ତି। ସେମାନେ ଛାତ୍ରଛାତ୍ରୀଙ୍କୁ ଗବେଷଣା କ୍ଷେତ୍ରରେ କମ ସମୟରେ ଅଧିକ ରୋଜଗାର କରିବାର ପ୍ରଲୋଭନ ଦେଖାଉଛନ୍ତି । ଛାତ୍ରଛାତ୍ରୀମାନେ ଏଥିପ୍ରତି ଆଗ୍ରହ ଦେଖାଇଲେ ବିଦେଶୀ ଗୁପ୍ତଚର ସଂସ୍ଥା ସୋସିଆଲ ମିଡିଆ, ଟେଲିଫୋନ୍ କିମ୍ବା ଭିଡିଓ କନଫରେନ୍ସିଂ ମାଧ୍ୟମରେ ଫସାଇ ଦେଉଛନ୍ତି ବୋଲି ଚୀନ୍ ନିଜର ଛାତ୍ରଛାତ୍ରୀଙ୍କୁ ଚେତାଇ ଦେଇଛି ।
କେତେକ କ୍ଷେତ୍ରରେ ଗୁପ୍ତଚର ସଂସ୍ଥାଗୁଡ଼ିକ ମେଧାବୀ ଛାତ୍ରଛାତ୍ରୀଙ୍କୁ ଫସାଇବା ଲାଗି ହ୍ୟାଣ୍ଡସମ୍ ପୁଅ ଏବଂ ସୁନ୍ଦରୀ ମହିଳାଙ୍କ ସାହାରା ନିଅନ୍ତି । ସେମାନେ ଯୁବ ଛାତ୍ରଛାତ୍ରୀମାନଙ୍କୁ ମିଥ୍ୟା ପ୍ରେମରେ ଫସାଇ ତଥ୍ୟ ଚୋରି କରିବାକୁ ଚେଷ୍ଟା କରନ୍ତି । ସେମାନେ ପିଲାମାନଙ୍କ ଯତ୍ନ ନେବାକୁ ଚେଷ୍ଟା କରିବା ସହ ସେମାନଙ୍କ ସମସ୍ୟା ସମାଧାନ କରିବାର ନାଟକ କରି ବିଶ୍ବାସ ଜିତିବାକୁ ଚେଷ୍ଟା କରନ୍ତି । ଆଉ ଧୀରେ ଧୀରେ ଛାତ୍ରଛାତ୍ରୀଙ୍କୁ ବେଆଇନ କାର୍ଯ୍ୟ କରିବାକୁ ପ୍ରବର୍ତ୍ତାନ୍ତି ବୋଲି ମନ୍ତ୍ରଣାଳୟ ଛାତ୍ରଛାତ୍ରୀଙ୍କୁ ସଜାଗ କରାଇ ଦେଇଛି ।
