ଜୟପୁର: କୁନୋ ଜାତୀୟ ଉଦ୍ୟାନରୁ ଏକ ଆଫ୍ରିକୀୟ ଚିତାବାଘ ଚମ୍ପଟ ମାରି ରାଜସ୍ଥାନରେ ପହଞ୍ଚିଯାଇଛି । ଖସିଥିବା ଚିତାବାଘ ଆଫ୍ରିକାର ନାମିବିଆରୁ ଦୁଇବର୍ଷ ତଳେ କୁନୋ ଜାତୀୟ ଉଦ୍ୟାନକୁ ଆସିଥିଲା । ଏହି ଚିତା ଖସି ରାଜସ୍ଥାନ କରୌଲି ଜିଲ୍ଲାର କରନପୁରସ୍ଥିତ ସିମରା ଗାଁରେ ପହଞ୍ଚିଛି । କୁନୋରୁ ୫୦ କିଲୋମିଟର ଦୂର ରାଜସ୍ଥାନର ସିମରା ଗାଁରେ ଚିତାବାଘକୁ ଦେଖି ଲୋକେ ଭୟଭୀତ ହୋଇପଡ଼ିଥିଲେ ।
ଶନିବାର ସକାଳେ ବାଘ ପଶିଥିବାର ଖବର ପାଇ ଆଖପାଖ ସବୁ ଅଞ୍ଚଳରେ ଆତଙ୍କ ଖେଳିଯାଇଥିଲା । ଖବର ପାଇ ବନବିଭାଗ ଓ ପୋଲିସ୍ ଟିମ୍ ସେଠାରେ ପହଞ୍ଚି ତାକୁ ଧରିବା ପାଇଁ ଉଦ୍ୟମ କରିଥିଲେ । ବନ ବିଭାଗ ସେଠାକାର ଲୋକମାନଙ୍କୁ ଜଙ୍ଗଲରୁ ଦୂରରେ ରହିବାକୁ ସତର୍କ କରାଇଥିଲା । ଏହା ମଧ୍ୟପ୍ରଦେଶ କୁନୋ ସଫାରି ପାର୍କରେ ବୁଲୁଥିବା ବେଳେ କୌରାଲି ଠାରେ ପହଞ୍ଚିଥିବାର ସୂଚନା ମିଳିଛି ।
ଏହି ପୁରୁଷ ଚିତାଟି ସିମରା ଗାଁରେ ପ୍ରବେଶ କରିଥିବା ନେଇ କୌରଲି ବନ ବିଭାଗ ଅଧିକାରୀଙ୍କୁ ସୂଚନା ମିଳିଥିଲା । ତେବେ ମଧ୍ୟପ୍ରଦେଶ ଶୋପୁର ଏବଂ ସବଳଗଡ଼ ଦେଇ ସିମରାରେ ପହଞ୍ଚିଥିଲା କୁନୋର ଏହି ଚିତା । ମଧ୍ୟପ୍ରଦେଶର ଉକ୍ତ ଦୁଇଟି ସହର ଚମ୍ବଲ ନଦୀ ପାଖରେ ଥିବା ବେଳେ କରୌଲି ମଧ୍ୟ ଏହି ନଦୀ ପାଖରେ ରହିଛି । ଚିତା ସଂପର୍କରେ ଖବର ମିଳିବା ପରେ ମଧ୍ୟପ୍ରଦେଶ ଏବଂ ରାଜସ୍ଥାନର ବନ ବିଭାଗର ଏକ ମିଳିତ ଟିମ୍ ସମିରାରେ ପହଞ୍ଚିଥିଲେ । ସେଠାରେ ଚିତାକୁ କାବୁ କରିଥିଲା ବନ ବିଭାଗ ଟିମ୍ ।
ସେପଟେ କୁନୋରୁ ଚିତା ଫେରାର ହେବା ଘଟଣା ପ୍ରଥମ ନୁହେଁ । ଚାରି ମାସ ପୂର୍ବରୁ କୁନୋ ଜାତୀୟ ଉଦ୍ୟାନରୁ ନିଖୋଜ ହୋଇଥିବା ଏକ ଚିତା ମଧ୍ୟପ୍ରଦେଶ ଏବଂ ରାଜସ୍ଥାନ ସୀମାରେ ଥିବା ବାରନ ଜିଲ୍ଲାରୁ ମିଳିଥିଲା । କୁନୋର ବନ ବିଭାଗ ଟିମ୍ସେଠାରେ ପହଞ୍ଚି ଚିତାକୁ ଟ୍ରାଙ୍କୁଲାଇଜ୍ କରି କାବୁ କରିବାରେ ସଫଳ ହୋଇଥିଲେ ।
