ଖୋର୍ଦ୍ଧା,୨୭/୦୫: ମତଦାନ କେନ୍ଦ୍ରରେ ଇଭିଏମ୍ ଭାଙ୍ଗି ପୁଣି ବିବାଦକୁ ଆସିଛନ୍ତି ବାହୁବଳୀ ବିଧାୟକ ପ୍ରଶାନ୍ତ ଜଗଦ୍ଦେବ । ପ୍ରିଜାଇଡିଂ ଅଫିସରଙ୍କ ଅଭିଯୋଗକ୍ରମେ ତାଙ୍କୁ ଗିରଫ କରିଛି ପୁଲିସ । ଖୋର୍ଦ୍ଧା ଜେଲ୍ର ଦୁଇ ନମ୍ବର ସେଲ୍ ପାଲଟିଛି ତାଙ୍କ ଠିକଣା । ଅନ୍ୟପଟେ ଜଗଦ୍ଦେବଙ୍କ ଗିରଫକୁ ନେଇ ବିଜେପି ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଶାସକ ଦଳ ଷଡ଼ଯନ୍ତ୍ର କରି ତାଙ୍କୁ ଜେଲ୍ ପଠାଇଥିବା ଦଳୀୟ କର୍ମକର୍ତ୍ତା ଅଭିଯୋଗ କରିଛନ୍ତି ।
ଦଳ ବଦଳିଲା । ହେଲେ ବଦଳିଲାନି ପ୍ରକୃତି । ବିଜେଡିରେ ଥିବାବେଳେ ବାଣପୁରରେ ବିଜେପି କର୍ମୀଙ୍କୁ ଗାଡ଼ି ଚଢ଼ାଇବା ଘଟଣାରେ ଗିରଫ ହୋଇଥିଲେ ଶ୍ରୀ ଜଗଦ୍ଦେବ । ଦଳୀୟ ଶୃଙ୍ଖଳା ଭଙ୍ଗ କରିଥିବାରୁ ବିଜେଡିରୁ ତାଙ୍କୁ ବହିଷ୍କାର କରାଯାଇଥିଲା । ଏହାପରେ ସେ ବିଜେପିରେ ଯୋଗଦେଇ ଖୋର୍ଦ୍ଧା ଆସନରୁ ନିର୍ବାଚନ ଲଢ଼ୁଛନ୍ତି ।
ଗତ ଶନିବାର ବୋଲଗଡ଼ ବ୍ଲକ ବଡକୁମାରୀ ପଞ୍ଚାୟତ କାଉଁରୀପାଟଣାସ୍ଥିତ ୧୧୪ନଂ. ବୁଥ୍କୁ ମତଦାନ କରିବାକୁ ଯାଇଥିଲେ ଜଗଦ୍ଦେବ । ଏହି ସମୟରେ କୌଣସି କାରଣରୁ ଉତ୍ତେଜିତ ହୋଇ ସେ ଇଭିଏମ୍ ଭଙ୍ଗାରୁଜା କରିଥିବା ଅଭିଯୋଗ ହୋଇଥିଲା । ସାଂସଦ ଅପରାଜିତା ଷଡ଼ଙ୍ଗୀଙ୍କ କାର୍ରେ ଫେରୁଥିବାବେଳେ ବେଗୁନିଆ ନିକଟରୁ ପୁଲିସ୍ ତାଙ୍କୁ ଉଠାଇ ନେଇଥିଲା । ପ୍ରିଜାଇଡିଂ ଅଧିକାରୀ ଜ୍ଞାନରଞ୍ଜନ ତ୍ରିପାଠୀଙ୍କ ଅଭିଯୋଗ କ୍ରମେ ପୁଲିସ ତାଙ୍କ ବିରୋଧରେ ଏକ ମାମଲା (ନଂ. ୧୧୭/୨୪) ରୁଜୁ କରିଥିଲା ।
ସରକାରୀ କାର୍ଯ୍ୟରେ ବାଧା ଦେବା, ମହିଳାଙ୍କୁ ଅସଦାଚରଣ କରିବା ଭଳି ବିଭିନ୍ନ ଦଫା ତାଙ୍କ ବିରୋଧରେ ଲାଗିଛି । ବୋଲଗଡ଼ ପୁଲିସ ତାଙ୍କୁ ସିଜେଏମ କୋର୍ଟରେ ହଜାର କରିଥିଲା । ଜାମିନ ନାମଞ୍ଜୁର ପରେ ରାତି ୧୨ଟା ୩୫ରେ ତାଙ୍କୁ ଜେଲ୍ ହାଜତକୁ ପଠାଇ ଦିଆଯାଇଛି। ରବିବାର ସକାଳ ଜଳଖିଆରେ ଶ୍ରୀ ଜଗଦ୍ଦେବ ସୁଜି ହାଲୁଆ, ମଧ୍ୟାହ୍ନ ଭୋଜନରେ ମାଛ, ଭାତ, ଡାଲି, ଘାଣ୍ଟ ତରକାରି ଖାଇଥିବା ଜେଲ୍ କର୍ତ୍ତୃପକ୍ଷ କହିଛନ୍ତି ।