ଭୁବନେଶ୍ୱର,୨୧/୦୯: କ୍ୟାପିଟାଲ୍ ହସ୍ପିଟାଲ୍ ପରିସରରେ ଏକ ଘରୋଇ ଔଷଧ ଦୋକାନ ଖୋଲିଥିଲା । ଏହି ଘଟଣାକୁ ନେଇ ଡାକ୍ତରଖାନା କର୍ତ୍ତୃପକ୍ଷ ଶନିବାର ଉକ୍ତ ଦୋକାନୀଙ୍କୁ ନୋଟିସ୍ ଜାରି କରିବେ । ଯଦି ନୋଟିସ୍ ଦେବାର ୨୪ ଘଣ୍ଟା ଭିତରେ ଦୋକାନୀ ଏହି ନୋଟିସ୍ର ଉତ୍ତର ନ ଦିଅନ୍ତି ତାହାହେଲେ ତାଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜଣାପଡିଛି । ଗତକାଲି ଡାକ୍ତରଖାନା ପରିସରରେ ଏହି ଦୋକାନ ଖୋଲିବାଠାରୁ ବିବାଦ ସୃଷ୍ଟି ହୋଇଛି । ଡାକ୍ତରଖାନା କର୍ତ୍ତୃପକ୍ଷ ଔଷଧ ଦୋକାନୀଙ୍କ ବିରୋଧରେ ସ୍ୱାସ୍ଥ୍ୟ ବିଭାଗକୁ ଚିଠି ଲେଖି ଜଣାଇଛନ୍ତି ।
ସୂଚନାଯୋଗ୍ୟଯେ, ୨୦୧୫ ଫେବ୍ରୁଆରୀ ୨୭ ତାରିଖରେ ରାଜ୍ୟ ସ୍ୱାସ୍ଥ୍ୟ ବିଭାଗ ଏକ ବିଜ୍ଞପ୍ତି ପ୍ରକାଶ କରିଥିଲା । ସେତେବେଳେ ରାଜ୍ୟ ସାରା ସବୁ ସରକାରୀ ଡାକ୍ତରଖାନା ପରିସରରେ ଘରୋଇ ଔଷଧ ଦୋକାନକୁ ବନ୍ଦ କରାଯାଇଥିଲା । କ୍ୟାପିଟାଲ୍ ହସ୍ପିଟାଲ୍ ପରିସରରେ କେତେକ ଔଷଧ ଦୋକାନ ଖୋଲିଥିବାବେଳେ ସେଗୁଡିକର ଲାଇସେନ୍ସ ବାତିଲ କରାଯିବା ସହ ସେଗୁଡିକୁ ମଧ୍ୟ ବନ୍ଦ କରାଯାଇଥିଲା।
