ଖୋର୍ଦ୍ଧା,୧୬/୧୧: ୨୦୨୪ ସାଧାରଣ ନିର୍ବାଚନ ପାଇଁ ପାଗ ଭିଡ଼ିଲେଣି ନେତା । ଏଭଳି ସମୟରେ ବେଗୁନିଆ ବିଧାୟକ ତଥା ଖୋର୍ଦ୍ଧା ଜିଲ୍ଲା ଯୋଜନା କମିଟି ଅଧ୍ୟକ୍ଷ ରାଜେନ୍ଦ୍ର କୁମାର ସାହୁଙ୍କ ବିରୋଧରେ କୋର୍ଟରେ ମିଥ୍ୟା ନିର୍ବାଚନୀ ସତ୍ୟପାଠ ମାମଲା ରୁଜୁ ହୋଇଛି । ଆଦର୍ଶ ଥାନା ଅଧୀନ ୧୫ ନମ୍ବର ୱାର୍ଡର ଡାକ୍ତରଲାଇନ୍ସ୍ଥିତ ଉପେନ୍ଦ୍ର କୁମାର ରାଉତରାୟ ବିଧାୟକଙ୍କ ବିରୋଧରେ ଏଭଳି ଅଭିଯୋଗ ଆଣିଛନ୍ତି ।
ଉପେନ୍ଦ୍ର ଅଭିଯୋଗରେ ଦର୍ଶାଇଛନ୍ତି, ଗତ ନିର୍ବାଚନ ସମୟରେ ଉପଜିଲ୍ଲାପାଳ ତଥା ରିଟର୍ଣ୍ଣିଂ ଅଫିସର ନିକଟରେ ବିଧାୟକ ଦାଖଲ କରିଥିବା ମାଟ୍ରିକ ସାର୍ଟିଫିକେଟ୍ ଏବଂ ଅନ୍ୟାନ୍ୟ କାଗଜପତ୍ରରେ ତ୍ରୁଟି ରହିଛି । ଏ ନେଇ ଖୋର୍ଦ୍ଧା ଏସ୍ଡିଜେଏମ୍ଙ୍କ କୋର୍ଟରେ ମାମଲା (୨୧୩/୨୩) ରୁଜୁ ହୋଇଛି । ଅନ୍ୟପଟେ ଏ ନେଇ ବିଧାୟକ ଶ୍ରୀ ସାହୁଙ୍କ ସହିତ ଯୋଗାଯୋଗ ହୋଇପାରିନାହିଁ ।