ନୂଆଦିଲ୍ଲୀ: ଆସନ୍ତାକାଲି ଅର୍ଥାତ ଫେବୃଆରୀ ୧୨ରେ ବିହାର ବିଧାନସଭାରେ ବହୁମତ ସାବ୍ୟସ୍ତ( ଫ୍ଲୋର୍ ଟେଷ୍ଟ) କରିବେ ନୀତୀଶ ସରକାର । ସିଏମ୍ ନୀତୀଶ କୁମାରଙ୍କୁ ଗୃହରେ ସଂଖ୍ୟାଗରିଷ୍ଠତା ଉପସ୍ଥାପନ କରିବାକୁ ପଡିବ । ଏହାରି ଭିତରେ ଯେପରି କୌଣସି ଖେଳ ନହୋଇଯାଏ, ସେଥିପାଇଁ ଶାସକ ଦଳଠାରୁ ବିରୋଧୀ ପର୍ଯ୍ୟନ୍ତ ସମସ୍ତେ ନିଜ ବିଧାୟକମାନଙ୍କୁ ଏକାଠି କରିବାରେ ବ୍ୟସ୍ତ ଅଛନ୍ତି । ସେପଟେ ହମ୍ ପାର୍ଟି ମୁଖ୍ୟ ଜିତନ ରାମ ମାଞ୍ଜୀଙ୍କ ଠାରୁ ନୀତୀଶ କୁମାରଙ୍କ ପାଇଁ ଏକ ଖୁସି ଖବର ଆସିଛି । ଜିତନ ରାମ ମାଞ୍ଜୀ ସ୍ପଷ୍ଟ ଭାବେ କହିଛନ୍ତି ଯେ, ସେ ପକ୍ଷ ପରିବର୍ତ୍ତନ କରିବେ ନାହିଁ । ଜିତନ ରାମ ମାଞ୍ଜୀଙ୍କ ଦଳ ଏହାର ବିଧାୟକମାନଙ୍କୁ ଏକ ହ୍ବିପ୍ ଜାରି କରି କରିଛି । କେବଳ ଫ୍ଲୋର ଟେଷ୍ଟରେ ଏନଡିଏ ସହଯୋଗୀ ଦଳ ସପକ୍ଷରେ ଭୋଟ୍ ଦେବାକୁ କହିଛି ।
ଫ୍ଲୋର ଟେଷ୍ଟ ବିଷୟରେ ଜିତନ ରାମ ମାଞ୍ଜୀ କହିଛନ୍ତି ଯେ ଆମେ ଗରିବ ହୋଇପାରୁ, କିନ୍ତୁ ଆମେ ବେଇମାନ୍ ନୁହେଁ । ଏଥିରୁ ସ୍ପଷ୍ଟ ହୋଇଛି ଯେ, ଜିତନ ରାମ ମାଞ୍ଜୀ ଲାଲୁ ଯାଦବଙ୍କ ପାର୍ଟି ଆରଜେଡିରୁ ସିଏମ ପଦବୀ ଅଫରକୁ ପ୍ରତ୍ୟାଖ୍ୟାନ କରିଛନ୍ତି ଏବଂ ଏନଡିଏ ଗୋଷ୍ଠୀରେ ରହିବାକୁ ନିଷ୍ପତ୍ତି ନେଇଛନ୍ତି ।
ସୂଚନାଯୋଗ୍ୟ ଯେ ବିହାର ବିଧାନସଭାରେ ମୁଖ୍ୟମନ୍ତ୍ରୀ ନୀତୀଶଙ୍କ ଫ୍ଲୋର ଟେଷ୍ଟକୁ ନେଇ ତୀବ୍ର ରାଜନୈତିକ ଉତ୍ତେଜନା ଦେଖାଦେଇଛି । ସୋମବାର ଟ୍ରଷ୍ଟ ଭୋଟ୍ ପୂର୍ବରୁ ସମସ୍ତ ଦଳ ମଧ୍ୟରେ ଏକ ରାଉଣ୍ଡ ବୈଠକ ଚାଲିଛି । ଆଜି ପାଟନାରେ ମନ୍ତ୍ରୀ ବିଜୟ ଚୌଧୁରୀଙ୍କ ବାସଭବନରେ ଜେଡିୟୁ ବିଧାୟକଙ୍କ ବୈଠକ ଅନୁଷ୍ଠିତ ହେବ । ଏହି ବୈଠକରେ ସିଏମ ନୀତୀଶ କୁମାର ମଧ୍ୟ ଉପସ୍ଥିତ ରହିବେ ।
