ନୂଆଦିଲ୍ଲୀ,୦୩/୦୫: ବ୍ରିଟିସ୍ ପ୍ରଧାନମନ୍ତ୍ରୀ ଋଷୀ ସୁନାକ ଏବେ ଚାପରେ ଅଛନ୍ତି। କାରଣ ସ୍ଥାନୀୟ ନିର୍ବାଚନ ଓ ଏକ ଗୁରୁତ୍ବପୂର୍ଣ୍ଣ ଉପନିର୍ବାଚନ ଫଳାଫଳରେ କଞ୍ଜର୍ଭେଟିଭ ପାର୍ଟକୁ ପରାଜୟର ସମ୍ମୁଖିନ ହେବାକୁ ପଡ଼ିଛି। ରାଜନୈତିକ ବିଶେଷଜ୍ଞମାନେ କହିଛନ୍ତି ଯେ ଗତ ୪୦ ବର୍ଷ ମଧ୍ୟରେ କଞ୍ଜର୍ଭେଟିଭ ପାର୍ଟିର ଏହା ସବୁଠାରୁ ଖରାପ ପ୍ରଦର୍ଶନ ଅଟେ।
ବର୍ତ୍ତମାନ ସମ୍ଭାବନା ବଢ଼ିଛି ଯେ ନିର୍ବାଚନରେ ବିରୋଧୀ ଲେବର ପାର୍ଟିର ଭଲ ଫଳାଫଳକୁ ନେଇ ଦଳର ବିଦ୍ରୋହୀ ନେତାମାନେ ବ୍ରିଟିଶ ଭାରତୀୟ ନେତା ସୁନାକଙ୍କ ଉପରେ ଆକ୍ରମଣକୁ ଆହୁରି ତୀବ୍ର କରିବେ। ବ୍ଲାକ୍ପୁଲ୍ ସାଉଥ୍ ସଂସଦୀୟ ଆସନରେ ଉପ-ନିର୍ବାଚନରେ ଲେବର ପାର୍ଟି ଜିତିଥିଲା। ଉଲ୍ଲେଖଯୋଗ୍ୟ ଯେ କଞ୍ଜର୍ଭେଟିଭ ପାର୍ଟି ସଦସ୍ୟ ସ୍କଟ ଓଲିଡ ବେଣ୍ଟନଙ୍କ ଇସ୍ତଫା ପରେ ଏହି ଉପ-ନିର୍ବାଚନ ଅନୁଷ୍ଠିତ ହୋଇଥିଲା।
ଲେବର ପାର୍ଟି ନେତା ସାର୍ କିର ଷ୍ଟାର୍ମର୍ ଏହି ଫଳାଫଳକୁ ଭୁକମ୍ପୀନୟ ବିଜୟ ବୋଲି କହିଛନ୍ତି। କାରଣ ଏହି ଫଳାଫଳ ଚଳିତ ବର୍ଷ ଶେଷରେ ହେବାକୁ ଥିବା ସାଧାରଣ ନିର୍ବାଚନ ପୂର୍ବରୁ ଆସିଛି। ଲେବର ପାର୍ଟି ନେତା ସାର୍ କିର ଷ୍ଟାର୍ମର୍ କହିଛନ୍ତି ଯେ ବ୍ଲାକପୁଲରୁ ସମଗ୍ର ଦେଶର ସ୍ଥିତିକୁ ବିଚାର କରାଯାଇପାରିବ। ଏହା ଏକ ପ୍ରତିଯୋଗିତା ଯେଉଁଥିରେ ଭୋଟରମାନେ ଋଷି ସୁନାକଙ୍କ କଞ୍ଜର୍ଭେଟିଭ ପାର୍ଟିକୁ ସିଧାସଳଖ ବାର୍ତ୍ତା ଦେଇଛନ୍ତି। କହିରଖୁଛୁ ଯେ ବ୍ଲାକ୍ପୁଲ୍ ସାଉଥରେ ଲେବର୍ ପ୍ରାର୍ଥୀ କ୍ରିସ୍ ୱେବ୍ କଞ୍ଜର୍ଭେଟିଭ ପାର୍ଟିର ଡେଭିଡ ଜୋନ୍ସଙ୍କୁ ପରାସ୍ତ କରିଛନ୍ତି। ନିର୍ବାଚନ ମତଦାନ ପାଇଁ ଜଣାଶୁଣା ପ୍ରଫେସର ଜନ୍ କାର୍ଟିସ୍ କହିଛନ୍ତି ଯେ ଗତ ୪୦ ବର୍ଷ ମଧ୍ୟରେ ସ୍ଥାନୀୟ ନିର୍ବାଚନରେ କଞ୍ଜର୍ଭେଟିଭ ପାର୍ଟିର ଏହା ସବୁଠାରୁ ଖରାପ ପ୍ରଦର୍ଶନ ଅଟେ।
