ମୁମ୍ବାଇ, ୦୧/୦୩: ଜିଡିପି ଅଭିବୃଦ୍ଧିର ଦିନକ ପରେ ସେୟାର୍ ବଜାର ଶୁକ୍ରବାର ସମସ୍ତ ପୂର୍ବ ରେକର୍ଡ ଭାଙ୍ଗିଛି । ବିଏସଇ ସେନସେକ୍ସ ୧୨୦୦ ପଏଣ୍ଟ ବୃଦ୍ଧି ପାଇ କାରବାର ୭୩ ହଜାର ୭୪୫.୩୫ ପଏଣ୍ଟରେ ବନ୍ଦ ହୋଇଛି । ସେହିଭଳି ଏନଏସ୍ଇ ନିଫ୍ଟି ମଧ୍ୟ ୩୫୦ ପଏଣ୍ଟରୁ ଅଧିକ ବୃଦ୍ଧି ପାଇ କାରବାର ୨୨ ହଜାର ୩୩୮.୭୫ ପଏଣ୍ଟରେ ବନ୍ଦ ହୋଇଛି ।

ମାର୍ଚ୍ଚ ପହିଲା ସହ ସପ୍ତାହର ଶେଷ ଦିନରେ ସେୟାର୍ ବଜାରରେ ଦେଖା ଦେଇଥିବା ଉତ୍ସାହରେ ବିଏସଇରେ ପଞ୍ଜିକୃତ କମ୍ପାନୀଙ୍କ ମାର୍କେଟ୍ କ୍ୟାପ୍ ୩.୨୩ ଲକ୍ଷ କୋଟିରୁ ବୃଦ୍ଧି ପାଇ ୩୯୧.୧୮ ଲକ୍ଷ କୋଟି ପାଖାପାଖି ପହଞ୍ଚିଛି ।

ଗୁରୁବାର ୭୨ ହଜାର ୫୦୦ ପଏଣ୍ଟରେ ସେନସେକ୍ସ ବନ୍ଦ ହୋଇଥିବା ବେଳେ ଶୁକ୍ରବାର ବୃଦ୍ଧି ପାଇ ୭୨ ହଜାର ୬୦୬.୩୧ ପଏଣ୍ଟରେ କାରବାର ଆରମ୍ଭ କରିଥିଲା ।  ଗୁରୁବାର ସରକାର ଅକ୍ଟୋବର-ଡିସେମ୍ବର ତ୍ରୈମାସିକରେ ଜିଡିପି ଅଭିବୃଦ୍ଧି ତଥ୍ୟ ଜାରି କରିଥିଲେ । ୨୦୨୩-୨୪ ଆର୍ଥିକ ବର୍ଷରେ ଆର୍ଥିକ ବିକାଶ ଦର ଅନୁମାନ ଠାରୁ ଅଧିକ ରହିଛି ।

ସରକାର ଗୁରୁବାର ଜାରି କରିଥିବା ତ୍ରୈମାସିକ ଜିଡିପି ଅଭିବୃଦ୍ଧି ୮.୪ ପ୍ରତିଶତ ରହିଛି । ଯେତେବେଳେ କି ୨୦୨୩-୨୪ ଆର୍ଥିକ ବର୍ଷରେ ଜିଡିପି ୭.୬ ପ୍ରତିଶତ ରହିବା ଅନୁମାନ କରାଯାଇଥିଲା । ଅକ୍ଟୋବର-ଡିସେମ୍ବରରେ ଦେଶର ଜିଡିପି ଅଭିବୃଦ୍ଧି ୨ ଗୁଣ ହୋଇଛି । ଉକ୍ତ ପ୍ରକାରେ ୭.୬ ପ୍ରତିଶତ ଅଭିବୃଦ୍ଧି ହାର ଦୁନିଆର ଅନ୍ୟ ଦେଶ ତୁଳନାରେ ବହୁତ ଅଧିକ । ଏଥିପାଇଁ ଭାରତୀୟ ସେୟାର୍ ବଜାର ଉପରେ ନିବେଶକଙ୍କ ଭରସା ବଢ଼ିଛି ।